കൊല്ക്കത്ത: ഐപിഎല് ഒമ്പതാം പതിപ്പിലെ ആദ്യ മത്സരത്തില് പരാജയപ്പെട്ട നിലവിലെ ചാമ്പ്യന്മാരായ മുംബൈ ഇന്ത്യന്സിന് ഇന്ന് രണ്ടാം അങ്കം. എതിരാളികള് ദല്ഹി ഡെയര് ഡെവിള്സിനെ തകര്ത്തെറിഞ്ഞ് വരുന്ന കൊല്ക്കത്ത നൈറ്റ് റൈഡേഴ്സ്. ഈഡന് ഗാര്ഡന്സില് രാത്രി 8ന് മത്സരം ആരംഭിക്കും. ഇന്ന് ആദ്യ ജയം ലക്ഷ്യമിട്ടാണ് മുംബൈ ഇന്ത്യന്സ് ഇറങ്ങുന്നതെങ്കില് നൈറ്റ് റൈഡേഴ്സ് ലക്ഷ്യം തുടര്ച്ചയായ രണ്ടാം വിജയം.
ഉദ്ഘാടന മത്സരത്തില് നവാഗതരായ റൈസിങ് പൂനെ സൂപ്പര് ജയന്റ്സിനോടാണ് മുംബൈ ഇന്ത്യന്സ് കനത്ത തോല്വി വഴങ്ങിയത്. ഒമ്പത് വിക്കറ്റകള്ക്കായിരുന്നു തോല്വി. മുന്നിര ബാറ്റ്സ്മാന്മാരുടെ നിരുത്തരവാദപരമായ ബാറ്റിങാണ് മുംബൈക്ക് തിരിച്ചടി സമ്മാനിച്ചത്. ലെന്ഡല് സിമണ്സും രോഹിത് ശര്മ്മയും ഹാര്ദിക് പാണ്ഡ്യയും ജോസ് ബട്ട്ലറും പൊള്ളാര്ഡും ശ്രേയസ് ഗോപാലുമെല്ലാം രണ്ടക്കം കടക്കാതെ പുറത്തായതാണ് കനത്ത തിരിച്ചടിയായത്.
30 പന്തില് നിന്ന് 45 റണ്സെടുത്ത് പുറത്താകാതെ നിന്ന ഹര്ഭജനും 22 റണ്സെടുത്ത അമ്പാട്ടി റായിഡുവും 12 റണ്സെടുത്ത വിനയ്കുമാറും മാത്രമാണ് ഈ മത്സരത്തില് രണ്ടക്കം കടന്ന മുംബൈ ബാറ്റ്സ്മാന്മാര്. മത്സരശേഷം ഹര്ഭജന് ടീം അംഗങ്ങള്ക്കെതിരെ രംഗത്തുവരികയും ചെയ്തിരുന്നു. അനാവശ്യധൃതിയും ഷോട്ടുകള് കളിക്കുന്നതില് പാളിച്ച പറ്റിയതുമാണ് തോല്വിക്ക് കാരണമെന്ന് ഹര്ഭജന് പറഞ്ഞിരുന്നു.
ഈ കളിയില് ബൗളര്മാരും തിളങ്ങിയില്ല. പൂനെയുടെ ഏക വിക്കറ്റ് വീഴ്ത്തിയതും ഹര്ഭജന് തന്നെ. മക്ലനാഗന്, ജസ്പ്രീത് ബുംമ്റ, വിനയ്കുമാര്, ഹാര്ദിക് പാണ്ഡ്യ തുടങ്ങിയവരെല്ലാം നിര്ലോഭം റണ് വഴങ്ങുകയും ചെയ്തതോടെ മുംബൈ ഇന്ത്യന്സിന് തോല്വി വഴങ്ങുകയല്ലാതെ വേറെ നിവൃത്തിയുണ്ടായില്ല. മുന്നിര ബാറ്റ്സ്മാന്മാര് അവസരത്തിനൊത്തുയര്ന്നില്ലെങ്കില് ഇന്നും ഇന്ത്യന്സിന് തിരിച്ചടി ഉറപ്പ്.
ദല്ഹി ഡെയര് ഡെവിള്സിനെ ഒമ്പത് വിക്കറ്റിന് തകര്ത്തതിന്റെ ആത്മവിശ്വാസത്തിലാണ് നൈറ്റ് റൈഡേഴ്സ് തുടര്ച്ചയായ രണ്ടാം മത്സരത്തിന് ഈഡന് ഗാര്ഡിനില് ഇറങ്ങുന്നത്. ഡെയര് ഡെവിള്സിനെതിരായ കളിയില് ബൗളര്മാരും ബാറ്റ്സ്മാന്മാരും മികച്ച ഫോമിലായിരുന്നു. മികച്ച രീതിയില് പന്തെറിഞ്ഞ ആന്ദ്രെ റസ്സലിന്റെയും ബ്രാഡ് ഹോഗിന്റെയും ഹേസ്റ്റിങ്സിന്റെയും പിയൂഷ് ചൗളയുടെയും തകര്പ്പന് ബൗളിങിന്റെ കരുത്തില് ഡെയര് ഡെവിള്സിനെ വെറും 98 റണ്സിലൊതുക്കിയ നൈറ്റ് റൈഡേഴ്സ് 14.1 ഓവറില് ഒരു വിക്കറ്റ് മാത്രം
നഷ്ടപ്പെടുത്തിയായിരുന്നു വിജയം നേടിയത്. ക്യാപ്റ്റന് ഗൗതം ഗംഭീറും ഓപ്പണറായ റോബിന് ഉത്തപ്പയും ആദ്യ മത്സരത്തില് തന്നെ ഫോമിലേക്കുയര്ന്നത് ഇന്നും കൊല്ക്കത്തയുടെ ആത്മവിശ്വാസം വര്ദ്ധിപ്പിക്കും. നൈറ്റ് റൈഡേഴ്സിന്റെ ഹോം ഗ്രൗണ്ടിലാണ് മത്സരങ്ങള് എന്നതും അവരുടെ ആത്മവിശ്വാസം ഉയര്ത്തും.
