കൊച്ചി: കേരള റെയില്വേ പോലീസിന്റെ നേതൃത്വത്തില് ഉത്തരേന്ത്യന് സംസ്ഥാനങ്ങളില് നിന്നും വരുന്ന ട്രെയിനുകള് കേന്ദ്രീകരിച്ച് നടത്തിയ പരിശോധനയില് 22 കിലോ കഞ്ചാവ് പിടികൂടി. സംസ്ഥാനത്ത് ട്രെയിന് മുഖാന്തരമുള്ള ലഹരിമരുന്ന് കടത്ത് കണ്ടെത്തുന്നതിനും നിയന്ത്രിക്കുന്നതിനും വേണ്ടി ഇന്റലിജന്സ് ഡിഐജി പി. വിജയന്റെ നേതൃത്വത്തില് രൂപീകരിച്ച കേരള പോലീസിന്റെ ആന്റി നര്ക്കോട്ടിക്ക് സ്ക്വാഡിലെ കേരള റെയില്വേ പോലീസിലെ സംഘമാണ് 22 കിലോ കഞ്ചാവുമായി ഒഡീഷ സ്വദേശിയായ അനില്കുമാറിനെ(37) കേരള റെയില്വേ പോലീസ് സൂപ്രണ്ട് വി.സി മോഹനന്റെ നിര്ദ്ദേശാനുസരണം നടത്തിയ പരിശോധനയില് അറസ്റ്റ് ചെയ്തത്. ആന്ധ്രപ്രദേശിലെ വിശാഖപട്ടണം കേന്ദ്രീകരിച്ച് കേരളത്തിലെ ഇടനിലക്കാര് മുഖേന വന്തോതില് കഞ്ചാവ് കടത്തുന്നവരെ പ്രത്യേകം നിരീക്ഷിച്ചാണ് പ്രതിയെ പിടികൂടിയത്.
എറണാകുളം റെയില്വേ ഡിവൈഎസ്പി സേവ്യര് സെബാസ്റ്റ്യന്, എറണാകുളം റെയില്വേ സിഐ എസ്.ജയകൃഷ്ണന്, എസ്ഐ ടോംസണ്, സിവില് പോലീസ് ഉദ്യോഗസ്ഥരായ ജാക്സന്, വിലാസ്, അജി എന്നിവരടങ്ങിയ സംഘമാണ് പ്രതിയെ പിടികൂടിയത്. പ്രതികളുടെ കേരളത്തിലുള്ള മറ്റു ഇടപാടുകാരേയും ഇടനിലക്കാരേയും കുറിച്ചുള്ള സൂചനകള് പ്രതിയെ ചോദ്യം ചെയ്തതില് നിന്നും ലഭിച്ചിട്ടുണ്ട്. ഇടപാടുകാരെ ബന്ധപ്പെടുന്നതിന് ഉപയോഗിച്ച ആറു മൊബൈല് ഫോണുകളും കണക്ഷനുകളും പ്രതിയുടെ പക്കല് നിന്നും കണ്ടെത്തിയിട്ടുണ്ട്.
മൊബൈല് ഫോണ് കേന്ദ്രീകരിച്ച് അന്വേഷണം പുരോഗമിക്കുകയാണെന്നും പരിശോധനകള് കൂടുതല് ശക്തമാക്കുമെന്നും അന്വേഷണം കേരളത്തിന്റെ പുറത്തേയ്ക്ക് വ്യാപിപ്പിക്കുമെന്നും പോലീസ് സൂപ്രണ്ട് അറിയിച്ചു.
