പള്ളുരുത്തി: കേന്ദ്ര ഊര്ജ വകുപ്പ് നടപ്പാക്കുന്ന ഡൊമസ്റ്റിക് എഫിഷന്റ് ലൈറ്റ്നിംഗ് പ്രോഗ്രാം (ഡെല്പ്) സംസ്ഥാന വൈദ്യുതി വകുപ്പ് കാര്യക്ഷമമല്ലാതെ നടപ്പാക്കുന്നതായി ആക്ഷേപം.
‘ഡെല്പ്’ പദ്ധതി കേരളത്തില് ‘ലാഭപ്രതിഭ’ എന്ന പേരിലാണ് നടപ്പാക്കുന്നത്. പദ്ധതിപ്രകാരം മാര്ക്കറ്റില് 360 രൂപ നിരക്കില് ലഭിക്കുന്ന 9 വാട്ടിന്റെ ബള്ബ് ഗാര്ഹിക ഉപഭോക്താക്കള്ക്കും 95 രൂപ നിരക്കില് ലഭ്യമാക്കണമെന്നാണ് നിര്ദ്ദേശം. ഒരു ഉപഭോക്താവിന് രണ്ട് ബള്ബുകള് വീതം നല്കാനും പദ്ധതി വിഭാവനം ചെയ്യുന്നു. എല്ലാ വൈദ്യുതി ഓഫീസുകള് വഴിയും ബള്ബുകള് വിതരണം ചെയ്യുന്ന പദ്ധതിയാണിത്. എന്നാല് കേന്ദ്ര പദ്ധതിയായതിനാല് വേണ്ടത്ര പ്രാധാന്യം നല്ക്കേണ്ട എന്ന നിലപാടിലാണ് സംസ്ഥാന വൈദ്യുതിവകുപ്പും ഉദ്യോഗസ്ഥരും.
ഗാര്ഹിക ഉപഭോക്താക്കള്ക്ക് മാത്രം വിതരണം ചെയ്യേണ്ട ബള്ബുകള് മത്സ്യബന്ധന, കാര്ഷിക, വ്യാവസായിക കണക്ഷനുകള് ഉള്ളവര്ക്കും നല്കുകയാണെന്ന് പരാതി ഉയരുന്നുണ്ട്. സംസ്ഥാന വൈദ്യുതി വകുപ്പ് എല്ഇഡി ബള്ബ് വിതരണത്തിന് പ്രത്യേക മാനദണ്ഡങ്ങളൊന്നും പുറത്തിറക്കിയിട്ടില്ല. ഗാര്ഹിക ഉപഭോക്താക്കള്ക്ക് വിതരണം ചെയ്യേണ്ട ബള്ബുകള് വഴിമാറ്റി വിതരണം ചെയ്ത് വിതരണം നിര്ത്തി വെക്കുകയാണ് ലക്ഷ്യം. ഉദ്യോഗസ്ഥരുടെ ഇടയിലുള്ള ഇടതുപക്ഷ-വലതുപക്ഷ തൊഴിലാളികളാണ് ഇതിനായി പ്രവര്ത്തിക്കുന്നത്.
വിതരണം ചെയ്യുന്ന ബള്ബുപയോഗിച്ചാല് ഏഴുമുതല് എട്ട് യൂണിറ്റ് വരെ വൈദ്യുതി കുറക്കാമെന്നിരിക്കെ സംസ്ഥാനം ഇൗ പദ്ധതിക്ക് നേരെ മുഖം തിരിക്കുകയാണ്. അതേസമയം സംസ്ഥാനത്ത് തെരഞ്ഞെടുപ്പ് പ്രഖ്യാപിച്ച സാഹചര്യത്തില് പെരുമാറ്റച്ചട്ടത്തിന്റെ പേരില് ബള്ബ് വിതരണം നിര്ത്തിവെപ്പിച്ചെന്നാണ് ഉദ്യോഗസ്ഥ ഭാഷ്യം.
