മുംബൈ: ഫൈനല് ലക്ഷ്യമിട്ട് ടീം മുന് ലോകചാമ്പ്യന്മാരായ ടീം ഇന്ത്യയും വെസ്റ്റിന്ഡീസും ഇന്ന് മുഖാമുഖം. വാങ്കഡെ സ്റ്റേഡിയത്തില് ഇന്ന് രാത്രി 7.30ന് മത്സരം ആരംഭിക്കും.
സൂപ്പര് പത്തിലെ ആദ്യ മത്സരത്തില് ന്യൂസിലാന്ഡിനോട് പരാജയപ്പെട്ട് തുടങ്ങിയ ഇന്ത്യ നിര്ണായകമായ അവസാന മത്സരത്തില് ഒാസ്ട്രേലിയയെ കെട്ടുകെട്ടിച്ചാണ് സെമിയിലേക്ക് യോഗ്യത നേടിയത്. വിരാട് കോഹ്ലിയുടെ ഒറ്റയാന് പോരാട്ടമാണ് ഇന്ത്യയെ വിജയത്തിലേക്കും സെമിയിലേക്കും നയിച്ചത്.
കോഹ്ലിയെയും ധോണിയെയും ഒഴിച്ചുനിര്ത്തിയാല് മുന്നിര താരങ്ങളായ രോഹിത് ശര്മ്മ, ശിഖര് ധവാന്, സുരേഷ് റെയ്ന എന്നിവര് ഏറെ നിരാശയാണ് കഴിഞ്ഞ കളികളില് സമ്മാനിച്ചത്. ഗ്രൂപ്പില് പാക്കിസ്ഥാനെതിരെ ആധികാരി വിജയം നേടിയെങ്കിലും ബംഗ്ലാദേശിനെതിരെ നിരങ്ങിയാണ് വിജയിച്ചത്. ബാറ്റ്സ്മാന്മാര് അവസരത്തിനൊത്തുയരാത്തതാണ് ഇന്ത്യയെ അലട്ടുന്ന പ്രശ്നം.
കോഹ്ലിക്കൊപ്പം വിക്കറ്റിന് മുന്നിലും പിന്നിലും മികച്ച പ്രകടനവുമായി നില്ക്കുന്ന ക്യാപ്റ്റന് കൂള് ധോണി സൂപ്പര് തന്ത്രങ്ങളുമായി കളം നിറയുന്നു. എന്നാല് യുവരാജിന്റെ അസാന്നിധ്യം ഇന്ത്യന് നിരയില് ചെറിയതെങ്കിലും വിള്ളലുണ്ടാക്കുമെന്ന് ഉറപ്പ്. യുവരാജിന് പകരം മനീഷ് പാണ്ഡെ ടീമില് ഇടംപിടിച്ചിട്ടുണ്ട്. മനീഷ് പാണ്ഡെയോ അജിന്ക്യ രഹാനെയോ ആയിരിക്കും ഇന്ന് യുവിക്ക് പകരമായി കളത്തിലിറങ്ങുക.
ഇന്ത്യന് ടീമില് സ്ഥിരാംഗമായ അജിന്ക്യ രഹാനെയ്ക്ക് ടൂര്ണമെന്റില് ഇതുവരെ കളിക്കാനായിട്ടില്ല. യുവരാജിന് പകരക്കാരനായി മധ്യനിരയില് രഹാനെ എത്താനാണ് കൂടുതല് സാധ്യത. ബൗളര്മാരുടെ മികച്ച പ്രകടനവും ധോണിക്ക് ഏറെ ആശ്വാസം പകരുന്നു. 37-ാം വയസ്സിലും തകര്പ്പന് ബൗളിങ് നടത്തുന്ന ആശിഷ് നെഹ്റയുടെ സാന്നിധ്യം യുവ താരങ്ങള്ക്ക് ഏറെ പ്രചോദനം ചെയ്യുന്നു. ഹാര്ദിക് പാണ്ഡ്യ, ജസ്പ്രീത് ബുംമ്റ, അശ്വിന്, രവീന്ദ്ര ജഡേജ എന്നിവരുടെ പ്രകടനം. ലോകകപ്പിന് മുന്നോടിയായി നടന്ന സന്നാഹ മത്സരത്തില് വിന്ഡീസിനെ പരാജയപ്പെടുത്താന് കഴിഞ്ഞതിന്റെ ആത്മവിശ്വാസവും ഇന്ത്യക്ക് മുതല്ക്കൂട്ട്.
