ന്യൂദല്ഹി: അഴിമതിക്കെതിരെ ആഞ്ഞടിക്കുന്ന പ്രധാനമന്ത്രി നരേന്ദ്ര മോദിയെ തടയാനാവില്ലെന്ന് കേന്ദ്ര സര്ക്കാര് വ്യക്തമാക്കി. അഴിമതിയെപ്പറ്റി പാര്ലമെന്റിലും പുറത്തും പ്രസംഗിക്കാന് പ്രധാനമന്ത്രിക്ക് അവകാശമുണ്ട്. അദ്ദേഹത്തിന്റെ വായ മൂടിക്കെട്ടാനുമാവില്ല. ധനമന്ത്രി അരുണ് ജെയ്റ്റ്ലി പറഞ്ഞു. മോദിക്കും പ്രതിരോധമന്ത്രി മനോഹര് പരീക്കര്ക്കും എതിരെ കോണ്ഗ്രസ് നല്കിയ അവകാശലംഘന നോട്ടീസിനോട് രാജ്യസഭയില് പ്രതികരിക്കുകയായിരുന്നു അദ്ദേഹം.
തിരുവനന്തപുരത്തും ചെന്നൈയിലും പ്രധാനമന്ത്രി അഗസ്റ്റ വെസ്റ്റ്ലാന്ഡ് ഹെലിക്കോപ്ടര് അഴിമതിക്കെതിരെ ആഞ്ഞടിച്ചിരുന്നു. ഇതാണ് കോണ്ഗ്രസിനെ പ്രകോപിപ്പിച്ചത്.
ഇരുവരും പാര്ലമെന്റിലും പുറത്തും നുണ പറയുകയാണെന്നാണ് അവകാശ ലംഘന നോട്ടീസ് നല്കിയ ശാന്താറാം നായിക്ക് പറഞ്ഞത്. തെരഞ്ഞെടുപ്പ് യോഗങ്ങളിലെ പ്രസംഗം എങ്ങനെയാണ്, എന്നു മുതലാണ് അവകാശ ലംഘനമായതെന്ന് കോണ്ഗ്രസ് വിശദീകരിക്കണമെന്നും ജെയ്റ്റ്ലി ആവശ്യപ്പെട്ടു.
ഒരു രാഷ്ട്രീയക്കാരന് പാര്ലമെന്റിനു പുറത്ത് മറ്റൊരു നേതാവിനെതിരെ പ്രസംഗിക്കുന്നത് പബഌസിറ്റിക്കാണ്. കഴിഞ്ഞ ദിവസം മുഴുവന് കോണ്ഗ്രസ് ഇതാണ് ചെയ്തതും. അദ്ദേഹം വിശദീകരിച്ചു. പാര്ലമെന്റിലും പുറത്തും അഴിമതിയെക്കുറിച്ച് പ്രസംഗിക്കാന് പ്രധാനമന്ത്രിക്ക് അവകാശമുണ്ട്. അദ്ദേഹത്തോട് വായ അടയ്ക്കാന് പറയാനാവില്ല. ജെയ്റ്റ്ലി തുടര്ന്നു. ജെയ്റ്റ്ലിയുടെ മറുപടിയെത്തുടര്ന്ന് നായ്ക്കിന് കൂടുതല് പ്രസംഗിക്കാനുള്ള അവസരം സഭാധ്യക്ഷന് പി.ജെ. കുര്യന് തള്ളി.
എന്നാല് കോണ്ഗ്രസ് അംഗങ്ങള് ബഹളം തുടര്ന്നു. ഉച്ചയ്ക്കും ഉച്ച കഴിഞ്ഞും ബഹളം തുടര്ന്നതോടെ രാജ്യസഭ നിര്ത്തിവച്ചു.
ലോക്സഭയിലും കോണ്ഗ്രസ് പ്രധാനമന്ത്രിക്ക് എതിരെ അവകാശ ലംഘനത്തിന് നോട്ടീസ് നല്കിയിട്ടുണ്ട്. രാജസ്ഥാനില് പാഠപുസ്തകത്തില് നിന്ന് ജവഹര്ലാല് നെഹ്റുവിന്റെ പേരു നീക്കിയെന്ന് ആരോപിച്ച് കോണ്ഗ്രസ് അംഗങ്ങള് രാജ്യസഭയില് ബഹളമുണ്ടാക്കി. എന്നാല് ആരുടെയും പേര് നീക്കില്ലെന്ന് കേന്ദ്രം സഭയില് വ്യക്തമാക്കി.
