കൊച്ചി: സാമ്പത്തികവര്ഷത്തില് ആദ്യമായി നാല് ലക്ഷം ടിഇയു കണ്ടെയ്നറുകള് കൈകാര്യം ചെയ്തതായി കൊച്ചി തുറമുഖത്തെ അന്താരാഷ്ട്ര കണ്ടെയ്നര് ട്രാന്സ്ഷിപ്പ്മെന്റ് ടെര്മിനല് നടത്തിപ്പുകാരായ ഡിപി വേള്ഡ് അറിയിച്ചു. മാര്ച്ച് 17 വരെ 4,00,238 കണ്ടെയ്നറുകള് കൈകാര്യം ചെയ്തു. സാമ്പത്തിക വര്ഷാവസാനത്തോടെ ഇത് 4.15 ലക്ഷം എത്തുമെന്ന് കരുതുന്നു. മുന്വര്ഷത്തെ 3,52,629 ടിഇയുവിനെ അപേക്ഷിച്ച് 13.5 ശതമാനം വളര്ച്ചയുണ്ടായിട്ടുണ്ട്. മുന്വര്ഷത്തെ അപേക്ഷിച്ച് ജനുവരിയില് കണ്ടെയ്നറുകളുടെ എണ്ണം 28 ശതമാനം ഫെബ്രുവരിയില് 38 ശതമാനം എന്നിങ്ങനെ വര്ധിച്ചു. മാര്ച്ചില് ടെര്മിനലിന്റെ ചരിത്രത്തിലെ ഏറ്റവും ഉയര്ന്ന പ്രതിദിന ട്രക്ക് മൂവ്മെന്റാണ് ഉണ്ടായിരിക്കുന്നത്.
ഇന്ത്യയിലെയും വിദേശത്തെയും തന്ത്രപ്രധാനമായ തുറമുഖങ്ങളില്നിന്ന് കൂടുതല് കപ്പല് സര്വീസുകള് തുടങ്ങിയത് ഈ നേട്ടങ്ങള്ക്ക് സഹായകമായി. മിഡില് ഈസ്റ്റ്-ഫാര് ഈസ്റ്റ് ഗാലക്സ് സര്വീസ്, വിവിധ ഏഷ്യന് തുറമുഖങ്ങള് ബന്ധിപ്പിക്കുന്ന സര്വീസുകള്, യൂറോപ്പിലേക്കും ആസ്ട്രേലിയയിലേക്കും നേരിട്ട് സര്വീസ്, യുഎസ് കിഴക്കന് തീരത്തേക്ക് കൊച്ചിയില്നിന്നും കണക്ഷനുണ്ട്. വ്യാപാര സമൂഹത്തിന്റെയും ഷിപ്പിങ് ലൈനുകളുടെയും പിന്തുണകൊണ്ടാണ് തിളക്കമാര്ന്ന ഈ നാഴികക്കല്ലിലെത്തുവാന് സാധിച്ചതെന്ന് കൊച്ചിന് പോര്ട്ട് ട്രസ്റ്റ് ചെയര്മാന് പോള് ആന്റണി പറഞ്ഞു.
ആഗോളതലത്തിലെ മാന്ദ്യത്തിലും മികച്ച പ്രവര്ത്തനം അടുത്ത സാമ്പത്തികവര്ഷവും കാഴ്ചവക്കുവാന് ഉപയോക്താക്കള്ക്ക് തങ്ങളിലുള്ള ആത്മവിശ്വാസം പ്രചോദനം തരുന്നുവെന്ന് ഡിപി വേള്ഡ് കൊച്ചിയുടെ സിഇഒ ജിബു കുര്യന് ഇട്ടി അഭിപ്രായപ്പെട്ടു.