മറുവശത്ത് ക്രിസ് ഗെയ്ല് എന്ന സൂപ്പര് താരത്തെ ആശ്രയിച്ചാണ് വിന്ഡീസിന്റെ കുതിപ്പ്. സൂപ്പര് പത്തിലെ ആദ്യ മത്സരത്തില് ഇംഗ്ലണ്ടിനെതിരെ സെഞ്ചുറിനേടി മികവു തെളിയിച്ചതാണ് ഗെയ്ല്. പലപ്പോഴും സ്ഥിരത പുലര്ത്താന് കഴിയാത്ത താരമാണ് ഗെയ്ല്. സൗത്ത് ആഫ്രിക്കക്കെതിരെ ഗെയ്ല് നാല് റണ്സെടുത്ത് പുറത്തായി. അതേസമയം ഫഌച്ചറിന് പരിക്കേറ്റതും വിന്ഡീസിന് തിരിച്ചടിയാണ്. സൂപ്പര് പത്തിലെ അവസാന മത്സരത്തില് അഫ്ഗാനിസ്ഥാനെതിരെ കളിക്കുമ്പോഴായിരുന്നു ഫഌച്ചറിന് പരിക്കേറ്റത്.
പരുക്ക് സാരമുള്ളതായതിനാല് താരം നാട്ടിലേക്ക്് തിരികെ പോയി. പകരം സിമണ്സിനെ ടീമിലെടുക്കുകയുമായിരുന്നു. ശ്രീലങ്കയ്ക്കെതിരേയുള്ള സൂപ്പര് ടെന് മത്സരത്തില് ഓപ്പണറായിറങ്ങി 84 റണ്സ് അടിച്ചുകൂട്ടി മാന് ഓഫ് ദ മാച്ച് പ്രകടനത്തോടെ ഫ്ളെച്ചര് ടീമിനെ വിജയത്തിലേക്ക് നയിച്ചിരുന്നു. ഫഌച്ചറിന് പകരമായി ലെന്ഡല് സിമണ്സിനെ ടീമില് ഉള്പ്പെടുത്തിയിട്ടുണ്ട്. സിമണ്സ് ഇന്ന് ഇന്ത്യക്കെതിരെ കളിക്കാനിറങ്ങും.
മികച്ച ചില താരങ്ങളാണ് ടീമിലുള്ളത്. ജോണ്സണ് ചാള്സ്, മര്ലോണ് സാമവുല്സ്, ഓള് റൗണ്ടര് ഡ്വെയ്ന് ബ്രാവോ, ക്യാപ്റ്റന് ഡാരന് സമി, ആന്ദ്രെ റസ്സല് എന്നിവരിലാണ് ബാറ്റിങ്ങില് വിന്ഡീസിന്റെ പ്രതീക്ഷകള് മുഴുവന്. ജെറോം ടെയ്ലര്, സാമുവല് ബദ്രി, റസ്സല്, സുലൈമാന് ബെന്, ബ്രാത്ത്വെയ്റ്റ് എന്നിവരാണ് ബൗളിംഗ് നിയന്ത്രിക്കുക.
ഇന്ത്യന് നിരയില് വിരാട് കോഹ്ലിയെ പിടിച്ചുകെട്ടുക എന്നതായിരിക്കും വിന്ഡീസ് ബൗളര്മാരുടെ പ്രധാന വെല്ലുവിളി. വിന്ഡീസിനെതിരായ അഞ്ചാം ട്വന്റിയാണ് ഇന്ന് നടക്കുന്നത്. മുന്പ് നടന്ന നാലില് ഇരുടീമുകളും രണ്ടെണ്ണം വീതം ജയിച്ചു.
തുടര്ച്ചയായ രണ്ടാം ഫൈനല് ലക്ഷ്യമിട്ട് ഇന്ത്യയും 2012ലെ ചാമ്പ്യന്മാരായ വിന്ഡീസും ഇന്ന് കളത്തിലിറങ്ങുമ്പോള് പ്രവചനം അസാധ്യം. എങ്കിലും സ്വന്തം ആരാധകരുടെ പിന്തുണയോടെ ഇറങ്ങുന്ന ഇന്ത്യക്ക് തന്നെ മുന്തൂക്കം.
