ലണ്ടന്: ഒടുവില് മാഞ്ചസ്റ്റര് യുണൈറ്റഡിന് ആശ്വാസം. പ്രീമിയര് ലീഗില് അഞ്ചാം സ്ഥാനത്തേക്ക് പിന്തള്ളപ്പെട്ടതിനൊപ്പം ചാമ്പ്യന്സ് ലീഗ് യോഗ്യതയും നഷ്ടമായ യുണൈറ്റഡ് എഫ്എ കപ്പ് സ്വന്തമാക്കി സീസണ് അവസാനിപ്പിച്ചു. ഒന്നിനെതിരെ രണ്ട് ഗോളുകള്ക്ക് ക്രിസ്റ്റല് പാലസിനെ തകര്ത്താണ് മാഞ്ചസ്റ്റര് യുണൈറ്റഡ് കിരീടം ചൂടിയത്.
അധികസമയത്തേക്ക് നീണ്ട പോരാട്ടത്തില് പത്തുപേരുമായി കളിച്ചായിരുന്നു യുണൈറ്റഡിന്റെ കിരീടധാരണം. ഒരു ഗോളിന് പിന്നിട്ടുനിന്നശേഷമായിരുന്നു വാന് ഗാലിന്റെ കുട്ടികള് കിരീടം ചൂടിയത്. പ്രീമിയര് ലീഗില് പിന്തള്ളപ്പെട്ടുപോയ വാന് ഗാലിനും കുട്ടികള്ക്കും എഫ്എ കപ്പ് കിരീടം ഏറെ ആശ്വാസമായി.
ചരിത്രപ്രസിദ്ധമായ വെംബ്ലി സ്റ്റേഡിയത്തില് നടന്ന ആവേശപ്പോരാട്ടത്തില് മാഞ്ചസ്റ്ററിന് വേണ്ടി ജുവാന് മാട്ട, ജെസ്സെ ലിങ്ഗാര്ഡ് എന്നിവര് സ്കോര് ചെയ്തപ്പോള് ക്രിസ്റ്റല് പാലസിന്റെ ഗോള് ജാസണ് പഞ്ചിയോണിന്റെ വകയായിരുന്നു.
പന്തടക്കത്തിലും ഷോട്ടുകള് പായിക്കുന്നതിലും മാഞ്ചസ്റ്റര് യുണൈറ്റഡായിരുന്നു ഏറെ മുന്നിട്ടുനിന്നതെങ്കിലും ആദ്യപകുതിയില് ഇരുടീമുകള്ക്കും ലക്ഷ്യം കാണാന് കഴിഞ്ഞില്ല. നിരവധി അവസരങ്ങളാണ് വെയ്ന് റൂണിയും കൂട്ടരും തുലച്ചുകളഞ്ഞത്. കളിയുടെ തുടക്കത്തില് യുണൈറ്റഡിന്റെ ആധിപത്യമായിരുന്നു. പത്താംമിനിറ്റില് മാര്ക്കസ് റാഷ്ഫോര്ഡിന്റെ ഷോട്ട് നിര്ഭാഗ്യംകൊണ്ടാണ് ഗോളാകാതെ പോയത്.
തൊട്ടടുത്ത മിനിറ്റില് ഫെല്ലിയാനിയുടെ ഹെഡറും ഇഞ്ചുകളുടെ വ്യത്യാസത്തില് പുറത്തേക്ക് പോയി. ഇടയ്ക്ക് ക്രിസ്റ്റല് പാലസും വെറുതെയിരുന്നില്ല. യാനിക് ബൊളസിയും സംഘവും ഇടയ്ക്കൊക്കെ യുണൈറ്റഡ് പകുതിയിലേക്ക് ഇരച്ചുകയറി. ഇരുകൂട്ടരും ആക്രമിച്ചു കളിച്ചെങ്കിലും ആദ്യപകുതി ഗോളില്ലാതെ അവസാനിച്ചു.
പിന്നീട് കളിയുടെ 78-ാം മിനിറ്റിലാണ് മത്സരത്തിലെ ആദ്യഗോള് പിറന്നത്. കളിയുടെ ഗതിക്കെതിരായി ജാസണ് പഞ്ചിയോണിലൂടെ ക്രിസ്റ്റല് പാലസ് ലീഡ് പിടിച്ചെടുത്തു. എന്നാല് മൂന്നുമിനിറ്റിനുശേഷം ജുവാന് മാട്ട യുണൈറ്റഡിന് സമനില നേടിക്കൊടുത്തു. െഫല്ലാനിയുടെ പാസ് സ്വീകരിച്ച് ബോക്സിന്റെ മധ്യത്തില് നിന്ന് മാട്ട പായിച്ച ഇടംകാലന് ഷോട്ടാണ് വലയില് കയറിയത്. ഇതോടെ കളി എക്സ്ട്രാ സമയത്തേക്ക് നീങ്ങി.
അധികസമയത്തിന്റെ ആദ്യപകുതി അവസാനിക്കുന്നതിന് തൊട്ടുമുന്പായി ക്രിസ് സ്മാളിങ് രണ്ടാം മഞ്ഞക്കാര്ഡും പിന്നാലെ ചുവപ്പുകാര്ഡും കണ്ട് പുറത്തുപോയി. പിന്നീട് പത്തുപേരുമായാണ് യുണൈറ്റഡ് പോരാടിയത്. എങ്കിലും ഒരാളുടെ കുറവൊന്നും റൂണിയെയും കൂട്ടരെയും തളര്ത്തിയില്ല. വിജയിച്ചേ തീരൂ എന്ന ദൃഢനിശ്ചയത്തോടെ ആക്രണം ശക്തമാക്കിയ അവര് കളിയുടെ 110-ാം മിനിറ്റില് വിജയഗോള് നേടുകയും ചെയ്തു.
