കൊല്ലം: അഴിമതിയുടെയും അക്രമരാഷ്ട്രീയത്തിന്റെയും വക്താക്കളായ ഇടതുലതുമുന്നണികളെ തുറന്നുകാട്ടിയ കേന്ദ്രമന്ത്രിയുടെ പ്രസംഗം പ്രവര്ത്തകര് ആവേശപൂര്വം വരവേറ്റു. ആനന്ദവല്ലീശ്വരം എന്എസ്എസ് ഹാളില് നിറഞ്ഞുകവിഞ്ഞ പ്രവര്ത്തകര് ഹര്ഷാരവത്തോടെയാണ് നദ്ദയെ ശ്രവിച്ചത്.
എന്ഡിഎ ജില്ലാ തെരഞ്ഞെടുപ്പ് കണ്വന്ഷന് ഉദ്ഘാടനം ചെയ്തുകൊണ്ട് സംസാരിച്ച കേന്ദ്രമന്ത്രി ജെ.പി.നദ്ദ അഴിമതിക്കാരായ കോണ്ഗ്രസിന്റെ തൊലിയുരിച്ചു. മന്മോഹന്സിംഗ് നേതൃത്വം നല്കിയ യുപിഎ സര്ക്കാര് പത്ത് വര്ഷം രാജ്യം കട്ടുമുടിച്ചതിന്റെ കഥകള് വിശദീകരിച്ചായിരുന്നു അദ്ദേഹം തുടങ്ങിവച്ചത്. മുട്ടിലിഴയുന്ന നേതൃത്വമായിരുന്നു യുപിഎ കാലത്ത് ലോകം കണ്ടത്. നാണയപ്പെരുപ്പം 11 ശതമാനത്തിലേക്ക് കൂപ്പുകുത്തി. ജിഡിപിയും തകര്ച്ചയിലായി. വെറും രണ്ട് വര്ഷത്തെ മോദിഭരണത്തില് നാണയപ്പെരുപ്പം അഞ്ചുശതമാനമാക്കി. ജിഡിപി വളര്ച്ചയുടെ പാതയിലാണ്. ലോകരാഷ്ട്രങ്ങള് എല്ലാം തന്നെ തങ്ങള്ക്ക് നേതൃത്വം നല്കാന് പോകുന്നത് ഭാരതമാണെന്ന് പ്രതീക്ഷിക്കുന്നു. അപ്പോഴും അസഹിഷ്ണുതയുടെ വക്താക്കളായി മോദിയെ എതിര്ക്കുന്നവര് മാറുകയാണ്. സ്വതന്ത്രഭാരതത്തില് ഇതുവരെ മൂന്നുകോടി പേര്ക്ക് മാത്രമാണ് ബാങ്ക് അക്കൗണ്ട് ഉണ്ടായിരുന്നത്. പ്രധാനമന്ത്രിയുടെ ജന്ധന് യോജനയിലൂടെ 21 കോടി പേര്ക്ക് അക്കൗണ്ട് തുറന്നു. രാഷ്ട്രനിര്മാണത്തിനായി 33000 കോടി രൂപയാണ് ഇതുവഴി സമാഹരിച്ചത്. ഇന്ഷ്വറന്സ് പരിരക്ഷ, കര്ഷകര്ക്കായി ഫസല് ബീമാ യോജന, സുകന്യ പദ്ധതി തുടങ്ങി നിരവധി ജനക്ഷേമപദ്ധതികള് മോദിസര്ക്കാര് നടപ്പാക്കിയെന്നും അദ്ദേഹം ചൂണ്ടിക്കാട്ടി. കേരളസര്ക്കാരിന്റെ ജനദ്രോഹങ്ങളും അഴിമതികളും ഒന്നൊന്നായി ജെഎസ്എസ് നേതാവ് രാജന്ബാബു വിവരിച്ചപ്പോള് കമ്യൂണിസ്റ്റ് പാര്ട്ടികള് അണികളെ വഞ്ചിക്കുന്നതിലേക്കായിരുന്നു ബിഡിജെഎസ് നേതാവ് സിനില്മുണ്ടപ്പള്ളി പ്രവര്ത്തകരുടെ ശ്രദ്ധ ക്ഷണിച്ചത്.
സര്ക്കാരിന്റെ വികസനപദ്ധതികള് നടപ്പിലാക്കുന്നതില് അഴിമതിയുടെ കാണാച്ചരട് എപ്പോഴുമുണ്ടായിരുന്നതായി രാജന്ബാബു ചൂണ്ടിക്കാട്ടി. ചരിത്രം കുറിക്കുന്ന ഈ തെരഞ്ഞെടുപ്പില് എന്ഡിഎക്ക് മികച്ച വിജയം നേടാനാകുമെന്നും അദ്ദേഹം പറഞ്ഞു. സാമൂഹ്യനീതി നടപ്പാക്കാത്തവര് ഭരണഘടനയുടെ പ്രാഥമികതത്വങ്ങളില് നിന്നുതന്നെ വ്യതിചലിച്ചു. ഇരുമുന്നണികളും ജനവഞ്ചകരാണ്. മൂല്യാധിഷ്ടിത രാഷ്ട്രീയം എന്നത് എന്ഡിഎക്ക് മാത്രമെ ഇനി അവകാശപ്പെടാനാകുവെന്നും രാജന്ബാബു പറഞ്ഞു.
കുംഭകോണങ്ങളുടെ കുംഭമേളയാണ് ഉമ്മന്ചാണ്ടി സര്ക്കാര് നടത്തിയതെന്ന് സിനില് മുണ്ടപ്പള്ളി പറഞ്ഞു. ചക്കിട്ടപ്പാറയില് സ്വന്തക്കാര്ക്ക് സര്ക്കാര്ഭൂമി എഴുതിനല്കി എല്ഡിഎഫ് നടത്തിയ അഴിമതിയും നാട് മറന്നിട്ടില്ല. വിദ്യാഭ്യാസരംഗത്ത് പച്ചവല്ക്കരണമാണ്. ദേശവിരുദ്ധശക്തികള്ക്ക് ഓശാന പാടുന്ന പാര്ട്ടിയായി സിപിഎം മാറിയതായും അദ്ദേഹം പറഞ്ഞു
