തിരുവനന്തപുരം: തീരമേഖലയിലെ വെള്ളക്കെട്ട് ഒഴിവാക്കാന് പരമാവധി സംവിധാനങ്ങള് അടിയന്തിരമായി ഒരുക്കുമെന്ന് കളക്ടര് ബിജു പ്രഭാകര് അറിയിച്ചു. മഴയെത്തുടര്ന്ന് വെള്ളക്കെട്ടുണ്ടായ തീരമേഖലയിലെ ദുരിതബാധിതപ്രദേശങ്ങള് സന്ദര്ശിച്ചശേഷം നെയ്യാറ്റിന്കര താലൂക്ക് ഓഫീസില് നടന്ന യോഗത്തില് സംസാരിക്കുകയായിരുന്നു അദ്ദേഹം. താഴ്ന്നപ്രദേശങ്ങളിലേക്ക് വെള്ളം ഒഴുകാതെ മഴവെള്ള സംഭരണികളോ കുളങ്ങളോ നിര്മിച്ച് അതത് പ്രദേശങ്ങളില് താഴാന് അവസരമൊരുക്കും.
അടിമലത്തുറ, ചെറിയതുറ, പള്ളം, പുല്ലുവിള, പുതിയതുറ, കൊച്ചുതുറ, കാഞ്ഞിരംകുളം മലിനംകുളം തുടങ്ങിയ പ്രദേശങ്ങളിലാണ് കളക്ടറുടെ നേതൃത്വത്തില് സന്ദര്ശിച്ച് പ്രശ്നങ്ങള് വിലയിരുത്തിയത്. തുടര്ന്ന് നടന്ന യോഗത്തില് നിയുക്ത എംഎല്എമാരായ എം.വിന്സന്റും കെ.ആന്സലനും സംബന്ധിച്ചു.
പല സ്ഥലങ്ങളിലും ഓടകളുടെ അഭാവമാണ് മഴവെള്ളം റോഡുകളില്നിന്ന് താഴ്ന്ന പ്രദേശങ്ങളിലേക്ക് ഒഴുകി തീരമേഖലയിലുള്ളവര്ക്ക് ദുരിതമുണ്ടാക്കുന്നത്. കഴിയാവുന്നപ്രദേശങ്ങളില് റോഡിനൊപ്പം ഓട നിര്മ്മിക്കുവാനും നിലവില് ഉണ്ടായിരുന്നതോ കൈയേറ്റം ചെയ്യപ്പെട്ടതോ ആയ ഓടകള് വീണ്ടെടുക്കാനോ നടപടിയെടുക്കാന് ഉദ്യോഗസ്ഥരോട് കളക്ടര് നിര്ദ്ദേശിച്ചു. പലയിടത്തും വെള്ളം ഒഴുകാന് റോഡ് മുറിച്ച് സൗകര്യമൊരുക്കിയിട്ടുണ്ട്. ഇത്തരം മേഖലകളില് ചപ്പാത്ത് പോലെ നിര്മിച്ച് ഗതാഗതസൗകര്യം പുനഃസ്ഥാപിക്കാന് പിഡബഌയുഡി അധികൃതരോട് കളക്ടര് നിര്ദ്ദേശിച്ചു. കലുങ്കുകള് ആവശ്യമുള്ള സ്ഥലങ്ങളില് ഇതിനായി എസ്റ്റിമേറ്റ് എടുത്തിട്ടുണ്ട്. പകര്ച്ചവ്യാധികള് പിടിപെടാന് സാധ്യതയുള്ള സ്ഥലങ്ങളില് പമ്പുകള് ഉപയോഗിച്ച് വെള്ളം നീക്കം ചെയ്യും.
