സൂര്യോദയത്തിന് കാത്തിരിപ്പ് ;നൈറ്റ് റൈഡേഴ്‌സ് വിജയം എട്ട് വിക്കറ്റിന്

ഹൈദരാബാദ്: തുടര്‍ച്ചയായ രണ്ടാം മത്സരത്തിലും ഹൈദരാബാദില്‍ സൂര്യനുദിച്ചില്ല. ഐപിഎല്ലില്‍ ഇന്നലെ നടന്ന മത്സരത്തില്‍ സണ്‍റൈസേഴ്‌സ് ഹൈദരാബാദ് എട്ട് വിക്കറ്റുകള്‍ക്ക് കൊല്‍ക്കത്ത നൈറ്റ് റൈഡേഴ്‌സിനോട് പരാജയപ്പെട്ടു. ആദ്യം ബാറ്റ് ചെയ്ത സണ്‍റൈസേഴ്‌സ് 20 ഓവറില്‍ 7 വിക്കറ്റ് നഷ്ടത്തില്‍ 142 റണ്‍സെടുത്തു. 51 റണ്‍സെടുത്ത ഇയോണ്‍ മോര്‍ഗനും 37 റണ്‍സെടുത്ത നമന്‍ ഓജയും മാത്രമാണ് മികച്ച ബാറ്റിങ് നടത്തിയത്.

മറുപടി ബാറ്റിങ്ങിനിറങ്ങിയ കൊല്‍ക്കത്ത നൈറ്റ് റൈഡേഴ്‌സ് 10 പന്തുകളും എട്ട് വിക്കറ്റുകളും ബാക്കിനില്‍ക്കേ 146 റണ്‍സെടുത്ത് വിജയം നേടുകയായിരുന്നു. 60 പന്തുകളില്‍ നിന്ന് 13 ഫോറും ഒരു സിക്‌സറുമടക്കം പുറത്താകാതെ 90 റണ്‍സെടുത്ത ക്യാപ്റ്റന്‍ ഗൗതം ഗംഭീറിന്റെ തകര്‍പ്പന്‍ ബാറ്റിങാണ് കൊല്‍ക്കത്ത് അനായാസ വിജയം സമ്മാനിച്ചത്. റോബിന്‍ ഉത്തപ്പ 38 റണ്‍സുമെടുത്തു. കഴിഞ്ഞ മത്സരത്തില്‍ മുംബൈ ഇന്ത്യന്‍സിനോട് പരാജയപ്പെട്ട കൊല്‍ക്കത്തയുടെ ശക്തമായ തിരിച്ചുവരവാണ് ഇന്നലെ കണ്ടത്.

ടോസ് നേടി ബാറ്റിങ് തെരഞ്ഞെടുത്ത സണ്‍റൈസേഴ്‌സിന് കനത്ത തിരിച്ചടിയാണ് തുടക്കം മുതല്‍ ലഭിച്ചത്. സ്‌കോര്‍ബോര്‍ഡില്‍ 50 റണ്‍സായപ്പോഴേക്കും നാല് മുന്‍നിര ബാറ്റ്‌സ്മാന്മാര്‍ കൂടാരം കയറി. ശിഖര്‍ ധവാന്‍ (6), ഡേവിഡ് വാര്‍ണര്‍ (13), ഹെന്റിക്വസ് (6), ദീപക് ഹൂഡ (6) എന്നിവരാണ് പെട്ടെന്ന് മടങ്ങിയത്. ധവാനെ മോര്‍ക്കല്‍ മടക്കിയപ്പോള്‍ രണ്ട്‌പേരെ ഉമേഷ് യാദവും മടക്കി. ഹൂഡയെ പുറത്താക്കിയത് ആന്ദ്രെ റസ്സലും.

അഞ്ചാം വിക്കറ്റില്‍ ഇയോണ്‍ മോര്‍ഗനും നമന്‍ ഓജയും ചേര്‍ന്നതോടെയാണ് സണ്‍റൈസേഴ്‌സ് ഭേദപ്പെട്ട സ്‌കോറിലേക്ക് നീങ്ങിയത്. 67 റണ്‍സ് ഇരുവരും കൂട്ടിച്ചേര്‍ത്തു. സ്‌കോര്‍ 117-ല്‍ എത്തിയപ്പോള്‍ 28 പന്തില്‍ നിന്ന് 37 റണ്‍സെടുത്ത ഓജയെ മോര്‍ക്കലിന്റെ പന്തില്‍ പിയൂഷ് ചൗള പിടികൂടി. സ്‌കോര്‍ 128-ല്‍ എത്തിയപ്പോള്‍ ടോപ് സ്‌കോറര്‍ മോര്‍ഗനും മടങ്ങി. 43 പന്തുകളില്‍ മൂന്ന് ഫോറും രണ്ട് സിക്‌സറുമടക്കം 51 റണ്‍സെടുത്ത മോര്‍ഗനെ ഉമേഷ് യാദവിന്റെ പന്തില്‍ ഷാക്കിബ് അല്‍ ഹസ്സന്‍ പിടികൂടി. തുടര്‍ന്ന് എട്ട് പന്തില്‍ നിന്ന് 13 റണ്‍സെടുത്ത ആശിഷ് റെഡ്ഡിയാണ് സ്‌കോര്‍ 140 കടത്തിയത്. കൊല്‍ക്കത്തക്ക് വേണ്ടി ഉമേഷ് യാദവ് മൂന്നും മോര്‍ക്കല്‍ രണ്ടും വിക്കറ്റുകള്‍ വീഴ്‌ത്തി.

143 റണ്‍സിന്റെ വിജയലക്ഷ്യത്തെ പിന്തുടര്‍ന്ന് മറുപടി ബാറ്റിങ്ങിനിറങ്ങിയ കൊല്‍ക്കത്ത നൈറ്റ് റൈഡേഴ്‌സിന് മികച്ച തുടക്കം ഓപ്പണര്‍മാരായ റോബിന്‍ ഉത്തപ്പയും ഗൗതം ഗംഭീറും ചേര്‍ന്ന് നല്‍കി. 7.5 ഓവറില്‍ 50 റണ്‍സ് പിന്നിട്ടു. 12.3 ഒാവറില്‍ സ്‌കോര്‍ 92-ല്‍ എത്തിയശേഷമാണ് ഇൗ കൂട്ടുകെട്ട് പിരിഞ്ഞത്. 34 പന്തുകളില്‍ നിന്ന് 38 റണ്‍സെടുത്ത റോബിന്‍ ഉത്തപ്പയെ ആശിഷ് റെഡ്ഡി വിക്കറ്റിന് മുന്നില്‍ കുടുക്കി.

ഇതിനിടെ 41 പന്തില്‍ നിന്ന് ക്യാപ്റ്റന്‍ ഗൗതം ഗംഭീര്‍ അര്‍ദ്ധശതകം തികച്ചു. അധികം കഴിയും മുന്നേ രണ്ടാം വിക്കറ്റും വീണു. രണ്ട് റണ്‍സെടുത്ത മുസ്താഫിസൂര്‍ റഹ്മാനെ ആന്ദ്രെ റസ്സല്‍ ബൗള്‍ഡാക്കി. പിന്നീട് മനീഷ് പാണ്ഡെയെ കൂട്ടുപിടിച്ച് ഗംഭീര്‍ ടീമിനെ വിജയത്തിലേക്ക് നയിച്ചു.