പള്ളുരുത്തി: കുണ്ടന്നൂര്-ഐലന്റ് പുതിയ പാതയിലെ അലക്സാണ്ടര് പറമ്പിത്തറ പാലത്തില് ആക്രമണം നടത്തി ജീവനക്കാരെ മര്ദ്ദിച്ച സംഭവത്തില് ഒന്പതുപേരെ ഹാര്ബര് പോലീസ് അറസ്റ്റുചെയ്തു. മട്ടാഞ്ചേരി സ്വദേശികളായ പാര്വ്വതീമന്ദിരത്തില് സൂരജ് മുരളീധരന് (38), കൊച്ചങ്ങാടി റോഡില് നോവാലില് വീട്ടില് ഹംസത്ത് (38), മട്ടാഞ്ചേരി മാനാംപറമ്പ് തെക്കന് വീട്ടില് തന്സില് (29), മാനാംപറമ്പ് പള്ളിക്ക് സമീപം അഞ്ചനമുറിപ്പറമ്പ് വീട്ടില് ഹാരിസ് (35), മേപ്പറമ്പില് വീട്ടില് ആസിഫ് (28), കൊച്ചങ്ങാടി പള്ളിപ്പറമ്പില് വീട്ടില് ഹാഷിം (30), മട്ടാഞ്ചേരി ഗുജറാത്തി റോഡില് തുരുത്തിപ്പള്ളി വീട്ടില് ലുക്ക്മാന് (25), പനയപ്പിള്ളി പിള്ളയാര്കോവില് വീട്ടില് ഷജീര് ഹുസൈന് (30), പണ്ടാരപറമ്പില് മുസ്തഫ സനീഷ് (30) എന്നിവരാണ് പിടിയിലായത്.
കഴിഞ്ഞ 18 നാണ് സംഭവം. രാത്രി 11.30 ഓടെ പറമ്പിത്തറ പാലത്തിന്റെ ടോള്ബൂത്തില് കാറുമായിഎത്തിയ സൂരജ് മുരളീധരന് ജീവനക്കാര് ആവശ്യപ്പെട്ടിട്ടും ടോള് എടുത്തില്ല. പഴയ ടോള് പാസ് എടുത്തുകാട്ടി ജീവനക്കാരോട് തട്ടിക്കയറുകയും ചെയ്തു. ടോള് എടുക്കാതെ വാഹനം വിടില്ല എന്ന നിലപാടെടുത്ത ജീവനക്കാരെ നേരിടാന് ഇയാളുടെ സുഹൃത്തുക്കളെ ഫോണില് വിളിച്ചുവരുത്തുകയും ജീവനക്കാരെ ഓടിച്ചശേഷം ബൂത്തില് ആക്രമണം അഴിച്ചുവിടുകയുമായിരുന്നു. ബൂത്തില് അതുവരെ ലഭിച്ച പണംറോഡില് വലിച്ചെറിയുകയും മേശയും കസേരയും ടോള്സ്റ്റോപ്പ്ബാറും അടിച്ചുതകര്ക്കുകയും ചെയ്തു. ഇവരുടെ മര്ദ്ദനമേറ്റ ജീവനക്കാരായ സുനില് ജയപ്രകാശ്, ചന്ദ്രന് എന്നിവര് പരിക്കുകളോടെ ആശുപത്രിയിലാണ്. ഏകദേശം 40,000 രൂപയുടെ നഷ്ടം സംഭവിച്ചതായി പറയുന്നു. പ്രതികളെ കോടതിയില് ഹാജരാക്കി റിമാന്റ് ചെയ്തു.
