കിങ്‌സ് ഇലവന്‍ പഞ്ചാബ് 138/8 (20)

മൊഹാലി: ഐപിഎല്ലില്‍ കിങ്‌സ് ഇലവന്‍ പഞ്ചാബിനെതിരെ കൊല്‍ക്കത്ത നൈറ്റ്‌റൈഡേഴ്‌സിന് 139 റണ്‍സ് വിജയലക്ഷ്യം. ടോസ് നഷ്ടപ്പെട്ട് ആദ്യം ബാറ്റ് ചെയ്ത പഞ്ചാബ് 20 ഓവറില്‍ എട്ട് വിക്കറ്റ് നഷ്ടത്തില്‍ 138 റണ്‍സെടുത്തു. കൊല്‍ക്കത്ത ബൗളര്‍മാര്‍ക്കു മുന്നില്‍ പതറിയ കിങ്‌സിനെ ഷോണ്‍ മാര്‍ഷിന്റെ (56 നോട്ടൗട്ട്) ഇന്നിങ്‌സാണ് താങ്ങിനിര്‍ത്തിയത്.

കഴിഞ്ഞ കളിയിലെ വിജയശില്‍പ്പികളായ ഓപ്പണര്‍മാരില്‍ മനന്‍ വോറ (എട്ട്) തുടക്കത്തിലെ മടങ്ങിയത് പഞ്ചാബിന് തിരിച്ചടിയായി.

എന്നാല്‍, സഹ ഓപ്പണര്‍ എം. വിജയ് പ്രതീക്ഷ ഉയര്‍ത്തി. 22 പന്തില്‍ നാലു ഫോറുകളോടെ 26 റണ്‍സെടുത്ത വിജയ്‌യെ പിയൂഷ ചൗള ക്ലീന്‍ ബൗള്‍ഡ് ചെയ്തതോടെ ആതിഥേയരുടെ കഷ്ടകാലം തുടങ്ങി. പിന്നീട് വന്നവരില്‍ പത്താമനായെത്തിയ കെയ്ല്‍ അബോട്ടിനൊഴികെ (12 നോട്ടൗട്ട്) ആര്‍ക്കും രണ്ടക്കം കാണാനായില്ല. അതിനിടയിലും പിടിച്ചു നിന്ന ഷോണ്‍ മാര്‍ഷാണ് ടീം സ്‌കോര്‍ 138ലെത്തിച്ചത്.

41 പന്തില്‍ അഞ്ചു ഫോറും ഒരു സിക്‌സറും പറത്തി മാര്‍ഷ് 56 റണ്‍സെടുത്തത്. ആന്ദ്രെ റസല്‍ എറിഞ്ഞ അവസാന ഓവറില്‍ 18 റണ്‍സ് പിറന്നു. മാര്‍ഷും അബോട്ടും ഓരോ സിക്‌സര്‍ നേടി. രണ്ട് വിക്കറ്റ് വീതമെടുത്ത മോണി മോര്‍ക്കലും സുനില്‍ നരെയ്‌നുമാണ് കൊല്‍ക്കത്ത ബൗളര്‍മാരില്‍ തിളങ്ങിയത്.

സ്‌കോര്‍ബോര്‍ഡ്

കിങ്‌സ് ഇലവന്‍ പഞ്ചാബ്

എം. വിജയ് ബി ചൗള 26, മനന്‍ വോറ സി ഷാക്കിബ് ബി മോര്‍ക്കല്‍ 8, ഷോണ്‍ മാര്‍ഷ് നോട്ടൗട്ട് 56, വൃദ്ധിമാന്‍ സാഹ സി ഉത്തപ്പ ബി നരെയ്ന്‍ 8, ഡേവിഡ് മില്ലര്‍ സി ഉത്തപ്പ ബി പഠാന്‍ 6, ഗ്ലെന്‍ മാക്‌സ്‌വെല്‍ സി ചൗള ബി നരെയ്ന്‍ 4, അക്ഷര്‍ പട്ടേല്‍ സി സുര്യകുമാര്‍ ബി ഉമേഷ് 9, മോഹിത് ശര്‍മ സി ഉത്തപ്പ ബി മോര്‍ക്കല്‍ 1, പ്രദീപ് സാഹു റണ്ണൗട്ട് 1, കെയ്ല്‍ അബോട്ട് നോട്ടൗട്ട് 12, എക്‌സ്ട്രാസ് 7, ആകെ 20 ഓവറില്‍ എട്ടു വിക്കറ്റിന് 138

വിക്കറ്റ് വീഴ്ച: 1-21, 2-47, 3-59, 4-72, 5-94, 6-108, 7-115, 8-118.

ബൗളിങ്: മോണി മോര്‍ക്കല്‍ 4-0-27-2, ഉമേഷ് യാദവ് 3-0-17-1, ഷാക്കിബ് അല്‍ ഹസന്‍ 4-0-28-0, സുനില്‍ നരെയ്ന്‍ 4-0-22-2, പീയുഷ് ചൗള 3-0-18-1, യൂസഫ് പഠാന്‍ 1-0-6-1, ആന്ദ്രെ റസല്‍ 1-0-18-0.