ന്യൂദല്ഹി: ട്വന്റി20 ലോകകപ്പില് ജയത്തോടെ ദക്ഷിണാഫ്രിക്ക മടങ്ങി. ഗ്രൂപ്പ് ഒന്നിലെ അവസാന മത്സരത്തില് എട്ടു വിക്കറ്റ് ജയത്തോടെയാണ് ദക്ഷിണാഫ്രിക്ക ലോകകപ്പ് ക്യാംപെയ്ന് അവസാനിപ്പിച്ചത്. ആദ്യം ബാറ്റ് ചെയ്ത ശ്രീലങ്ക 19.3 ഓവറില് 120 റണ്സിനു പുറത്തായപ്പോള്, ദക്ഷിണാഫ്രിക്ക 17.4 ഓവറില് രണ്ട് വിക്കറ്റ് നഷ്ടത്തില് 122 റണ്സെടുത്ത് ലക്ഷ്യം പൂര്ത്തിയാക്കി.
ദക്ഷിണാഫ്രിക്കന് ബൗളര്മാര്ക്കു മുന്നില് കളി മറന്ന ലങ്കന് ബാറ്റ്സ്മാന്മാരില് ടോപ് സ്കോറര് ഓപ്പണര് തിലകരത്നെ ദില്ഷന് (36). മറുപടിയില് ഓപ്പണര് ഹാഷിം അംലയുടെ പ്രകടനം ദക്ഷിണാഫ്രിക്കന് ജയം അനായാസമാക്കി. 52 പന്തില് അഞ്ച് ഫോറും ഒരു സിക്സറും സഹിതം പുറത്താകാതെ 56 റണ്സെടുത്തു അംല. ഹാഫെ ഡ്യുപ്ലെസിസ് (31), എ.ബി. ഡിവില്ലേഴ്സ് (20 നോട്ടൗട്ട്) എന്നിവരും അംലയ്ക്ക് പിന്തുണ നല്കി.
