ന്യൂദല്ഹി: പ്രതിപക്ഷ കക്ഷികള് ഉയര്ത്തുന്ന അനാവശ്യ വിവാദങ്ങളിലല്ല വികസനത്തില് മാത്രമാണ് കേന്ദ്രസര്ക്കാരിന്റെ ശ്രദ്ധയെന്ന് പ്രധാനമന്ത്രി നരേന്ദ്രമോദി പറഞ്ഞു. സര്ക്കാരിന്റെ ശ്രദ്ധതിരിക്കാനുള്ള പ്രതിപക്ഷ ശ്രമത്തില് പാര്ട്ടി പ്രവര്ത്തകര് വീണുപോകരുതെന്നും പ്രധാനമന്ത്രി പറഞ്ഞു. രണ്ടുദിവസം നീണ്ടുനിന്ന ബിജെപി ദേശീയ നിര്വാഹക സമിതി യോഗത്തില് സമാപന പ്രസംഗം നടത്തുകയായിരുന്നു മോദി.
കേന്ദ്രസര്ക്കാരിന്റെ ഭരണനേട്ടങ്ങള് ഗ്രാമഗ്രാമാന്തരങ്ങളിലെത്തിക്കുകയെന്നതാണ് പാര്ട്ടി പ്രവര്ത്തകരുടെ ചുമതല. പ്രതിപക്ഷത്തിന്റെ കുപ്രചാരണങ്ങളില് നിന്നും പാര്ട്ടി പ്രവര്ത്തകര് ഒഴിഞ്ഞുനില്ക്കണം. നമ്മുടെ വികസന പ്രവര്ത്തനങ്ങളെ തടസ്സപ്പെടുത്തുകയെന്നതാണ് അവരുടെ അന്തിമ ലക്ഷ്യം, മോദി ഓര്മ്മപ്പെടുത്തി.
സര്ക്കാര് നടത്തുന്ന വികസന ഭരണം ചിലര്ക്ക് രുചിക്കുന്നില്ല. ഭരണത്തിന്റെ പ്രയോജനങ്ങള് ജനങ്ങളിലെത്തുന്നത് തടയാനാണ് ശ്രമം നടക്കുന്നത്. സ്വാതന്ത്ര്യലബ്ധിക്ക് ഏഴുപതിറ്റാണ്ടുകളോടടുത്തിട്ടും വൈദ്യുതിയില്ലാതിരുന്ന 18,500 ഗ്രാമങ്ങളില് ഒരു വര്ഷംകൊണ്ട് 6,000 ഗ്രാമങ്ങളില് വൈദ്യുതി എത്തിച്ചിട്ടുണ്ട്. 2018ന് മുമ്പായി ബാക്കി മുഴുവന് ഗ്രാമങ്ങളില്ക്കൂടിയും വൈദ്യുതി ലഭ്യമാക്കും. ഇത്രവര്ഷം ഭരിച്ചിട്ടും അടിസ്ഥാന ആവശ്യമായ വൈദ്യുതിപോലും ജനങ്ങള്ക്ക് ലഭ്യമാക്കാതിരുന്നവരാണ് സര്ക്കാരിനെ വിമര്ശിക്കുന്നത്. ബിജെപിയെ വടവൃക്ഷമായി വളര്ത്തുകയാണ് നമ്മുടെ കര്ത്തവ്യം. രണ്ടുവര്ഷത്തോളമായ ഭരണത്തിന്റെ ഫലമായി രാജ്യത്തുനിന്നും അഴിമതിയെ മാറ്റിനിര്ത്താന് സാധിച്ചെന്നും മോദി പറഞ്ഞു. ബിജെപിയും കേന്ദ്രസര്ക്കാരും ഒറ്റക്കെട്ടായാണ് മുന്നോട്ടുപോകുന്നതെന്നും പ്രധാനമന്ത്രി സമാപന പ്രസംഗത്തില് വ്യക്തമാക്കി.
