മാഡ്രിഡ്: സ്പാനിഷ് ലീഗ് പോരാട്ടം ഫോട്ടോ ഫിനിഷിലേക്ക്. കഴിഞ്ഞ ദിവസം നടന്ന മത്സരത്തില് ആദ്യ മൂന്ന് സ്ഥാനങ്ങളിലുള്ള ബാഴ്സലോണയും മാഡ്രിഡ് ടീമുകളും ജയം സ്വന്തമാക്കി. ബാഴ്സലോണ എവേ മത്സരത്തില് മറുപടിയില്ലാത്ത രണ്ട് ഗോളുകള്ക്ക് റയല് ബെറ്റിസിനെ കീഴടക്കിയപ്പോള്; അത്ലറ്റികോ മാഡ്രിഡ്, റയല് മാഡ്രിഡ് ടീമുകള് 1-0ന് യഥാക്രമം റയോ വയ്യക്കാനോയെയും റയല് സോസിഡാഡിനെയും മറികടന്നു. 36 മത്സരങ്ങള് പൂര്ത്തിയായപ്പോള് ബാഴ്സക്കും അത്ലറ്റികോ മാഡ്രിഡിനും 85 പോയിന്റ് വീതം, റയലിന് 84 പോയിന്റ്. മികച്ച ഗോള് ശരാശരിയില് ബാഴ്സ ഒന്നാമത്.
റയല് ബെറ്റിസിനെതിരായ മത്സരത്തിന്റെ ഗോള്രഹിതമായ ആദ്യപകുതിക്കു ശേഷമാണ് ബാഴ്സലോണ രണ്ടു ഗോളുകളും നേടിയത്. ആദ്യ പകുതിയില് തന്നെ തങ്ങളുടെ നയം വ്യക്തമാക്കുന്ന പ്രകടനം പുറത്തെടുത്തു കറ്റാലന്മാര്. എന്നാല്, ഗോള് നേടാന് രണ്ടാം പകുതി വരെ കാത്തിരിക്കേണ്ടിവന്നു. ഇതിനിടെ 35ാം മിനിറ്റില് ബെറ്റിസിന്റെ ഹെയ്കോ വെസ്റ്റര്മാന് ചുവപ്പുകാര്ഡ് കണ്ട് പുറത്തുപോയശേഷം 10 പേരുമായാണ് അവര് കളിച്ചത്.
തുടര്ച്ചയായ ആക്രമണങ്ങള്ക്കൊടുവില് 50ാം മിനിറ്റില് ഇവാന് റാക്കിറ്റിക്കിന്റെ ബൂട്ടില് നിന്ന് ബാഴ്സയുടെ ആദ്യഗോള്. 81ാം മിനിറ്റില് സുവരാസും ലക്ഷ്യം കണ്ടതോടെ ബാഴ്സ വിജയം ഉറപ്പിച്ചു. സീസണില് സുവാരസിന്റെ 54ാം ഗോളും ലീഗിലെ 35ാം ഗോളും. കഴിഞ്ഞ മൂന്നു മത്സരങ്ങളില് ബാഴ്സ 16 ഗോളുകളാണ് അടിച്ചുകൂട്ടിയത്. ഇതില് ഒമ്പതും സുവാരസിന്റെ ബൂട്ടില് നിന്ന്. അതേസമയം, ഒന്നാം നമ്പര് ഗോളി ക്ലോഡിയോ ബ്രാവോക്ക് മത്സരത്തിനിടെ പരിക്കേറ്റത് ബാഴ്സക്ക് കനത്ത തിരിച്ചടിയായി.
കളിയുടെ 88ാം മിനിറ്റിലാണ് കാല്ക്കുഴയ്ക്ക് പരിക്കേറ്റ ബ്രാവോ മടങ്ങിയത്. ടെര് സ്റ്റെഗന് പകരക്കാരനായി. ലാ ലീഗയില് ബാഴ്സയുടെ 36 മത്സരങ്ങളില് 32ലും ഗോള് വല കാത്തത് ബ്രാവോയാണ്. ഇതില് ആകെ 23 ഗോളുകള് മാത്രമേ വഴങ്ങിയുള്ളു.
റയല് സോസിഡാഡിനെതിരായ മത്സരത്തില് ക്രിസ്റ്റിയാനോ റൊണാള്ഡോയുടെ അഭാവത്തിലിറങ്ങിയ റയല് മാഡ്രിഡ് 80ാം മിനിറ്റില് വെയ്ല്സ് സൂപ്പര്താരം ഗരത് ബെയ്ല് നേടിയ ഗോളില് ജയവുമായി മടങ്ങി.
റയോ വയ്യക്കാനോക്കെതിരെ സ്വന്തം മൈതാനത്ത് കളിക്കാനിറങ്ങിയ അത്ലറ്റികോ മാഡ്രിഡ് 55ാം മിനിറ്റില് അന്റോണിയോ ഗ്രിസ്മാന് നേടിയ ഗോളില് ജയം കണ്ടു. സീസണില് ഗ്രീസ്മാന്സിന്റെ 31ാം ഗോള്. ലീഗില് രണ്ടു മത്സരങ്ങള് മൂവര്ക്കും ബാക്കി. ബാഴ്സക്ക് ഇനിയുള്ള മത്സരങ്ങളില് എതിരാളികള് എസ്പാനിയോളും ഗ്രനാഡയും. അത്ലറ്റികോ മാഡ്രിഡിന് ലെവന്റെയും സെല്റ്റ വിഗോയും, റയലിന് വലന്സിയയും ഡിപോര്ട്ടീവോയും എതിരാളികള്. മെയ് എട്ട്, 14 തീയതികളില് ഇൗ മത്സരങ്ങള്.
മറ്റ് മത്സരങ്ങളില് വിയ്യാറയല് 2-0ന് വലന്സിയയെയും, ഗറ്റാഫെ ഇതേ സ്കോറിന് ഡിപോര്ട്ടീവോയെയും, എസ്പാന്യോള് 1-0ന് സെവിയയെയും അത്ലറ്റിക് ബില്ബാവോ 2-1ന് സെല്റ്റ ഡി വിഗോയെയും പരാജയപ്പെടുത്തി.
