ന്യൂദല്ഹി: എവറസ്റ്റ് കീഴടക്കുന്ന ഭാരതത്തിലെ ആദ്യ ഐപിഎസ് ഉദ്യോഗസ്ഥയായി അപര്ണ കുമാര്. ഇന്നലെ രാവിലെ 11 മണിയോടെയാണ് അപര്ണ എവറസ്റ്റില് ഭാരതത്തിന്റെ പതാക ഉയര്ത്തിയത്. ജനുവരിയില് അന്റാര്ട്ടിക്കയിലെ ഉയര്ന്ന കൊടുമുടിയായ മൗണ്ട് വിന്സണ് മാസ്സിഫ് കീഴടക്കിയിരുന്നു.
ഉത്തര്പ്രദേശ് കേഡറിലെ ഐപിഎസ് ഉദ്യോഗസ്ഥയാണ് അപര്ണ. ലഖ്നൗവിലെ ടെലിക്കോം ഡിഐജിയായ അപര്ണ 10പേരടങ്ങുന്ന സംഘത്തിനൊപ്പമാണ് അന്റാര്ട്ടിക്കയിലെ പര്വതാരോഹണം നടത്തിയത്. 2002 ബാച്ചിലെ ഐപിഎസ് ഉദ്യോഗസ്ഥയാണ്.
വരും മാസങ്ങളില് അലാസ്കയ്ക്ക് പോകാനൊരുങ്ങുകയാണ് അപര്ണ. 2015ല് എവറസ്റ്റ് കീഴടക്കാന് അവര് ശ്രമിച്ചെങ്കിലും ഭൂകമ്പത്തെതുടര്ന്ന് ശ്രമത്തില് നിന്നും പിന്മാറുകയായിരുന്നു. 2013ല് പര്വതാരോഹണ കോഴ്സില് അടല് ബിഹാരി വാജ്പേയ് ഇന്സ്റ്റിറ്റിയൂട്ടിലെ പഠനത്തിന് ശേഷമാണ് ഈ രംഗത്തേക്ക് കടന്നു വരുന്നത്.
മുന്പ് ആഫ്രിക്കയിലെ കിളിമഞ്ചാരോയിലും ഇന്തോനേഷ്യയിലെ കാര്സ്റ്റെന്സ് പിരമിഡും ആസ്ട്രേലിയയിലെ ഉയര്ന്ന കൊടുമുടിയായ ഓഷ്യാനയിലും അപര്ണ ചുവടുകള് പതിപ്പിച്ചിട്ടുണ്ട്. 2015ല് റാണി ലക്ഷ്മി ഭായ് പുരസ്കാരവും അപര്ണയെ തേടിയെത്തിയിട്ടുണ്ട്. കേന്ദ്ര ആഭ്യന്തര മന്ത്രി രാജ്നാഥ് സിങ്ങ് ട്വിറ്ററിലൂടെയാണ് ഇക്കാര്യം അറിയിച്ചത്. രാജ്യത്തെ മുഴുവന് പോലീസ് സേനയും അപര്ണയുടെ വിജയത്തില് അഭിമാനം കൊള്ളുന്നതായി അദ്ദേഹം ട്വിറ്ററില് കുറിച്ചു.
