കുട്ടനാട്: പുളിങ്കുന്ന് പഞ്ചായത്തിലെ വിവിധ വാര്ഡുകളില് കുടിവെള്ള ക്ഷാമം അതിരൂക്ഷം. വള്ളങ്ങളില് വെള്ളം എത്തിക്കുന്നതായി പഞ്ചായത്ത് അധികൃതര് അവകാശപ്പെടുമ്പോഴും ബഹുഭൂരിപക്ഷം വാര്ഡുകളിലും ഒരു തുള്ളി പോലും എത്തുന്നില്ലെന്നതാണ് യാഥാര്ത്ഥ്യം.
ഇതില് പ്രതിഷേധിച്ച് ഇന്നലെ വിവിധ വാര്ഡ് മെമ്പര്മാരുടെ നേതൃത്വത്തില് പഞ്ചായത്ത് ഒഫീസില് സമരം നടത്തി. രണ്ടു ദിവസത്തിനുള്ളില് പ്രശ്നം പരിഹരിക്കാമെന്ന ഉറപ്പിലാണ് സമരം അവസാനിപ്പിച്ചത്. ശുദ്ധജലം വിതരണം ചെയ്യാന് ആറു വള്ളങ്ങള് മാത്രമാണ് അനുവദിച്ചിട്ടുള്ളത്. ഒരു വാര്ഡിന് ഒരു വള്ളം എന്നരീതിയില് അനുവദിച്ചാല് മാത്രമെ താല്ക്കാലികമായെങ്കിലും പരിഹാരമാകുകയുള്ളു.
വിവിധ ഇടങ്ങളില് സ്ഥാപിച്ചിട്ടുള്ള കിയോസ്ക്കുകളിലും ഇതുവരെ വെള്ളം എത്തിച്ചിട്ടില്ല. ടാങ്കര് ലോറിക്കാര് കൂടുതല് വാടക ചോദിക്കുന്നതാണ് പ്രശ്നമെന്നാണ് അധികൃതര് പറയുന്നത്. ഈ സാഹചര്യത്തില് ഏസി റോഡ് ഉപരോധിക്കുന്നതടക്കമുള്ള പ്രക്ഷോഭങ്ങള് ആരംഭിക്കുമെന്ന് പഞ്ചായത്തംഗവും ബിജെപി ജില്ലാ ജനറല് സെക്രട്ടറിയുമായ കെ. ജയകുമാര് പറഞ്ഞു.