ഗ്രാമോദയം വഴി ഭാരത ഉദയം എന്ന മുദ്രാവാക്യവുമായി ഏപ്രില് 14 മുതല് 24വരെ പത്തുദിവസം നീണ്ടുനില്ക്കുന്ന പ്രചാരണ പരിപാടികള് ബിജെപി രാജ്യവ്യാപകമായി സംഘടിപ്പിക്കുമെന്ന് ദേശീയ അധ്യക്ഷന് അമിത് ഷാ നിര്വാഹക സമിതി യോഗത്തെ അറിയിച്ചു. ഡോ. അംബേദ്ക്കര് ജയന്തി ദിനമായ 14 മുതല് പഞ്ചായത്തിരാജ് ദിനമായ 24 വരെയാണ് പരിപാടികള്. 14,15,16 തീയതികളിലായി സാമൂഹ്യസമരസതാ സന്ദേശമുയര്ത്തി ഗ്രാമപഞ്ചായത്ത് തലങ്ങളില് അംബേദ്ക്കറുടെ വിചാരധാരകള് ജനങ്ങളിലെത്തിക്കാന് സമ്പര്ക്കപരിപാടികള് നടത്തും. 18,19,20 തീയതികളില് ഗ്രാമങ്ങളില് കിസാന് സഭകള് സംഘടിപ്പിക്കും. 21 മുതല് 24 വരെയുള്ള ദിവസങ്ങളില് ഗ്രാമസഭകളില് അതതു ഗ്രാമങ്ങളുടെ വികസന പദ്ധതികള് ആവിഷ്ക്കരിക്കും. 2016-17 പൊതുബജറ്റില് വിവിധ പദ്ധതികളില് ഉള്പ്പെടുത്തി ഗ്രാമങ്ങള്ക്കായി അനുവദിച്ചിരിക്കുന്ന 80 ലക്ഷം രൂപ ഫലപ്രദമായി വിനിയോഗിക്കുന്നത് ഗ്രാമസഭകള് ചര്ച്ച ചെയ്യും.
ഏപ്രില് 14ന് അംബേദ്ക്കര് ജയന്തി ദിനത്തില് മധ്യപ്രദേശിലെ മഹൂമില് പ്രധാനമന്ത്രി സന്ദര്ശനം നടത്തി അംബേദ്ക്കര് സ്മാരകത്തില് പുഷ്പാര്ച്ചന നടത്തും. തുടര്ന്ന് വലിയ പൊതുസമ്മേളനത്തെയും ഇവിടെ മോദി അഭിസംബോധന ചെയ്യും. ഏപ്രില് 24ന് ജംഷഡ്പൂരില് നടക്കുന്ന പഞ്ചായത്ത് പ്രതിനിധിസമ്മേളനത്തിലും പ്രധാനമന്ത്രി മാര്ഗ്ഗനിര്ദ്ദേശം നടത്തും. രാജ്യത്തെ എല്ലാ പഞ്ചായത്തുകളിലും പരിപാടിയുടെ തല്സമയ സംപ്രേഷണം സംഘടിപ്പിക്കും.
ഗ്രാമോദയംവഴി ഭാരത ഉദയം എന്ന സാമൂഹ്യ പ്രമേയം മുന് ദേശീയ അധ്യക്ഷന് നിതിന് ഗഡ്ക്കരി അവതരിപ്പിച്ചു. കേന്ദ്രമന്ത്രി നരേന്ദ്രസിങ് തോമര് പിന്തുണച്ചു.
രാഷ്ട്രീയ പ്രമേയം മുന് ദേശീയ അധ്യക്ഷനായ വെങ്കയ്യ നായിഡു അവതരിപ്പിച്ചപ്പോള് സരോജ്പാണ്ഡെ പിന്തുണച്ചു. സംഘടനാ വിഷയങ്ങള് ദേശീയ സംഘടനാ സെക്രട്ടറി രാംലാലും മറ്റു വികസന നേട്ടങ്ങള് സുഷമാ സ്വരാജ്, പീയൂഷ് ഗോയല്, പ്രകാശ് ജാവദേക്കറും ദേശീയ നിര്വാഹക സമിതിയില് വിശദീകരിച്ചു.
രാഷ്ട്രീയ പ്രതിയോഗികളെ അംഗീകരിക്കുന്നതായും എന്നാല് രാഷ്ട്രവിരോധം വെച്ചുപൊറുപ്പിക്കില്ലെന്നും ദേശീയ നിര്വാഹക സമിതി തീരുമാനങ്ങള് വിശദീകരിച്ചു നടത്തിയ പത്രസമ്മേളനത്തില് കേന്ദ്രആഭ്യന്തരമന്ത്രി രാജ്നാഥ്സിങ് വ്യക്തമാക്കി.
