ന്യൂദല്ഹി: പത്താന്കോട്ട് ഭീകരാക്രമണം അന്വേഷിക്കുന്ന പാക് അന്വേഷണ സംഘം ഇന്ന് ഭാരതത്തിലെത്തും. തിങ്കളാഴ്ച എന്ഐഎ ഉദ്യോഗസ്ഥരുമായി കൂടിക്കാഴ്ച നടത്തുന്ന അഞ്ചംഗ സംഘം ചൊവ്വാഴ്ചയാകും പത്താന്കോട്ട് വ്യോമത്താവളത്തിലെത്തി തെളിവെടുക്കുക.
അന്വേഷണവുമായി ബന്ധപ്പെട്ട് ഗുരുദാസ്പൂര് എസ്പി സല്വീന്ദര് സിംഗ് അടക്കമുള്ള സുരക്ഷ ഉദ്യോഗസ്ഥരെ ചോദ്യം ചെയ്യും.അതേസമയം പത്താന്കോട്ട് വ്യോമതാവളത്തില് പ്രവേശിക്കാന് സംഘത്തിന് ഉപാധികളോടെയാണ് അനുമതി നല്കിയിരിക്കുന്നത്.
ഭീകരാക്രമണത്തിലെ ജെയ്ഷെ മുഹമ്മദ് ഭീകരരുടെ പങ്ക് വ്യക്തമാക്കുന്ന കൂടുതല് തെളിവുകള് ശേഖരിക്കുന്നതിനായാണ് പാക്ക് സംഘം പത്താന്കോട്ടിലെത്തുന്നത്. വിദേശകാര്യ മന്ത്രി സുഷമ സ്വരാജും പാക് വിദേശകാര്യ ഉപദേഷ്ടാവ് സര്താജ് അസീസുമായുള്ള കൂടിക്കാഴ്ചയില് നേരത്തേ ധാരണയായത് പ്രകാരമാണ് സംഘം എത്തുന്നത്. ആദ്യമായാണ് ഭീകരബന്ധം അന്വേഷിക്കുന്നതിന് വേണ്ടി പാക് സംഘം ഭാരതത്തിലെത്തുന്നത്.
അതേസമയം വ്യോമസേന താവളത്തിലെ ടെക്നിക്കല് മേഖലയിലേക്ക് പാക് സംഘത്തെ പ്രവേശിക്കാന് അനുവദിക്കില്ലെന്ന് ഔദ്യോഗികവൃത്തങ്ങള് വ്യക്തമാക്കി. യുദ്ധവിമാനങ്ങളും മറ്റു സുരക്ഷാ ക്രമീകരങ്ങളും ഉള്ളതിനാലാണ് ഇവിടേക്ക് അന്വേഷണ സംഘത്തിന് പ്രവേശനം നിഷേധിച്ചിരിക്കുന്നത്.