അടിമലത്തുറ മേഖലയില് തീരദേശറോഡിന് സമാന്തരമായി ചാല് നിര്മ്മിച്ച് വെള്ളം ഒഴുക്കിവിടാനാകുമോ എന്ന സാധ്യത പരീക്ഷിക്കും. ഇതുവിജയിച്ചാല് സ്ഥിരം സംവിധാനം ഒരുക്കും. താഴ്ന്ന പ്രദേശങ്ങളില് ഇനി നിര്മിക്കുന്ന വീടുകള് ഉയര്ത്തി നിര്മ്മിക്കാന് പഞ്ചായത്തധികൃതര് ശ്രദ്ധിക്കണം. പ്രധാന റോഡുകളുടെ അരുകില് ഓട വന്നാല് ഒരുപരിധിവരെ മഴവെള്ളം ഒഴുക്കിവിടാനാകും. വാര്ഡ് അംഗങ്ങളുടെ നേതൃത്വത്തില് അയല്ക്കൂട്ടം വിളിച്ചുകൂട്ടി വെള്ളക്കെട്ട് വരുന്ന പ്രദേശങ്ങളിലെ പ്രശ്നങ്ങള് ചര്ച്ച ചെയ്ത് പരിഹാരനിര്ദേശങ്ങള് അറിയിക്കണം. കൈയേറ്റങ്ങള് ജനപ്രതിനിധികളും നാട്ടുകാരും ശ്രദ്ധയില്പ്പെടുത്തിയാല് ഒഴിപ്പിക്കാന് തയാറാണെന്നും അദ്ദേഹം അറിയിച്ചു. വിവിധ തദ്ദേശസ്ഥാപന പ്രതിനിധികള്, ഇടവക പ്രതിനിധികള്, രാഷ്ട്രീയനേതാക്കള്, പൊതുപ്രവര്ത്തകര് തുടങ്ങിയവര് തീരമേഖലയിലെ പ്രശ്നങ്ങളും നിര്ദേശങ്ങളും യോഗത്തില് അവതരിപ്പിച്ചു. നിര്ദേശങ്ങള് പഠിച്ച് വെള്ളപ്പൊക്കം ഒഴിവാക്കാനുള്ള ശാശ്വതനടപടികള് ആവിഷ്കരിക്കുമെന്ന് കളക്ടര് യോഗത്തില് അറിയിച്ചു. വെള്ളക്കെട്ട് മേഖലകള് സന്ദര്ശിക്കാന് ഡിസാസ്റ്റര് മാനേജ്മെന്റ് ഡെപ്യൂട്ടി കളക്ടര് സി.ആര്. കൃഷ്ണകുമാര്, പിഡബളിയുഡി, ഇറിഗേഷന്, ഹാര്ബര് എഞ്ചിനീയറിംഗ്, തീരദേശവികസന കോര്പറേഷന് ഉദ്യോഗസ്ഥര് തുടങ്ങിയവര് ഒപ്പമുണ്ടായിരുന്നു.
മഴക്കാലപൂര്വ ശുചീകരണം സംബന്ധിച്ച് ചര്ച്ച ചെയ്യാന് ജില്ലയുടെ ചുമതലയുള്ള മന്ത്രി കടകംപള്ളി സുരേന്ദ്രന്റെ നേതൃത്വത്തില് നാളെ രാവിലെ 11ന് കളക്ടറേറ്റില് യോഗം ചേരും. ജില്ലയിലെ എംഎല്എമാര്, മേയര്, മുനിസിപ്പല് ചെയര്മാന്മാര്, ജില്ലാ പഞ്ചായത്ത്, ബ്ളോക്ക് പഞ്ചായത്ത്, ഗ്രാമപഞ്ചായത്ത് പ്രസിഡന്റുമാര് തുടങ്ങിയ തദ്ദേശസ്ഥാപനമേധാവികള്, വകുപ്പുതല ഉദ്യോഗസ്ഥര് തുടങ്ങിയവര് യോഗത്തില് പങ്കെടുക്കണമെന്ന് കളക്ടര് അറിയിച്ചു.
