കെയ്റോ: ബെല്റ്റു ബോംബ് ധരിച്ചിട്ടുണ്ടെന്നു പറഞ്ഞ് വെറ്ററിനറി പ്രൊഫസര് ഇൗജിപ്ഷ്യന് വിമാനം തട്ടിയെടുത്ത് സൈപ്രസില് ഇറക്കി. സന്ധിസംഭാഷണങ്ങള്ക്കൊടുവില് മുഴുവന് യാത്രക്കാരെയും മോചിപ്പിച്ചു. അക്രമിയെ അറസ്റ്റു ചെയ്തു. ഇയാള് മനോരോഗിയാണെന്ന് സംശയിക്കുന്നു. ഇയാള് ബെല്റ്റു ബോംബ് ധരിച്ചിരുന്നുവെന്നു പറഞ്ഞതു പോലും കളവായിരുന്നുവെന്നാണ് സംശയം.
രാവിലെ എട്ടു മണിയോടെയാണ് നാടകീയ സംഭവ വികാസങ്ങള്ക്ക് തുടക്കം. അലക്സാണ്ട്രിയയില് നിന്ന് ഈജിപ്ഷ്യന് തലസ്ഥാനമായ കെയ്റോയിലേക്ക് പോകുകയായിരുന്ന, 81 പേര് കയറിയ വിമാനം , സ്ഫോടകവസ്തുക്കള് നിറച്ച ബെല്റ്റ് ബോംബ് ധരിച്ചിട്ടുണ്ടെന്നു പറഞ്ഞ് ഈജിപ്ഷ്യന് പൗരന് ഇബ്രാഹിം അബ്ദേല് എന്നയാളാണ് റാഞ്ചിയത്. ബോംബുകള് പൊട്ടിച്ച് വിമാനം തകര്ക്കുമെന്ന് ഇയാള് ഭീഷണിപ്പെടുത്തി. പിന്നീട് എയര്ബസ് 320 വിമാനം സൈപ്രസില് ഇറക്കി. മണിക്കൂറുകള് നീണ്ട ചര്ച്ചകള്ക്ക് ഒടുവില് ഉച്ചയ്ക്ക് രണ്ടരയോടെ ഇബ്രാഹിം 21 വിദേശികളും 15വിമാനജോലിക്കാരും ഒഴികെയുള്ള 45 യാത്രക്കാരെ വിട്ടയച്ചു. ഏതാനും മണിക്കൂറുകള് കഴിഞ്ഞ് വിദേശികള് അടക്കം 36 പേരെയും വിട്ടയച്ചു. അതിനു ശേഷം പോലീസിന് കീഴടങ്ങിയ ഇയാളെ അറസ്റ്റു ചെയ്തു.
അക്രമി ഭീകരനാണെന്നാണ് ആദ്യം ധരിച്ചിരുന്നതെങ്കിലും അലക്സാണ്ട്രിയ യൂണിവേഴ്സിറ്റിയിലെ വെറ്ററിനറി പ്രൊഫസറായ ഇയാള് മനോരോഗിയാണെന്ന് കരുതുന്നു.
താനുമായി അകന്നു കഴിയുന്ന, സൈപ്രസ് സ്വദേശിനിയായ ഭാര്യയെ കാണാന് അനുവദിക്കണമെന്നായിരുന്നു ഇബ്രാഹിം അബ്ദേല് തവാബ് സമാഹയുടെ ആവശ്യം. സൈപ്രസിലെ ലാര്നാക്കാ വിമാനത്താവളത്തിനു സമീപം ഓറോകഌനിയെന്ന ഗ്രാമത്തിലാണ് ഇവര് താമസിക്കുന്നത്. തന്റെ ആവശ്യം എഴുതിയ കത്ത് ഇയാള് എറിഞ്ഞു നല്കുകയായിരുന്നു. കത്ത് മുന്ഭാര്യയ്ക്ക് നല്കണമെന്നും ഇയാള് ആവശ്യപ്പെട്ടു. ഈജിപ്തിലെ സ്ത്രീ തടവുകാരെ വിട്ടയക്കണമെന്ന് ഇയാള് ആവശ്യപ്പെട്ടതായും ഇയാള് രാഷ്ട്രീയ അഭയം തേടിയതായും പറയപ്പെടുന്നു. എന്നാല് ഇയാളുടെ ആവശ്യങ്ങളില് ദുരൂഹത തുടരുകയാണ്. എന്താണ് വിമാനം റാഞ്ചാനുള്ള കാരണമെന്ന് ഇപ്പോഴും വ്യക്തമല്ല.
വിമാനം സൈപ്രസില് എത്തി കുറച്ചു കഴിഞ്ഞ് 11 പേരെ ഒഴിച്ച് മറ്റുള്ളവരെയെല്ലാം മോചിപ്പിച്ച ഇയാള്, ആവശ്യങ്ങള് സാധിച്ചു നല്കാമെന്ന് വ്യക്തമാക്കിയിട്ടും 36 പേരെ വിട്ടയച്ചിരുന്നില്ല. ചര്ച്ചകള് തുടര്ന്നതോടെ കുറച്ചു നേരം കൂടിക്കഴിഞ്ഞ് പലരും വിമാനത്തില് നിന്ന് ഇറങ്ങിവരുന്ന ദൃശ്യങ്ങളാണ് കണ്ടത്. അല്പ്പം കഴിഞ്ഞ് വിമാനത്തിന്റെ കോക്ക്പിറ്റ് ജനാല വഴി ഇറങ്ങിവന്ന് ഇയാള് കീഴടങ്ങുകയായിരുന്നു.
ബെല്റ്റ് ബോംബ് ധരിച്ച ഇബ്രാഹിം കോക്പിറ്റില് കടന്നുചെന്ന് ബോംബു പൊട്ടിക്കുമെന്ന് തന്നെ ഭീഷണിപ്പെടുത്തി വിമാനം റാഞ്ചുകയായിരുന്നുവെന്ന് പൈലറ്റ് ഒമര് അല് ഗമ്മാല് പറഞ്ഞു. ഇയാള് ധരിച്ചിരുന്ന വെള്ള ബെല്റ്റ് വീര്ത്തിരുന്നു. അതില് നിന്ന് വയറുകള് പുറത്തേക്ക് തള്ളി നില്പ്പുണ്ടായിരുന്നു.ഇതിനപ്പുറം അതില് സ്ഫോടകവസ്തുക്കള് ഒന്നും ഉണ്ടായിരുന്നില്ലെന്നാണ് ആദ്യസൂചന.
