ന്യൂദല്ഹി: രാജ്യത്തെ കോടതികളിലെ ന്യായാധിപരുടെ ക്ഷാമം പരിഹരിക്കുന്നതിന് കേന്ദ്രസര്ക്കാരും ജുഡീഷ്യറിയും അടിയന്തിര നടപടികള് സ്വീകരിക്കുന്നു. രാജ്യത്തെ കോടതികളിലെ ന്യായാധിപരുടെ അഭാവം ചൂണ്ടിക്കാട്ടി മുഖ്യമന്ത്രിമാരുടേയും ഹൈക്കോടതി ചീഫ് ജസ്റ്റിസുമാരുടേയും സമ്മേളനത്തില് ചീഫ് ജസ്റ്റിസ് ടി.എസ് താക്കൂര് പ്രധാനമന്ത്രിക്ക് മുന്നില് വിതുമ്പിയതോടെയാണ് അടിയന്തിര നടപടികള്ക്ക് കേന്ദ്രനിയമ മന്ത്രാലയത്തിന് നിര്ദ്ദേശം ലഭിച്ചത്.
മുഖ്യമന്ത്രിമാരുടേയും ഹൈക്കോടതി ചീഫ് ജസ്റ്റിസുമാരുടേയും സമ്മേളനത്തിലാണ് സുപ്രീംകോടതി ചീഫ് ജസ്റ്റിസ് വികാരാധീനനായത്. ചീഫ് ജസ്റ്റിസ് ഉന്നയിച്ച വിഷയങ്ങളില് കേന്ദ്രനടപടി ഉടനുണ്ടാകുമെന്ന് പ്രസംഗ ക്രമം തെറ്റിച്ച് മറുപടി നല്കാനെണീറ്റ പ്രധാനമന്ത്രി പറഞ്ഞു. അടച്ചിട്ട മുറിയില് തീരുമാനം എടുക്കാന് നടപടിക്രമങ്ങള് അനുവദിക്കുമെങ്കില് പ്രശ്നത്തിന് പരിഹാരം ഉടനുണ്ടാക്കാമെന്നും മോദി പറഞ്ഞു.
സര്ക്കാരും ജുഡീഷ്യറിയും സംയുക്തമായി പ്രശ്നപരിഹാരത്തിന് ശ്രമിക്കുമെന്നും പ്രധാനമന്ത്രി ചീഫ് ജസ്റ്റിസിന് ഉറപ്പുനല്കി. ഇതിന്റെ അടിസ്ഥാനത്തില് പ്രധാനമന്ത്രി, ചീഫ് ജസ്റ്റിസ്, മുതിര്ന്ന സുപ്രീംകോടതി ജഡ്ജിമാര്, മുതിര്ന്ന ക്യാബിനറ്റ് മന്ത്രിമാര് എന്നിവരായിരിക്കും യോഗം ചേരുക. നിയമപരമായ നടപടിക്രമങ്ങള് പരമാവധി ലഘൂകരിച്ചുകൊണ്ടുള്ള പ്രശ്ന പരിഹാര തീരുമാനം യോഗത്തിലുണ്ടായേക്കും. ഇരുപതിനായിരത്തോളം ന്യായാധിപ ഒഴിവുകളാണ് കീഴ്ക്കോടതികളിലടക്കം ഉള്ളത്. ന്യായാധിപരുടെ അഭാവത്തെ തുടര്ന്ന് 3.8 കോടി കേസുകളാണ് രാജ്യത്ത് കെട്ടിക്കിടക്കുന്നത്.
