കോഴിക്കോട്: മുഖ്യമന്ത്രി ഉമ്മന്ചാണ്ടി ഇന്നലെ അവതരിപ്പിച്ച ബജറ്റില് കോഴിക്കോടിന് കാര്യമായ പ്രാതിനിധ്യമില്ല. ചില നാമമാത്ര പദ്ധതികള് മാത്രമാണ് കോഴിക്കോടിന് മുഖ്യമന്ത്രി പ്രഖ്യാപിച്ചിട്ടുള്ളത്. കോഴിക്കോട് കാത്തിരുന്ന സ്വപ്ന പദ്ധതികള്ക്കൊന്നും ബജറ്റില് വേണ്ട പരിഗണന നല്കിയിട്ടില്ല. കോഴിക്കോട്ടെ വ്യാപാരി വ്യവസായി സമൂഹത്തെ പാടേ അവഗണിക്കുന്നതാണ് ബജറ്റെന്ന് വ്യാപാരി വ്യവസായി സമൂഹവും വിമര്ശനമുന്നയിച്ചു കഴിഞ്ഞു.
കരിപ്പൂര് വിമാനത്താവള വികസനം, ബേപ്പൂര് തുറമുഖ വികസനം എന്നിവയൊന്നും ബജറ്റില് സ്ഥാനം പിടിച്ചിട്ടില്ല. കഴിഞ്ഞ തവണ രാമനാട്ടുകരയില് അനുവദിച്ച ഫുട്ട് വെയര് പാര്ക്കിന് ഇത്തവണയും എട്ട് കോടി രൂപ നീക്കിവെച്ചിട്ടുണ്ട്. മാവൂര് ഗ്വാളിയോര് റയോണ്സിന്റെ ഉപയോഗശൂന്യമായ ഭൂമിയില് സ്വകാര്യ പങ്കാളിത്തത്തോടെ വികസനം കൊണ്ടുവരുമെന്ന് പറയുന്നുണ്ടെങ്കിലും അതെന്താണെന്ന് വ്യക്തമാക്കാന് മുഖ്യമന്ത്രിക്കായിട്ടില്ല. കുതിരവട്ടം മാനസികാരോഗ്യ കേന്ദ്രം നവീകരിക്കാന് 30 കോടി രൂപ നീക്കിവെച്ചിട്ടുള്ളതൊഴിച്ചാല് ചില ചെറുകിട പദ്ധതികള്ക്ക് മാത്രമാണ് പണം നീക്കിവെച്ചിരിക്കുന്നത്.
വൈക്കം മുഹമ്മദ് ബഷീര് സ്മാരകത്തിന് ഇത്തവണയും 25 ലക്ഷം രൂപ നീക്കിവെച്ചിട്ടുണ്ട്. കഴിഞ്ഞ വര്ഷത്തെ ബജറ്റിലും സ്മാരകത്തിന് ഫണ്ട് നീക്കിവെച്ചിട്ടുണ്ടായിരുന്നെങ്കിലും പ്രവര്ത്തനങ്ങള് മുന്നോട്ട് പോയിരുന്നില്ല. മൂടാടിയില് കേളപ്പജി സ്മാരക നിര്മ്മാണത്തിനായി 15 ലക്ഷം രൂപ മാത്രമാണ് നീക്കിവെച്ചത്.
ബീച്ചാശുപത്രിയില് കാത്ത് ലാബ് നിര്മ്മാണത്തിന് അഞ്ചരകോടി, വടകര അഴിത്തലയില് ഫിഷ് ലാന്ഡിംഗ് സെന്ററിനായി 1.78 കോടി, താമരശ്ശേരിയില് ജൈവ സംരക്ഷണ പാര്ക്ക്, ചാലിയത്ത് ഔഷധ സസ്യ സംരക്ഷണ കേന്ദ്രം, കൊടുവള്ളി ബൈപ്പാസിനായി ഒന്നര കോടി രൂപ, മാനാഞ്ചിറ-വെള്ളിമാട്കുന്ന് റോഡ് വികസനം, തൊണ്ടയാട്, രാമനാട്ടുകര എന്നിവിടങ്ങളില് ഫ്ളൈ ഓവര്, നഗര റോഡ് വികസനം എന്നിവയെല്ലാമാണ് ബജറ്റില് സ്ഥാനം പിടിച്ച മറ്റു പദ്ധതികള്.
കോഴിക്കോട്ടെ വ്യാപാരി വ്യവസായി സമൂഹം ഒന്നടങ്കം ബജറ്റിനെതിരെ രംഗത്തു വന്നുകഴിഞ്ഞു. ഓള് കേരള കണ്സ്യൂമര് ഗുഡ്സ് ഡിസ്ട്രിബ്യൂട്ടേഴ്സ് അസോസിയേഷന്, അഖിലേന്ത്യാ ആയുര്വേദ സോപ്പ് നിര്മ്മാണ-വിതരണ അസോസിയേഷന്, കോഴിക്കോട് ഡിസ്ട്രിക്ട് മര്ച്ചന്റ്സ് അസോസിയേഷന്, സിറ്റി മര്ച്ചന്റ്സ് അസോസിയേഷന്, മലബാര് ഡവലപ്മെന്റ് കൗണ്സില്, കേരള വ്യാപാരി വ്യവസായി ഏകോപന സമിതി എന്നീ സംഘടനകളാണ് ശക്തമായ പ്രതിഷേധവുമായി രംഗത്തെത്തിയിട്ടുള്ളത്.
