കണ്ണൂര്: തളിപ്പറമ്പ് കരിമ്പത്തെ ജില്ലാ കൃഷിത്തോട്ടത്തില് സന്ദര്ശകര്ക്കും ഗവേഷകര്ക്കുമായി കൂടുതല് സൗകര്യമൊരുങ്ങുന്നു. ഇതിനായി തോട്ടത്തിലെ ബാര്ബേഴ്സ് ബംഗ്ലാവിനോട് ചേര്ന്ന പഴയ കുതിരാലയവും ചുറ്റുമുള്ള തോട്ടവും നവീകരിക്കുന്ന പ്രവര്ത്തനങ്ങള്ക്ക് തുടക്കമായി. ഫലവൃക്ഷത്തൈകളും വിത്തിനങ്ങളും വിതരണം ചെയ്യുന്ന സ്ഥലത്ത് സന്ദര്ശകര്ക്ക് ഇരിക്കാനും വിശ്രമിക്കാനുമുള്ള സൗകര്യങ്ങളും ചെയ്യുന്നുണ്ട്. നിര്മിതി കേന്ദ്രമാണ് നിര്മാണ പ്രവര്ത്തനങ്ങള് ഏറ്റെടുത്തു നടത്തുന്നത്.
1905ല് കേരളത്തിലെത്തിയ ദക്ഷിണാഫ്രിക്കന് സസ്യശാസ്ത്രജ്ഞനായ ചാള്സ് ആല്ഫ്രഡ് ബാര്ബറാണ് കരിമ്പം കുരുമുളക് ഗവേഷണത്തിന് അനുയോജ്യമാണെന്നു കണ്ടെത്തിയത്. അന്ന് അദ്ദേഹം ഉപയോഗിച്ചിരുന്ന ബംഗ്ലാവ് ഇപ്പോഴും തനിമയോടെ നിലനിര്ത്തിയിട്ടുണ്ട്. രണ്ടു മുറികളും അടുക്കളയും വരാന്തയുമുള്ള തേക്കിന് തടി ഉപയോഗിച്ച് നിര്മ്മിച്ച കെട്ടിടം കാലപ്പഴക്കത്തിലും മങ്ങാതെ നില്ക്കുകയാണ്. ജവഹര്ലാല് നെഹ്റു, ഇന്ദിരാഗാന്ധി, വി.വി.ഗിരി, ഇഎംഎസ്, വിവിധ രാജ്യങ്ങളിലെ ഗവേഷകര് തുടങ്ങിയവര് കൃഷിത്തോട്ടം സന്ദര്ശിക്കാനെത്തിയപ്പോള് സന്ദര്ശക ഡയറിയില് എഴുതിയ കുറിപ്പുകളും ശ്രദ്ധേയമാണ്.
1960 കളിലാണ് വൈവിധ്യവല്ക്കരണത്തിന്റെ ഭാഗമായി ഇവിടെ മാവുകളെക്കുറിച്ചുള്ള ഗവേഷണം ആരംഭിക്കുന്നത്. ഇപ്പോള് വൈവിധ്യമാര്ന്ന മാവുകളുടെ വിപുലമായ ജനിതകശേഖരമാണ് ഇവിടെയുള്ളത്. ഇരുനൂറോളം സങ്കരയിനം മാവുകള് ഇവിടെ ഉല്പാദിപ്പിച്ചിരുന്നു. അതില് അറുപതോളം ഇനങ്ങള് ഇന്നും നിലനിര്ത്തിവരുന്നുണ്ട്. റംബൂട്ടാന്, മാംഗോസ്റ്റിന്, കുടംപുളി തുടങ്ങിയ ഫലവര്ഗങ്ങളുമുണ്ട്. ഇന്തോനേഷ്യ, മലേഷ്യ തുടങ്ങിയ ഇടങ്ങളില് നിന്നുള്ള 15 ഓളം മാംഗോസ്റ്റിന് ഇനങ്ങളാണ് ഉള്ളത്.
കൃഷിത്തോട്ടത്തിന്റെ പരിധിയില്പ്പെടുന്ന അഞ്ച് ഹെക്ടറോളം സ്ഥലം പൂര്ണ്ണമായും കാടായിത്തന്നെ നിലനിര്ത്തിയിരിക്കുകയാണ്. നൂറ്റിയഞ്ചോളം പക്ഷിവര്ഗങ്ങളെ ഇവിടെ കണ്ടെത്തി വിവരങ്ങള് രേഖപ്പെടുത്തിയിട്ടുണ്ട്. ജൈവവൈവിധ്യകേന്ദ്രമായി അംഗീകരിക്കപ്പെട്ട ഈ സ്ഥലത്ത് അപൂര്വയിനം ഔഷധസസ്യങ്ങളും ഫലവൃക്ഷങ്ങളും കാട്ടരുവിയും സന്ദര്ശകര്ക്ക് ഹരം പകരുന്നു. പക്ഷിനിരീക്ഷകരും വിദ്യാര്ത്ഥികളും ഇവിടെ എത്തുന്നുണ്ട്. ഇതോടനുബന്ധിച്ച് പരമ്പരാഗത സാങ്കേതികവിദ്യ വിജ്ഞാനകേന്ദ്രവും പ്രവര്ത്തിക്കുന്നു. പഴയകാല കാര്ഷിക ഉപകരണങ്ങള് ഇവിടെ പ്രദര്ശിപ്പിച്ചിട്ടുണ്ട്. വിദ്യാര്ത്ഥികള്ക്കും ഗവേഷകര്ക്കും ബഡിങ്, ഗ്രാഫ്റ്റിങ് തുടങ്ങിയവയില് പരിശീലനവും മാര്ഗനിര്ദ്ദേശവും നല്കുന്നു. വിഷുവിന് വിഷരഹിത പച്ചക്കറിക്കായി ഒരു ലക്ഷത്തോളം തൈകളാണ് ഇവിടെ ഉല്പാദിപ്പിച്ച് വിതരണം ചെയ്യുന്നതെന്ന് സൂപ്രണ്ടിന്റെ ചുമതല വഹിക്കുന്ന സീനിയര് ഓഫീസര് ടി.വി.ജീവരാജ് പറഞ്ഞു.
