വിളപ്പില്: പ്ലാസ്റ്റിക് ഷീറ്റ് കെട്ടിമറച്ച ഒറ്റമുറി കുടിലിനു മുന്നില് പി.കെ. കൃഷ്ണദാസ് എത്തിയപ്പോള് അത് വോട്ടു തേടിയുള്ള വരവാണെന്ന് ഷീജ കരുതി. എന്നാല് ആ നിര്ധന കുടുംബത്തിന്റെ പ്രതീക്ഷകളെ തെറ്റിച്ചുകൊണ്ട് കൃഷ്ണദാസ് അവിടെ ഒരു സ്നേഹക്കൂടിന് ആദ്യശിലപാകി. ഷീജയ്ക്കും കുടുംബത്തിനും അന്തിയുറങ്ങാന് ബിജെപി കിള്ളി വാര്ഡ് കമ്മറ്റി നിര്മ്മിച്ചു നല്കുന്ന വീടിന്റെ ശിലാസ്ഥാപനമായിരുന്നു അത്.
തെരഞ്ഞെടുപ്പ് വേളയില് വാഗ്ദാനങ്ങള് നല്കി പോകുന്ന രാഷ്ട്രീയക്കാരുടെ പതിവ് രീതികള്ക്ക് വിപരീതമായി ബിജെപി സ്ഥാനാര്ഥി ഒരു കുടുംബത്തിന്റെ കണ്ണീരൊപ്പുന്ന വാര്ത്ത കേട്ട് അയല്ക്കാര് അവിടേക്ക് പാഞ്ഞെത്തി. കണ്മുന്നിലെ നന്മ കണ്ടറിഞ്ഞ് നാട്ടുകാര് കൃഷ്ണദാസിന് ജയഭേരി മുഴക്കി.
കാട്ടാക്കട കിള്ളി കുഴിവിളാകത്ത് വീട്ടില് ഹോട്ടല് തൊഴിലാളിയായ സന്തോഷ്(41), ഭാര്യ ഷീജ (34), മക്കളായ രേവതി (14), പാര്വതി (12), അശ്വതി (11) എന്നിവര് ഈ നിലംപൊത്താറായ കുടിലിലാണ് അന്തിയുറങ്ങുന്നത്. അടുത്തിടെ ഷീജയുടെ കിടപ്പുരോഗികളായ അമ്മ ആനന്ദവല്ലി (68)യെയും അമ്മൂമ്മ ദേവകി (90)യെയും മറ്റ് മക്കള് സംരക്ഷിക്കാനാവില്ലെന്ന് പറഞ്ഞ് ഈ കുടിലില് ഉപേക്ഷിച്ച് മടങ്ങി. അതോ
ഷീജയ്ക്കും കുടുംബത്തിനും ബിജെപി പ്രവര്ത്തകര് നിര്മിച്ചു നല്കുന്ന വീടിന്റെ ശിലാസ്ഥാപനം
പി.കെ. കൃഷ്ണദാസ് നിര്വഹിക്കുന്നു
ടെ നിന്നു തിരിയാന് ഇടമില്ലാത്ത ഇവരുടെ മണ്കുടിലില് രണ്ട് വൃദ്ധമാതാക്കള്ക്കു കൂടി കിടക്കയൊരുക്കേണ്ടി വന്നു. ഇല്ലായ്മകള്ക്ക് നടുവിലും ഇവരെയും പോറ്റേണ്ട ബാധ്യത ഈ സാധുക്കള്ക്കായി. സന്തോഷിന്റെ തുച്ഛമായ വരുമാനത്തിലാണ് അമ്മമാരുടെ ചികിത്സ, മക്കളുടെ പഠനം ഇവയൊക്കെ നടക്കേണ്ടത്. ഇതിനിടെ മേല്ക്കൂരയില് വെയിലും മഴയുമേല്ക്കാതിരിക്കാന് വിരിച്ചിട്ട പ്ലാസ്റ്റിക് ഷീറ്റ് വിണ്ടുകീറിയിട്ടും മാറ്റാന് ഇവര്ക്ക് സാധിക്കുന്നില്ല. ദിവസങ്ങളോളം പട്ടിണികിടക്കേണ്ട ഗതികേട് പലപ്പോഴും ഇവരെ തേടിയെത്താറുണ്ട്. ഏഴുപേര്ക്ക് ഒന്നിച്ചുറങ്ങാന് കഴിയാത്തതിനാല് പല രാത്രികളും സന്തോഷും ഷീജയും ഇരുന്നാണ് നേരം വെളുപ്പിക്കാറ്. പഞ്ചായത്ത് അധികൃതരോട് തങ്ങളുടെ അവസ്ഥ പലയാവര്ത്തി ഷീജ പറഞ്ഞെങ്കിലും അനാഥാലയത്തിലേക്കുള്ള വഴി ചൂണ്ടികാണിക്കുകയാണ് അവര് ചെയ്തത്.
ഇവരുടെ ദുരിതകഥ ബിജെപി പ്രവര്ത്തകര് കൃഷ്ണദാസിനോട് കഴിഞ്ഞദിവസം വിവരിച്ചു. തെരഞ്ഞെടുപ്പ് പ്രവര്ത്തനത്തെക്കാള് നമുക്ക് വലുത് ആ കുടുംബത്തിന്റെ കണ്ണീരൊപ്പാന് കഴിയുന്നതാണെന്ന് കൃഷ്ണദാസ് പ്രവര്ത്തകരെ ഉപദേശിച്ചു. പിന്നെ വൈകിയില്ല. ബിജെപി കിള്ളി വാര്ഡ് കമ്മറ്റിയും കാട്ടാക്കട പഞ്ചായത്ത് കമ്മിറ്റിയും ചേര്ന്ന് ഷീജയ്ക്കും കുടുംബത്തിനും വേണ്ടി ഒരു വീട് നിര്മിച്ചു നല്കാന് തീരുമാനിക്കുകയായിരുന്നു. രണ്ട് മാസത്തിനുള്ളില് വീട് നിര്മാണം പൂര്ത്തിയാക്കാന് കഴിയുമെന്ന് പ്രവര്ത്തകര് പറയുന്നു. അതിനായി കൈമെയ് മറന്ന് പ്രവര്ത്തകര് ശ്രമദാനത്തിലാണ്. നാട്ടുകാരും ബിജെപിയുടെ സേവന യജ്ഞത്തില് പങ്കാളികളാകുന്നു. തെരഞ്ഞെടുപ്പ് ഫലം എന്തായാലും അത് പുറത്തുവരുമ്പോള് ഈ സ്നേഹക്കൂടിന്റെ താക്കോല് ഷീജയുടെ കുടുംബത്തിന് പി.കെ. കൃഷ്ണദാസിനെ കൊണ്ട് സമ്മാനിക്കുമെന്ന ദൃഢ പ്രതിജ്ഞയിലാണ് ബിജെപി പ്രവര്ത്തകര്.
