പാനൂര്‍: ചെങ്കോട്ടകളിലും തരംഗമായി എന്‍ഡിഎ സ്ഥാനാര്‍ത്ഥി സദാനന്ദന്‍മാസ്റ്റര്‍. കൂത്തുപറമ്പ് മണ്ഡലത്തില്‍ ഇടതിനും വലതിനും ആശങ്ക സമ്മാനിച്ച് ജൈത്രയാത്ര തുടരുന്ന സദാനന്ദന്‍മാസ്റ്റര്‍ ചുകപ്പിന്റെയും അസഹിഷ്ണുതയുടെയും ഈറ്റില്ലങ്ങളിലും വോട്ടഭ്യര്‍ത്ഥിച്ച് താമരത്തരംഗം സൃഷ്ടിക്കുകയാണ്. ഇന്നലെ കൊട്ടയോടി ടൗണില്‍ വ്യാപാരസ്ഥാപനങ്ങളില്‍ വോട്ടര്‍മാരെ കണ്ടു. ഇത്തവണ എന്നെ സഹായിക്കണം. വോട്ട് താമരയില്‍ തന്നെയല്ലേ അമ്മേ എന്ന് കവലയില്‍ മരച്ചീനി വില്‍ക്കുന്ന അമ്മയോടു ചോദിച്ച്, കുശലം പറഞ്ഞ് സദാനന്ദന്‍മാസ്റ്റര്‍ വോട്ടര്‍മാരെ കൈയ്യിലെടുത്തു. എല്ലാവരില്‍ നിന്നും നല്ല പ്രതികരണം. ഒരു ജനനേതാവിനെ കണ്ട ആഹ്ലാദം ഏവരുടെയും മുഖത്ത് ദൃശ്യമായിരുന്നു. പാര്‍ട്ടി നേതാക്കളുടെ തിട്ടൂരത്തില്‍ കഴിയുന്ന പാവപ്പെട്ടവരുടെ ഇടയിലേക്ക് കലവറയില്ലാത്ത സ്‌നേഹത്തിന്റെ കൂപ്പുകരങ്ങളുമായി സദാനന്ദന്‍മാസ്റ്റര്‍ കടന്നു ചെല്ലുകയായിരുന്നു. അവിചാരിതമായി ടൗണില്‍ മാതാ അമൃതാനന്ദമയി മഠം കണ്ണൂര്‍ മഠാധിപതി അമൃതകൃപാനന്ദപുരിയെ കണ്ടു. കാര്‍ നിര്‍ത്തി കരംഗ്രഹിച്ച സ്വാമി സദാനന്ദന്‍മാസ്റ്ററെ അനുഗ്രഹിച്ചു. കഴിഞ്ഞ ദിവസം പാറാട് ടൗണിലും വ്യാപാരസ്ഥാപനങ്ങളില്‍ വോട്ടഭ്യര്‍ത്ഥിച്ചു കയറിയിരുന്നു. എല്ലാവരും മാറ്റം ആഗ്രഹിക്കുന്നതിന്റെ സൂചനകള്‍ പ്രകടമായിരുന്നു. നേതാക്കളായ പി.സത്യപ്രകാശ്, വിപി.ഷാജി, കെ.പ്രകാശന്‍, വിപി.സുരേന്ദ്രന്‍, വിപി.ബാലന്‍, സുധി ചെറുവാഞ്ചേരി, ആര്‍വി.ശശിധരന്‍, കെകെ.ധനഞ്ജയന്‍, സി.വി.രാജേഷ്, പ്രിന്റോമാസ്റ്റര്‍, സുനില്‍, എന്‍.രതി തുടങ്ങിയവര്‍ നേതൃത്വം നല്‍കി.
