കാലിഫോര്ണിയ: ജമൈക്കയെ മറുപടിയില്ലാത്ത രണ്ട് ഗോളുകള്ക്ക് തകര്ത്ത് ഗ്രൂപ്പ് സിയില് നിന്ന് മെക്സിക്കോ കോപ്പ അമേരിക്ക ശതാബ്ദി ചാമ്പ്യന്ഷിപ്പിന്റെ ക്വാര്ട്ടര് ഫൈനലില്. ജാവിയര് ഹെര്ണാണ്ടസും ഒറിബെ പെരാള്ട്ടയും ഗോളുകള് നേടി. രണ്ട് കളികളിലും പരാജയപ്പെട്ട ജമൈക്ക ക്വാര്ട്ടര് കടക്കാതെ പുറത്താവുകയും ചെയ്തു.
പന്ത് നിയന്ത്രിച്ചുനിര്ത്തുന്നതിലും ഷോട്ടുകള് ഉതിര്ക്കുന്നതിലും ഏറെ മുന്നിട്ടുനിന്നത് മെക്സിക്കോയായിരുന്നു. ഉറുഗ്വെക്കെതിരെ നേടിയ അട്ടിമറി വിജയത്തിന്റെ ആത്മവിശ്വാസവുമായി ഇറങ്ങിയ മെക്സിക്കോ തുടക്കം മുതല് മികച്ച മുന്നേറ്റങ്ങള് നടത്തി. എന്നാല് ആദ്യ അവസരം ലഭിച്ചത് ജമൈക്കക്ക്. ഏഴാം മിനിറ്റില് ക്ലെയ്റ്റന് ഡൊണാള്ഡ്സണ് ബോക്സിനുള്ളില് നിന്ന് പായിച്ച ഷോട്ട്നേരിയ വ്യത്യാസത്തില് പുറത്ത് പോകുകയായിരുന്നു. തുടര്ന്ന് മെക്സിക്കന് മുന്നേറ്റങ്ങള്. തുടര്ച്ചയായ മുന്നേറ്റങ്ങള്ക്കൊടുവില് പതിനെട്ടാം മിനിറ്റില് ആദ്യഗോള്.
ജീസസ് കൊറോണ ജമൈക്കന് പ്രതിരോധത്തിന് മുകളിലൂടെ നല്കിയ പന്ത് നല്ലൊരു ഹെഡ്ഡറിലൂടെ ജാവിയര് ഹെര്ണാണ്ടസ് വലയിലെത്തിച്ചു. പിന്നീട് 31-ാം മിനിറ്റിലും 36-ാം മിനിറ്റിലും ജമൈക്കന് മുന്നേറ്റം പ്രതിരോധത്തില്ത്തട്ടി അവസാനിച്ചു. മൂന്നുമിനിറ്റുശേഷം മറ്റൊരു മുന്നേറ്റം നടത്തിയെങ്കിലും മക്ലിയാരിയുടെ ഷോട്ട് ഉജ്ജ്വലമായി പരാഗ്വെ ഗോളി ഒച്ചോവ തടുത്തിട്ടു. 43-ാം മിനിറ്റില് ഗോളി മാത്രം മുന്നില് നില്ക്കെ ഡൊണാള്ഡ്സണിന്റെ മുന്നേറ്റം മെക്സിക്കന് ഡിഫന്ഡര് ഫൗള് ചെയ്തെങ്കിലും റഫറി പെനാല്റ്റി അനുവദിച്ചില്ല. ഇതോടെ ആദ്യപകുതിയില് മെക്സിക്കോ 1-0ന് മുന്നിട്ടുനിന്നു.
രണ്ടാം പകുതിയുടെ തുടക്കത്തില് മെക്സിക്കോക്ക് ലീഡുയര്ത്താനുള്ള അവസരം നഷ്ടപ്പെട്ടു. ബോക്സിന്റെ ആറു വാര അകലെ നിന്ന് ഹെര്ണാണ്ടസ് ഹെഡ്ഡറിന് ശ്രമിക്കവെ പന്ത് വഴുതി മാറുകയായിരുന്നു. ഗോളി മാത്രം തൊട്ടുമുന്നില് നില്ക്കെ മികച്ച അവസരമാണ് ഹെര്ണാണ്ടസ് നഷ്ടപ്പെടുത്തിയത്. 51-ാം മിനിറ്റില് വീണ്ടും അവസരം ലഭിച്ചെങ്കിലും ലക്ഷ്യം കാണാന് കഴിഞ്ഞില്ല. തുടര്ന്നും നിരവധി അവസരങ്ങള് അവര്ക്ക് ലഭിച്ചെങ്കിലും ഗോളി ആന്ദ്രെ ബ്ലേക്കിന്റെ തകര്പ്പന് പ്രകടനം ജമൈക്കയ്ക്ക് തുണയായി. 71-ാം മിനിറ്റില് ജമൈക്കക്ക് അവസരം ലഭിച്ചെങ്കിലും ഡൊണാള്ഡ്സണിന്റെ ഷോട്ട് പോസ്റ്റിന് പുറത്ത്.
തുടര്ച്ചയായ മുന്നേറ്റങ്ങള്ക്കൊടുവില് 81-ാം മിനിറ്റില് മെക്സിക്കോ വീണ്ടും ഫലം കണ്ടു. 78-ാം മിനിറ്റില് ജാവിയര് ഹെര്ണാണ്ടസിന് പകരമായി കളത്തിലെത്തിയ ഒറിബെ പെരാള്ട്ടെയായിരുന്നു ഇത്തവണ ലക്ഷ്യം കണ്ടത്. ലൊസാനയും ഹെക്ടര് ഹെരേരയും പെരാള്ട്ടയും ചേര്ന്നുള്ള നീക്കത്തിനൊടുവിലാണ് ഗോള് പിറന്നത്. കളിയുടെ അവസാന മിനിറ്റുകളില് ഗോള് മടക്കുകയെന്ന ലക്ഷ്യത്തോടെ ജമൈക്ക ഉജ്ജ്വലമായി പൊരുതുകയും ചില അവസരങ്ങള് സൃഷ്ടിക്കുകയും ചെയ്തെങ്കിലും മെക്സിക്കോ ഗോള്കീപ്പര് ഒച്ചോവ അവര്ക്ക് മുന്നില് വിലങ്ങുതടിയായി നിലയുറപ്പിച്ചു. 2015 ഒക്ടോബറിന് ശേഷം കളിച്ച മത്സരങ്ങളിലൊന്നും പരാജയമറിയാത്ത മെക്സിക്കോ തുടര്ച്ചയായ പതിനൊന്നാം ജയമാണ് സ്വന്തമാക്കിയത്.
