ലണ്ടന്: ഇംഗ്ലീഷ് പ്രീമിയര് ലീഗില് ഒന്നാം സ്ഥാനത്തെത്താനുള്ള അവസരം നഷ്ടപ്പെടുത്തിയ ടോട്ടനത്തിന് ഞെട്ടിക്കുന്ന തോല്വി. ഇന്നലെ പുലര്ച്ചെ സമാപിച്ച എവേ മത്സരത്തില് വെസ്റ്റ് ഹാമിനോട് ഏകപക്ഷീയമായ ഒരു ഗോളിനേറ്റ പരാജയമാണ് ടോട്ടനത്തിന്റെ സ്വപ്നങ്ങള്ക്കുമേല് കരിനിഴല് വീഴ്ത്തിയത്. സ്വന്തം തട്ടകത്തില് നടന്ന മത്സരത്തില് ആഴ്സണലും പരാജയം നുണച്ചു. സ്വാന്സീ സിറ്റിയാണ് എമിറേറ്റ്സ് സ്റ്റേഡിയത്തില് ചെന്ന് ഗണ്ണേഴ്സിനെ 2-1ന് പരാജയപ്പെടുത്തിയത്. അതേസമയം ലിവര്പൂള് മറുപടിയില്ലാത്ത മൂന്ന് ഗോളുകള്ക്ക് കരുത്തരായ മാഞ്ചസ്റ്റര് സിറ്റിയെ തകര്ത്തപ്പോള് മാഞ്ചസ്റ്റര് യുണൈറ്റഡ് സ്വന്തം തട്ടകത്തില് 1-0ന് വാറ്റ്ഫോര്ഡിനെ കീഴടക്കി.
വെസ്റ്റ് ഹാമിനെതിരായ മത്സരത്തില് വിജയിച്ചിരുന്നെങ്കില് പോയിന്റ് പട്ടികയില് ഒന്നാമതുള്ള ലീസസ്റ്ററിനെ പിന്തള്ളി ടോട്ടനത്തിന് ഒന്നാം സ്ഥാനം സ്വന്തമാക്കാമായിരുന്നു. എന്നാല് ഏഴാം മിനിറ്റില് മൈക്കല് അന്റോണിയോ നേടിയ ഗോളിന് പരാജയപ്പെടാനായിരുന്നു ടോട്ടനത്തിന് വിധി. പ്രീമിയര് ലീഗില് തുടര്ച്ചയായ ആറ് മത്സരങ്ങളില് വിജയിച്ചശേഷം ആദ്യ പരാജയമാണ് ടോട്ടനത്തിന്റേത്. പരാജയപ്പെട്ടെങ്കിലും 28 കളികളില് നിന്ന് 54 പോയിന്റുമായി ടോട്ടനം രണ്ടാം സ്ഥാനത്തുതന്നെയുണ്ട്. 46 പോയിന്റുള്ള വെസ്റ്റ് ഹാം ആറാം സ്ഥാനത്താണ്.
മറ്റൊരു മത്സരത്തില് മൂന്നാം സ്ഥാനത്തുള്ള ആഴ്സണലിനും അപ്രതീക്ഷിത തിരിച്ചടിയാണ് നേരിട്ടത്. 15-ാം മിനിറ്റില് കാംപെല് നേടിയ ഗോളിന് മുന്നിട്ടുനിന്നശേഷമാണ് ആഴ്സണല് സ്വാന്സീയോട് പരാജയമേറ്റുവാങ്ങിയത്. റൗട്ട്ലെഡ്ജ്, വില്ല്യം എന്നിവര് നേടിയ ഗോളിനാണ് സ്വാന്സീ ഗണ്ണേഴ്സിനെതിരെ വിജയം നേടിയത്. കളിയില് വിജയിച്ചിരുന്നെങ്കില് ആഴ്സണലിന് പോയിന്റ് പട്ടികയില് ടോട്ടനത്തിനൊപ്പമെത്താമായിരുന്നു. കഴിഞ്ഞ ശനിയാഴ്ച മാഞ്ചസ്റ്റര് യുണൈറ്റഡിനോടും ഫെബ്രുവരി 23ന് ചാമ്പ്യന്സ് ലീഗിന്റെ ആദ്യ പാദ പ്രീ ക്വാര്ട്ടറില് ബാഴ്സലോണയോടും പരാജയപ്പെട്ടതിനു പിന്നാലെയാണ് സ്വാന്സീ സിറ്റിയോടും ഗണ്ണേഴ്സ് കീഴടങ്ങിയത്.
ആന്ഫീല്ഡില് നടന്ന മറ്റൊരു മത്സരത്തില് മറുപടിയില്ലാത്ത മൂന്ന് ഗോളുകള്ക്കാണ് ലിവര്പൂള് മാഞ്ചസ്റ്റര് സിറ്റിയെ തകര്ത്തത്. കളിയിലും ഷോട്ടുകള് പായിക്കുന്നതിലും പൂര്ണ്ണ ആധിപത്യം പുലര്ത്തിയ ലിവര്പൂളിനുവേണ്ടി 34-ാം മിനിറ്റില് ആഡം ലല്ലാന, 41-ാം മിനിറ്റില് മില്നര്, 57-ാം മിനിറ്റില് ഫിര്മിനോ എന്നിവര് ലക്ഷ്യം കണ്ടു. ഓള്ഡ് ട്രഫോര്ഡില് നടന്ന കളിയില് ഏകപക്ഷീയമായഒരു ഗോളിനാണ് മാഞ്ചസ്റ്റര് യുണൈറ്റഡ് 1-0ന് വാറ്റ്ഫോര്ഡിനെ കീഴടക്കി. ഗോള്രഹിതമായ ആദ്യപകുതിക്കുശേഷം 83-ാം മിനിറ്റില് ജുവാന് മാട്ടയാണ് യുണൈറ്റഡിന്റെ വിജയഗോള് നേടിയത്. 28 കളികളില് നിന്ന് 47 പോയിന്റുമായി യുണൈറ്റഡ് അഞ്ചാമതാണ്. നാലാം സ്ഥാനത്തുള്ള സിറ്റിക്ക് 27 കളികളില് നിന്ന് 47 പോയിന്റാണുള്ളത്.
