വിളപ്പില്: മലയിന്കീഴിലെ ജനതാദള് പ്രാദേശിക നേതൃത്വത്തില് ഒരു വിഭാഗം ഇടതുമുന്നണിയുടെ ഒപ്പം ചേര്ന്നതോടെ മറുവിഭാഗം യുഡിഎഫിനൊപ്പം ഉറച്ചുനില്ക്കാന് തീരുമാനിച്ചു. ഇതോടെ കാട്ടാക്കട മണ്ഡലത്തില് വീരേന്ദ്രകുമാറിന്റെ ജനതാദള് പിളര്പ്പിലേക്ക് നീങ്ങി.
മലയിന്കീഴ് പഞ്ചായത്ത് പ്രസിഡന്റ് തെരഞ്ഞെടുപ്പില് പാര്ട്ടിയംഗം ഇടതു പിന്തുണ സ്വീകരിച്ചത് തങ്ങളുടെ അറിവോ അംഗീകാരമോ ഇല്ലാതെയാണെന്ന് ജെഡിയു പഞ്ചായത്ത് കമ്മിറ്റി പ്രസിഡന്റ് നീലകണ്ഠന് നായര് അറിയിച്ചു. ഇതു സംബന്ധിച്ചുള്ള കാര്യങ്ങള് പാര്ട്ടി ജില്ലാ–സംസ്ഥാന നേതാക്കള് പരിശോധിച്ചു വരികയാണ്. നിയമസഭ തെരഞ്ഞെടുപ്പിന് മുമ്പുതന്നെ ഇതുസംബന്ധിച്ച് വ്യക്തത കൈവരുമെന്നും നേതാക്കള് പറയുന്നു.
തദ്ദേശതെരഞ്ഞെടുപ്പില് യുഡിഎഫ് പാനലിലാണ് ജെഡിയു മണ്ഡലം പ്രസിഡന്റ്കൂടിയായ ചന്ദ്രന് നായര് മത്സരിച്ച് വിജയിച്ചത്. എന്നാല് രണ്ടംഗത്തിന്റെ ഭൂരിപക്ഷത്തില് ഭരണം നിലനിര്ത്തിയ യുഡിഎഫിനെ വെട്ടിലാക്കിയാണ് പഞ്ചായത്ത് പ്രസിഡന്റ് സ്ഥാനം മോഹിച്ച് ചന്ദ്രന് നായര് എല്ഡിഎഫ് പിന്തുണ തേടിയത്. നറുക്കെടുപ്പിലേക്ക് നീങ്ങിയ മത്സരത്തില് ഇടത് പ്രസിഡന്റ് സ്ഥാനാര്ഥിയായ ജനതാദളിലെ ചന്ദ്രന് നായര് വിജയിക്കുകയും ചെയ്തു. സ്ഥാനം മോഹിച്ച് മറുകണ്ടം ചാടിയ നേതാവിനെതിരെ ഒരു നടപടിയും എടുക്കാന് ജനതാദള് തയ്യാറായില്ല. പ്രാദേശിക നേതൃത്വത്തിന്റെ അറിവോടെയല്ല ഇതെന്ന് ജനതാദള് ഉറപ്പിച്ച് പറയുമ്പോഴും ഉന്നത നേതാക്കളുടെ പിന്തുണ ഉണ്ടായിരുന്നതായി കോണ്ഗ്രസ് നേതാക്കള് ആരോപിക്കുന്നു.
ഇതോടെയാണ് കാട്ടാക്കട നിയോജക മണ്ഡലത്തില് യുഡിഎഫിനുള്ളില് പ്രശ്നങ്ങള് ഉടലെടുക്കുന്നത്. പഞ്ചായത്തിലെ തുടര്ഭരണം നഷ്ടപ്പെടുത്തിയ ജെഡിയുവിന്റെ നിലപാടിനോടുള്ള കോണ്ഗ്രസ് നേതാക്കളുടെ പ്രതിഷേധം തുടരുകയാണ്. നിയമസഭ തെരഞ്ഞെടുപ്പ് സംബന്ധിച്ച് യുഡിഎഫ് യോഗങ്ങളില് നിന്നും ജെഡിയു നേതാക്കളെ ഒഴിവാക്കുന്ന സാഹചര്യമാണ് കാട്ടാക്കട നിയോജക മണ്ഡലത്തില് നിലവിലുള്ളത്. മണ്ഡലത്തിലെ കോണ്ഗ്രസ്–ജെഡിയു പോര് ജന്മഭൂമി കഴിഞ്ഞ ദിവസം വാര്ത്തയാക്കിയിരുന്നു. തുടര്ന്നാണ് ജെഡിയു മലയിന്കീഴ് പഞ്ചായത്ത് കമ്മിറ്റി തങ്ങളുടെ നിലപാട് വ്യക്തമാക്കിയത്. ചന്ദ്രന്നായരെ പാര്ട്ടി ഭാരവാഹിത്വങ്ങളില് നിന്നും ഒഴിവാക്കാനും തുടര് നടപടി സ്വീകരിക്കാനും ജനതാദള് പഞ്ചായത്ത് കമ്മിറ്റി സംസ്ഥാന നേതൃത്വത്തോട് ആവശ്യപെട്ടിട്ടുണ്ട്. നിയമസഭ തിരഞ്ഞെടുപ്പില് യുഡിഎഫ് സ്ഥാനാര്ഥിയെ വിജയിപ്പിക്കുന്നതിനുവേണ്ടി ബൂത്ത് തലങ്ങളില് തന്നെ ഒന്നാംഘട്ട പ്രവര്ത്തനങ്ങള് ആരംഭിച്ചതായി ജനതാദള് നേതാക്കള് പറയുന്നു. എന്നാല് മലയിന്കീഴ് പഞ്ചായത്തില് തെരഞ്ഞെടുപ്പ് സംബന്ധിച്ച് യുഡിഎഫ് വിളിച്ചുചേര്ത്ത കമ്മിറ്റിയില് നിന്നും ജെഡിയുവിനെ ഒഴിവാക്കിയത് ശ്രദ്ധേയമാണ്.
