ലണ്ടന്: ചെല്സിയെ തകര്ത്ത് പിഎസ്ജിയും സെനിത് സെന്റ് പീറ്റേഴ്സ്ബര്ഗിെന മുക്കി ബെനഫിക്കയും യുവേഫ ചാമ്പ്യന്സ് ലീഗിന്റെ ക്വാര്ട്ടറില്.
സ്റ്റാംഫോര്ഡ് ബ്രിഡ്ജില് നടന്ന രണ്ടാം പാദത്തില് ഒന്നിനെതിരെ രണ്ട് ഗോളുകള്ക്ക് പിഎസ്ജി ജയിച്ചു. ആദ്യപാദത്തിലും ഇതേ മാര്ജിനില് വിജയിച്ച അവര് ഇരുപാങ്ങളിലുമായി 4-2ന്റെ തകര്പ്പന് വിജയമാണ് നേടിയത്. തുടര്ച്ചയായ നാലാം തവണയാണ് പിഎസ്ജി ക്വാര്ട്ടറില് ഇടംപിടിക്കുന്നത്.
2-1ന്റെ മുന്തൂക്കത്തോടെ സ്റ്റാംഫോര്ഡില് കളിക്കാനിറങ്ങിയ പിഎസ്ജിക്കായിരുന്നു പന്തടക്കത്തില് മുന്തൂക്കം. എന്നാല് ഷോട്ടുകള് പായിക്കുന്നതില് ചെല്സിയായിരുന്നു ഏറെ മുന്നില്. ചെല്സി പായിച്ച 15 ഷോട്ടുകളില് ഏഴെണ്ണം ലക്ഷ്യത്തിലേക്ക് നീങ്ങിയെങ്കിലും ഒരിക്കല് മാത്രമാണ് പിഎസ്ജി ഗോളിയെ കീഴടക്കാന് കഴിഞ്ഞത്. അതേസമയം പിഎസ്ജി പായിച്ച 10 ഷോട്ടുകളില് അഞ്ചെണ്ണം ലക്ഷ്യത്തിലേക്കായിരുന്നു.
ഇതില് രണ്ടെണ്ണം ചെല്സി ഗോളി കുര്ട്ടോയിസിനെ മറികടന്ന് വലയില് കയറുകയും ചെയ്തു. ഡീേഗാ കോസ്റ്റ, ഈഡന് ഹസാര്ഡ്, വില്യന്, ഫാബ്രിഗസ് എന്നിവരടങ്ങിയ ചെല്സി മുന്നേറ്റനിര അവസരങ്ങള് പാഴാക്കുന്നതില് മത്സരിച്ചതാണ് അവര്ക്ക് തിരിച്ചടിയായത്. കളിയുടെ തുടക്കത്തില് ആദ്യ അവസരം ലഭിച്ചത് ചെല്സിക്കായിരുന്നു. എന്നാല് ആദ്യം ഗോളടിച്ചത് പിഎസ്ജി. 16-ാം മിനിറ്റില് അഡ്രിയാന് റാബിയോട്ടാണ് ലക്ഷ്യം കണ്ടത്.
സൂപ്പര്താരം സ്ലാറ്റന് ഇബ്രാഹിമോവിച്ച് ബോക്സിനുള്ളില് നിന്ന് പോസ്റ്റിന് മുന്നിലേക്ക് നല്കിയ പാസാണ് അഡ്രിയാന് വലയിലെത്തിച്ചത്. 27-ാം മിനിറ്റില് ചെല്സി സമനില പിടിച്ചു. വില്യന്റെ പാസില് നിന്ന് ഡീഗോ കോസ്റ്റയാണ് നിറയൊഴിച്ചത്. സമനില പിടിച്ചതോടെ നിര്ണായക ജയം ലക്ഷ്യമിട്ട് ചെല്സി ആക്രമണത്തിന് മൂര്ച്ച കൂട്ടി. വില്യന്-ഹസാര്ഡ്-കോസ്റ്റ-ഫാബ്രിഗാസ് സഖ്യം പിഎസ്ജി ബോക്സിലേക്ക് ഇരച്ചുകയറിയെങ്കിലും ബാറിന് കീഴില് മികച്ച ഫോം പ്രകടിപ്പിച്ച ഗോളിയെ കീഴടക്കാന് കഴിഞ്ഞില്ല.
ഇതോടെ ആദ്യപകുതി 1-1ന് സമനിലയില്. രണ്ടാം പകുതിയിലും ഇരുടീമുകളും വാശിയേറിയ മത്സരമാണ് കാഴ്ചവെച്ചത്. 65-ാം മിനിറ്റില് വില്യനും ഇൗഡന് ഹസാര്ഡും തുടര്ച്ചയായി രണ്ട് അവസരങ്ങള് പാഴാക്കിയതിന് പിന്നാലെ പിഎസ്ജി രണ്ടാം ഗോള് നേടി. ഏയ്ഞ്ചല് ഡി മരിയയുടെ ക്രോസ് സ്വീകരിച്ച് ക്ലോസ് റേഞ്ചില് നിന്ന് സൂപ്പര്താരം സ്ലാറ്റന് ഇബ്രാഹിമോവിച്ച് പായിച്ച വലംകാലന് ഷോട്ടാണ് കുര്ട്ടോയിസിനെ കീഴടക്കി വലയില് കയറിയത് (2-1). ഏഴ് മിനിറ്റിനുശേഷം ഏയ്ഞ്ചല് ഡി മരിയയുടെ ഷോട്ട് കുര്ട്ടോയിസ് രക്ഷപ്പെടുത്തി. അവസാന മിനിറ്റുകളില് ചെല്സി താരങ്ങള് എതിര്ഗോള്മുഖത്ത് ആക്രമണത്തിരമാലകളുയര്ത്തിയെങ്കിലും പിഎസ്ജി ഗോള്കീപ്പറും പ്രതിരോധനിരയും അവസരത്തിനൊത്തുയര്ന്നതോടെ അവയെല്ലാം വിഫലമായി.
മറ്റൊരു മത്സരത്തില് റഷ്യന് വമ്പന്മാരായ സെനിത്തിനെ എവേ മത്സരത്തിലും തകര്ത്താണ് പോര്ച്ചുഗല് ക്ലബ് ബെനഫിക്കയുടെ കുതിപ്പ്. ആദ്യപാദത്തില് 1-0ന് വിജയിച്ച ബെനഫിക്ക ഇരുപാദങ്ങളിലുമായി 3-1ന്റെ വിജയമാണ് നേടിയത്. ബെന്ഫികയ്ക്കായി നിക്കോളാസ് ഗെയ്റ്റാനും സോസ കോന്സിക്കോയും ഗോള് നേടി. സെനിറ്റ് സെന്റ് പീറ്റേഴ്സ്ബര്ഗിനു വേണ്ടി ബ്രസീല് താരം ഹള്ക്ക് ആശ്വാസ ഗോള് നേടി. 2011-12നുശേഷം ആദ്യമായാണ്ബെനഫിക്ക ക്വാര്ട്ടറില് ഇടംപിടിക്കുന്നത്.
