കീഴാറൂരിലെ താമരക്കുളം കാടുമൂടി നശിച്ചനിലയില്
കാട്ടാക്കട: ഐതീഹ്യങ്ങളുടെ പെരുമയും നൂറ്റാണ്ടുകളുടെ പഴമയും പേറുന്ന കീഴാറൂരിലെ താമരക്കുളം കാടുമൂടി നശിക്കുന്നു. ആര്യങ്കോട് പഞ്ചായത്തിലെ കീഴാറൂര് പിര്ളക്കോട് താമരക്കുളമാണ് അധികൃതരുടെ അനാസ്ഥയില് നാമാവശേഷമാകുന്നത്.
അന്പത് സെന്റോളം വിസ്തൃതിയുള്ള ഈ താമരക്കുളം സര്ക്കാര് ഉടമസ്ഥതയിലുള്ളതാണ്.
പാണ്ഡവന്മാര് ഒളിച്ചു പാര്ത്തുവെന്ന് പറയപ്പെടുന്ന പാണ്ഡവന് പാറയ്ക്കും പഴിഞ്ഞിപ്പാറയ്ക്കും സമീപത്താണ് ഈ വിശാലമായ താമരക്കുളം. പാണ്ഡവന് പാറയില് പൂജയ്ക്കായി ഭീമസേനന് താമരപ്പൂവുകള് ശേഖരിച്ച കുളമാണിതെന്നും ഐതീഹ്യമുണ്ടത്രെ. ഐതീഹ്യം എന്തുതന്നെ ആയാലും നാടിന്റെ ഐശ്വര്യമെന്നോണം സദാ പുഷ്പിച്ചു നില്ക്കുന്ന താമരകളാല് സമ്പുഷ്ടമായിരുന്നു പിര്ളാക്കോട്ടെ താമരക്കുളമെന്ന് നാട്ടുകാര് സാക്ഷ്യപ്പെടുത്തുന്നു.
നൂറ്റാണ്ടുകള് പഴക്കമുള്ള ചരിത്ര പ്രസിദ്ധമായ കുളം നവീകരിച്ച് സംരക്ഷിക്കണമെന്ന ഇവിടുത്തുകാരുടെ ആവശ്യത്തിന് വര്ഷങ്ങളുടെ പഴക്കമുണ്ട്. പാര്ശ്വഭിത്തികള് നിര്മ്മിച്ചിട്ടില്ലാത്തതിനാല് മണ്ണിടിച്ചിലുണ്ടായി. കുളത്തിന്റെ ഏറിയപങ്കും നികന്ന് ഇവിടെ പുല്ലും കാട്ടുചെടികളും മൂടിയ നിലയിലാണിപ്പോള്. പണ്ടെങ്ങോ നാടിന് സമൃദ്ധിയുടെ താമരക്കാലം സമ്മാനിച്ച ഓര്മ്മകള് നിലനിര്ത്താനെന്നോണം കുളത്തിന് മദ്ധ്യഭാഗത്തായി കുറച്ച് താമരകള് ഇപ്പോഴും പുഷ്പിച്ച് നില്ക്കുന്നു.
കേന്ദ്ര സര്ക്കാര് നീര്ത്തട സംരക്ഷണത്തിനായി കോടികള് നല്കാന് സന്നദ്ധത അറിയിച്ചിട്ടും ആര്യങ്കോട് പഞ്ചായത്ത് താമരക്കുളം നവീകരണത്തിനായി പദ്ധതി സമര്പ്പിച്ചില്ല. ഇക്കഴിഞ്ഞ തദ്ദേശ തെരഞ്ഞെടുപ്പില് ആദ്യമായി ബിജെപി പ്രതിനിധിയായ അഖില് പിര്ളക്കോട് വാര്ഡില് തെരഞ്ഞെടുക്കപ്പെട്ടു. ചുരുങ്ങിയ സമയത്തിനുള്ളില് അഖില് കേന്ദ്ര സര്ക്കാരിന് താമരക്കുളം നവീകരണം ആവശ്യപ്പെട്ട് ഒരു പ്രോജക്ട് സമര്പ്പിച്ചു. സര്ക്കാരില് നിന്ന് അനുകൂല തീരുമാനം ഉടന് ഉണ്ടാകുമെന്ന പ്രതീക്ഷയില് കാത്തിരിക്കുകയാണ് അഖിലും നാട്ടുകാരും.
പാണ്ഡവന് പാറയെയും പഴിഞ്ഞിപ്പാറയെയും ബന്ധിപ്പിച്ച് ഗ്രാമീണ ടൂറിസം പദ്ധതിയില് ഉള്പ്പെടുത്തണമെന്നതും കീഴാറൂരുകാരുടെ സ്വപ്നങ്ങളാണ്. ഈ പാറകള് ചരിത്ര സ്മാരകങ്ങളാകുന്നതോടെ സമീപത്തെ താമരക്കുളത്തിനും ശാപമോക്ഷം ഉണ്ടാകുമെന്ന് നാട്ടുകാര് പ്രതീക്ഷിക്കുന്നു.
