ലാസ് വെഗാസ്: കരിയറിലെ അവസാന മത്സരത്തില് ജയം കണ്ട് ബോക്സിങ് റിങ്ങിലെ കരിയര് അവസാനിപ്പിച്ചു ഫിലിപ്പൈന്സിന്റെ മുന് പ്രൊഫഷണല് ചാമ്പ്യന് മാനി പാക്വിയാവോ. യുഎസിന്റെ തിമോത്തി ബ്രാഡ്ലിയെ ഒമ്പത് റൗണ്ട് നീണ്ട മത്സരത്തില് കീഴടക്കിയാണ് പാക്വിയാവോ കരിയറിനോട് വിടചൊല്ലിയത്. 2012ല് ബ്രാഡ്ലിയോട് തോറ്റതിന് മറുപടി കൂടിയായി ശനിയാഴ്ചത്തെ മത്സരഫലം. കഴിഞ്ഞ മേയില് ഫ്ളോയിഡ് മെയ് വെതറിനോട് തോറ്റ ശേഷം ആദ്യമായാണ് പാക്വിയാവോ കളത്തിലിറങ്ങുന്നത്.
ഒപ്പത്തിനൊപ്പം പോരാട്ടം കണ്ട മത്സരത്തില് 116-110നാണ് പാക്വിയാവോ ജയിച്ചു കയറിയത്. മൂന്നു ജഡ്ജിമാരും ഇദ്ദേഹത്തിന് അനുകൂലമായി വിധിയെഴുതി. ഏഴ്, ഒമ്പത് റൗണ്ടുകളില് എതിരാളിയെ നോക്കൗട്ടും ചെയ്തു ഫിലിപ്പൈന് താരം. ഈ മത്സരത്തോടെ വിരമിക്കുമെന്ന് കുടുംബത്തിന് വാക്കു നല്കിയിരുന്നുവെന്നും ജയത്തോടെ അവസാനിപ്പിക്കാനായത് ഏറെ സന്തോഷം നല്കുന്നുവെന്നും പാക്വിയാവോ പറഞ്ഞു.
ഇനി വിരമിക്കല് ജീവിതം ആസ്വദിക്കും. ജനങ്ങളെ സേവിച്ച്, അവരെ സഹായിച്ച് മുന്നോട്ടു പോകും- ഫിലിപ്പൈന്സ് രാഷ്ട്രീയത്തിലേക്കിറങ്ങുമെന്നു സൂചന നല്കി പാക്വിയാവോ പറഞ്ഞു.
