കാബൂള്: അഫ്ഗാനിസ്ഥാനിലെ ഭാരത കോണ്സുലേറ്റിനുനേര്ക്കുണ്ടായ ഭീകരാക്രമണത്തില് മൂന്നു പേര് കൊല്ലപ്പെട്ടു. രണ്ടു സാധാരണക്കാരും ഒരു പോലീസുകാരനുമാണ് കൊല്ലപ്പെട്ടത്. ആക്രമണത്തില് 19 പേര്ക്കു പരിക്കേറ്റു. പരിക്കേറ്റവരെ ആശുപത്രിയില് പ്രവേശിപ്പിച്ചതായി ടോളോ വാര്ത്താ ഏജന്സി റിപ്പോര്ട്ട് ചെയ്തു. ഇവരില് കോണ്സുലേറ്റ് അംഗങ്ങള് ആരുമില്ലെന്നു വിദേശകാര്യമന്ത്രാലയ വക്താവ് വികാസ് സ്വരൂപ് അറിയിച്ചു.
നന്ഗര്ഹര് പ്രവിശ്യയുടെ തലസ്ഥാനമായ ജലാലാബാദ് നഗരത്തിലെ ഭാരത കോണ്സുലേറ്റിനു നേര്ക്കാണ് അഞ്ചംഗ ഭീകരസംഘം ആക്രമണം നടത്തിയത്. സൈന്യം നടത്തിയ തിരിച്ചടിയില് നാലു ഭീകരരും കൊല്ലപ്പെട്ടു. ശരീരത്തില് സ്ഫോടക വസ്തുക്കള് ഘടിപ്പിച്ചെത്തിയ ചാവേര് ഭാരത കോണ്സുലേറ്റിനു പുറത്ത് സ്വയം പൊട്ടിത്തെറിക്കുകയായിരുന്നു.
തൊട്ടു പിന്നാലെ നാലു ഭീകരര് വെടിവയ്പ്പ് ആരംഭിച്ചു. ഇന്തോ-ടിബറ്റന് ബോര്ഡര് പോലീസ് ഫോഴ്സും അഫ്ഗാന് സുരക്ഷാ സേനയും സംയുക്തമായാണ് ഭീകരരെ നേരിട്ടത്.
ആക്രമണത്തിന്റെ ഉത്തരവാദിത്വം ആരും ഏറ്റെടുത്തിട്ടില്ല. സ്ഫോടനത്തിലും വെടിവയ്പിലും സമീപത്തെ കെട്ടിടങ്ങളുടെ ജനലുകളും വാതിലുകളും നശിച്ചു. എട്ടു കാറുകള് പൂര്ണമായും തകര്ന്നു. ഏതാനും മാസങ്ങള്ക്ക് മുന്പും അഫ്ഗാനിലെ ഭാരത കോണ്സുലേറ്റിന് നേരെ ഭീകരാക്രമണം നടന്നിരുന്നു.