വിദേശരാജ്യങ്ങളിലെ ന്യായാധിപരുടെ പ്രവര്ത്തനവുമായി താരതമ്യം ചെയ്യുകയാണെങ്കില് അവരെക്കാള് വളരെ മുകളിലായിരിക്കും ഭാരതത്തിലെ ന്യായാധിപരെന്നും ചീഫ് ജസ്റ്റിസ് സമ്മേളനത്തിന്റെ ഉദ്ഘാടനം നിര്വഹിച്ച ചീഫ് ജസ്റ്റിസ് ടിഎസ് താക്കൂര് പറഞ്ഞു. എന്നാല് മതിയായ ന്യായാധിപര് നമുക്കില്ല. ന്യായാധിപരുടെ ഒഴിവുകള് നികത്തുന്നതില് സര്ക്കാര് കാര്യക്ഷമമായി പ്രവര്ത്തിക്കുന്നില്ല. കോടതികളില് കേസുകള് കെട്ടിക്കിടക്കുന്നതിന് ജുഡീഷ്യറിയെ പഴിക്കരുതെന്നും ചീഫ് ജസ്റ്റിസ് പറഞ്ഞു.
ന്യായാധിപരുടെ ഒഴിവുകള് അടിയന്തിരമായി നികത്തണമെന്നാവശ്യപ്പെട്ട് 2013ല് അന്നത്തെ ചീഫ് ജസ്റ്റിസ് അല്ത്തമാസ് കബീര് പ്രധാനമന്ത്രിക്ക് നല്കിയ കത്തിനെപ്പറ്റിയും അതിന് ലഭിച്ച മറുപടിയും ജസ്റ്റിസ് ടിഎസ് താക്കൂര് പരാമര്ശിച്ചു. എല്ലാം പരിഹരിക്കുമെന്നും
കീഴ്ക്കോടതികളിലെ ന്യായാധിപ നിയമനം സംസ്ഥാന സര്ക്കാരുകളുടെ ഉത്തരവാദിത്വമാണെന്നും കൈകഴുകിക്കൊണ്ടാണ് മന്മോഹന്സിങ് മറുപടി നല്കിയതെന്ന് ടിഎസ് താക്കൂര് വിമര്ശിച്ചു.
നിലവില് രാജ്യത്തുള്ള ന്യായാധിപകരുടെ എണ്ണം 21,00ത്തില് നിന്നും 40,000 ആയി ഉയര്ത്തണമെന്ന് ചീഫ് ജസ്റ്റിസ് ആവശ്യപ്പെട്ടു. ഭാരതത്തിലെ ഒരു ന്യായാധിപന് ഏകദേശം 2,600 കേസുകള് കൈകാര്യം ചെയ്യുമ്പോള് അമേരിക്കയില് അതു വെറും 81 മാത്രമാണ്. കീഴ്ക്കോടതികള് 2 കോടി കേസുകള് കൈകാര്യം ചെയ്യുന്നു. രാജ്യത്തെ കോടതികളില് 3.8കോടി കേസുകള് തീര്പ്പാക്കാതെ കിടക്കുകയാണ്.
പത്തുലക്ഷം പേര്ക്ക് 10 ന്യായാധിപര് എന്നതില് നിന്നും 50പേര് എന്നതിലേക്ക് ഉയര്ത്തണമെന്ന് 1987 മുതല് നിയമ കമ്മീഷന് ആവശ്യപ്പെടുന്നുണ്ടെന്നും ചീഫ് ജസ്റ്റിസ് പറഞ്ഞു.
ചീഫ് ജസ്റ്റിസ് ഉന്നയിച്ച പ്രശ്നങ്ങള്ക്ക് എത്രയും വേഗം പരിഹാരം ഉണ്ടാകുമെന്ന് പ്രധാനമന്ത്രി നരേന്ദ്രമോദി വേദിയില് വെച്ച് ടി.എസ്. താക്കൂറിന് വാക്കുനല്കി. ആവശ്യമുള്ളതും ആവശ്യമില്ലാത്തതുമായ നിയമങ്ങള് നമുക്കുണ്ടെന്നും ആവശ്യമില്ലാത്തത് ഒഴിവാക്കിയാല് നീതിനിര്വഹണ പ്രക്രിയയുടെ വേഗത കുറയ്ക്കാന് സാധിക്കുമെന്നും പ്രധാനമന്ത്രി പറഞ്ഞു.
