ചേര്‍ത്തല: ഇഴജന്തുക്കളുടെ താവളമായി ആയുര്‍വേദാശുപത്രി. ആശുപത്രി പരിസരം കാടുകയറി മാലിന്യങ്ങള്‍ അടിഞ്ഞു കൂടിയിട്ടും അധികൃതരുടെ നിസംഗത തുടരുന്നത് വ്യാപക പ്രതിഷേധത്തിനിടയാക്കിയിട്ടുണ്ട്. നഗരസഭയുടെ കീഴിലാണ് ആശുപത്രി പ്രവര്‍ത്തിക്കുന്നത്. നഗരസഭ അധികൃതര്‍ ഇങ്ങോട്ട് എത്തിനോക്കുന്നില്ലെന്നാണ് പരാതി.
ശുചീകരണ പ്രവര്‍ത്തനങ്ങള്‍ പേരിന് മാത്രമായതോടെ ഇഴജന്തുക്കളുടെ ഭീതിയിലാണ് രോഗികളും കൂട്ടിരിപ്പ്കാരും ഇവിടെ കഴിയുന്നത്. ഉപയോഗത്തിന് ശേഷം വലിച്ചെറിയുന്ന കുപ്പികളും കുന്നുകൂടി. എ.എസ്. കനാലിന്റെ തീരത്തുള്ള ആയുര്‍വേദാശുപത്രിയില്‍ രാപ്പകല്‍ ഭേദമില്ലാതെയാണ് ഇഴജന്തുക്കള്‍ കയറിയിറങ്ങുന്നത്.
മഴപെയ്തതോടെ മാലിന്യങ്ങള്‍ അടിഞ്ഞ് ആശുപത്രി പരിസരം വൃത്തിഹീനമായി. അടിസ്ഥാന സൗകര്യങ്ങളുടെ അപര്യാപ്തതയും ആശുപത്രിയെ വലയ്‌ക്കുന്നു. ശുദ്ധജല ദൗര്‍ലഭ്യവും രൂക്ഷമാകുന്നതായി പരാതിയുണ്ട്. ജനാലചില്ലുകള്‍ പൊട്ടിനില്‍ക്കുന്നതിനാല്‍ സുരക്ഷാ ഭീതിയിലാണ് രോഗികളടക്കമുള്ളവര്‍. രോഗികളുടെയും കൂട്ടിരിപ്പുകാരുടെയും പണവും ആഭരണങ്ങളും മോഷണം പോകുന്നതും നിത്യസംഭവമാണ്.
20 കിടക്കകളുള്ള ആശുപത്രിയില്‍ ദിവസേന അഞ്ഞൂറിലധികം പേരാണ് ചികിത്സ തേടിയെത്തിയെത്തുന്നത്. മൂന്ന് വനിതാ ഡോക്ടര്‍മാരടക്കം ഇരുപതോളം ജീവനക്കാരും ഇവിടെ ഉണ്ട്. മാലിന്യം യഥാസമയം നീക്കം ചെയ്തും കാടുകള്‍ വെട്ടിത്തെളിച്ചും ആശുപത്രിയെ ആശ്രയിക്കുന്ന പാവപ്പെട്ട രോഗികളുടെ സ്വ്തിനും ജീവനും സംരക്ഷണം നല്‍കണമെന്നാണ് നാട്ടുകാരുടെ ആവശ്യം.
