മൊഹാലി: ഓസ്ട്രേലിയന് ഓള്റൗണ്ടര് ഷെയ്ന് വാട്സണ് രാജ്യാന്തര ക്രിക്കറ്റില്നിന്ന് പൂര്ണമായും വിടവാങ്ങുന്നു. ഇപ്പോള് നടക്കുന്ന ട്വന്റി20 ലോകകപ്പോടെ പാഡഴിക്കുമെന്ന് വാട്സണ് വ്യക്തമാക്കി. ടെസ്റ്റ് ടീമില്നിന്ന് നേരത്തെ വിരമിച്ച താരം, ദീര്ഘനാളായി ഏകദിന ടീമിന്റെ ഭാഗവുമല്ല. വാട്സണും ഒഴിയുന്നതോടെ കഴിഞ്ഞ ദശകം ലോക ക്രിക്കറ്റിനെ അടക്കിവാണ ഓസ്ട്രേലിയയുടെ സുവര്ണ തലമുറ മുഴുവനായി അരങ്ങൊഴിഞ്ഞു.
ട്വന്റി20, ഏകദിന, ടെസ്റ്റുകളില് ടീമിനെ നയിച്ചിട്ടുള്ള ഈ ഓള്റൗണ്ടര് 2002 മാര്ച്ച് 24ന് ദക്ഷിണാഫ്രിക്കയ്ക്കെതിരായ ഏകദിന മത്സരത്തിലൂടെയാണ് രാജ്യാന്തര രംഗത്തെത്തിയത്. പതിനാലു വര്ഷങ്ങള്ക്കിപ്പുറം അരങ്ങേറിയ അതേ ദിവസം തന്നെ വിടവാങ്ങല് തീരുമാനവും വാട്സണ് പ്രഖ്യാപിച്ചത്. ഏകദിനത്തില് 190 കളികളില് 40.54 ശരാശരിയില് 5,757 റണ്സും 168 വിക്കറ്റും നേടി. ഒമ്പത് സെഞ്ചുറികളും ആ ബാറ്റില്നിന്ന് പിറന്നു. ഉയര്ന്ന സ്കോര് 185. ഇത് ഓസ്ട്രേലിയന് താരത്തിന്റെ ഉയര്ന്ന സ്കോറാണ്. ട്വന്റിയില് 56 മത്സരങ്ങളില് 1,400 റണ്സും 46 വിക്കറ്റും സമ്പാദ്യം. ഒരു സെഞ്ചുറിയും നേടി. 59 ടെസ്റ്റില് 3,731 റണ്സും 75 വിക്കറ്റുകളും നേടിയിട്ടുണ്ട്. രാജ്യാന്തര ക്രിക്കറ്റില് എല്ലാ ഫോര്മാറ്റില്നിന്നുമായി 10,000 റണ്സും 250 വിക്കറ്റും നേടിയ ഏഴാമത്ത താരമാണ് ഈ ഓസീസ് ഓള്റൗണ്ടര്. സ്റ്റീവ് വോ, കാള് ഹൂപ്പര്, സനത് ജയസൂര്യ, ജാക് കാലിസ്, ഷാഹിദ് അഫ്രീദി, ക്രിസ് ഗെയ്ല് എന്നിവരും ഈ നേട്ടത്തിനുടമകള്.
ഐപിഎല്ലില് രാജസ്ഥാന് റോയല്സ് ടീമംഗമായ വാട്സണ് ഐപിഎല്ലിലും ഓസ്ട്രേലിയന് ബിഗ് ബാഷ് ലീഗിലും തുടര്ന്നും കളിക്കുമെന്നും സൂചനകള്. ടെസ്റ്റിലും ഏകദിനത്തിലും ലോകത്തിന്റെ നെറുകയില് നിന്ന ഓസീസ് സംഘത്തില് അംഗമായ വാട്സണിന് ട്വന്റി20 കിട്ടാക്കനി. ട്വന്റി20 കൂടി നേടി മാന്യമായ വിടവാങ്ങലിന് അരങ്ങൊരുങ്ങുമോയെന്ന് വരും ദിവസങ്ങള് മുറുപടി നല്കും. ഗ്രൂപ്പില് പാക്കിസ്ഥാനും ഇന്ത്യയ്ക്കുമെതിരായ മത്സരങ്ങള് കൡക്കാനിരിക്കെ അതു രണ്ടും ജയിച്ചാലെ ഓസീസിന് സെമി പ്രതീക്ഷയുള്ളു. വാട്സണിന് മാന്യമായ യാത്രയയപ്പിന് സ്റ്റീവ് സ്മിത്തും കൂട്ടാളികളും അരങ്ങൊരുക്കുമോയെന്ന് മൊഹാലി ഇന്ന് മറുപടി നല്കും.
