കണ്ണൂര്: എല്ഡിഎഫും-യുഡിഎഫും തമ്മിലുളള ബംഗാള് മോഡല് ബന്ധം കേരളത്തിലും ഉണ്ടാകുമെന്ന് വ്യക്തമായ സൂചന നല്കി കോണ്ഗ്രസ് പ്രവര്ത്തക സമിതിയംഗം എ.കെ.ആന്റണി ഇന്നലെ വീണ്ടും രംഗത്തെത്തി. കണ്ണൂര് പ്രസ്സ് ക്ലബ്ബിന്റെ മുഖാമുഖം പരിപാടിയിലാണ് ഏതു വിധേനയും ബിജെപിയെ പരാജയപ്പെടുത്തണമെന്ന പരസ്യ ആഹ്വാനവുമായി ആന്റണി രംഗത്തെത്തിയത്. ബിജെപി നിയമസഭയിലെത്തുന്നത് ഒഴിവാക്കാന് ആരുമായും കൂട്ടുകൂടുന്നതില് തെറ്റില്ലെന്ന് ആന്റണി പരോക്ഷമായി സൂചിപ്പിച്ചു. കഴിഞ്ഞദിവസം തിരുവനന്തപുരത്ത് മതേതര വോട്ടുകള് ബിജെപിക്കെതിരെ ഒന്നിക്കണമെന്നും ബിജെപിയെ നിയമസഭയിലെത്താന് അനുവദിക്കില്ലെന്നും ആന്റണി പറഞ്ഞിരുന്നു.
മഞ്ചേശ്വരത്തും കാസര്കോട്ടും ബിജെപി നിര്ണായക ശക്തിയാണെണെന്നും തെരഞ്ഞെടുപ്പില് ബിജെപിയെ കോണ്ഗ്രസ് ഗൗരവമായാണ് കാണുന്നതെന്നും കാസര്കോട്ടും മഞ്ചേശ്വരത്തും ശക്തമായ സാന്നിദ്ധ്യമുള്ള ബിജെപിയെ തോല്പ്പിക്കാന് മതേതര കക്ഷികള് ഒന്നിക്കണമെന്നും കാസര്കോട് പ്രസ് ക്ലബ്ബില് നടന്ന ജനസഭ 2016 പരിപാടിയിലും ആന്റണി അഭിപ്രായപ്പെട്ടിരുന്നു. ബിജെപിയേയും ആര്എസ്എസിനേയും രൂക്ഷമായി വിമര്ശിച്ച ആന്റണി സിപിഎമ്മിനെക്കുറിച്ചും എല്ഡിഎഫിനെക്കുറിച്ചുമുളള മാധ്യമ പ്രവര്ത്തകരുടെ ചോദ്യങ്ങള്ക്ക് എല്ഡിഎഫിനോടുളള മൃദുസമീപനത്തോടെയാണ് മറുപടി നല്കിയത്.
കേരളത്തില് ബിജെപിക്ക്് അക്കൗണ്ട് തുറക്കല് അത്ര എളുപ്പമല്ല. കേരളത്തില് ബിജെപിക്ക് സീറ്റ് കിട്ടിയാല് അജണ്ട തന്നെ മാറുമെന്നും സാമുദായിക സ്പര്ദ്ദ ഉണ്ടായി സമൂഹത്തിന്റെ സമാധാനം തകരുമെന്നും ന്യൂനപക്ഷ വോട്ട്ബാങ്ക് ലക്ഷ്യമാക്കി ആന്റണി പറഞ്ഞു. ഇങ്ങനെ വന്നാല് പണ്ട് വിവേകാനന്ദന് പറഞ്ഞതുപോലെയാകും കേരളത്തിന്റെ സഥിതിയെന്നും അദ്ദേഹം പറഞ്ഞു. കോണ്ഗ്രസ് മുക്ത ഭാരതമെന്നാണ് അവര് പറയുന്നത്. കേരളത്തില് കോണ്ഗ്രസിനെ ഇല്ലാതാക്കാനുള്ള ശ്രമങ്ങളാണ് നടക്കുന്നത്. കോണ്ഗ്രസ് ഭരണത്തിലെത്താതിരിക്കാന് ഗൂഢാലോചനയുണ്ടോയെന്ന് സംശയിക്കേണ്ടിയിരിക്കുന്നുവെന്നും ആന്റണി പറഞ്ഞു.
ബിജെപി നയിക്കുന്ന എന്ഡിഎ മുന്നണിക്ക് വ്യക്തമായ മേല്ക്കൈ ഉണ്ടെന്നും തെരഞ്ഞെടുപ്പില് എന്ഡിഎ സ്ഥാനാര്ത്ഥികള് വന്വിജയം നേടുമെന്നുമുളള തിരിച്ചറിവില് നിന്നാണ് ബിജെപിക്കെതിരെ രൂക്ഷ വിമര്ശനവുമായി ആന്റണി രംഗത്തെത്തിയിരിക്കുന്നത്. പ്രചാരണ വേദികളിലും പത്രസമ്മേളനങ്ങളിലും ബിജെപിക്കെതിരെ രൂക്ഷ വിമര്ശനം നടത്തുകയും സിപിഎമ്മിനോടും എല്ഡിഎഫിനോടും മൃദുസമീപനം പുലര്ത്തുകയും ചെയ്യുന്ന ആന്റണിയുടെ നടപടി തെരഞ്ഞെടുപ്പ് രംഗത്ത് സജീവ ചര്ച്ചയായി കഴിഞ്ഞിട്ടുണ്ട്. വര്ഗ്ഗീയ പ്രചാരണം നടത്തി സമൂഹത്തില് വിഭാഗീയത സൃഷ്ടിച്ച് വോട്ടുതട്ടാനുളള ആന്റണിയുടെ നീക്കത്തില് പ്രതിഷേധം വ്യാപകമായിട്ടുണ്ട്. ഹോട്ടല് റോയല് ഒമേഴ്സില് നടന്ന ചടങ്ങില് പ്രസ്ക്ലബ്ബ് പ്രസിഡന്റ് കെ.ടി.അധ്യക്ഷത വഹിച്ചു.
