നയതന്ത്ര വിദഗ്ദ്ധനും ഉന്നത വിദ്യാഭ്യാസ കൗണ്സില് വൈസ് ചെയര്മാനുമായ ടി.പി.ശ്രീനിവാസനെ തെരുവില് കയ്യേറ്റം ചെയ്ത എസ്എഫ്ഐക്കാരുടെ നടപടി അത്യന്തം ദൗര്ഭാഗ്യകരമായിപ്പോയി. അതിലേറെ അപലപനീയമാണ് സംഭവത്തെക്കുറിച്ചുള്ള പിണറായി വിജയന്റെ പ്രതികരണം.
കാടത്തം കാട്ടിയ വിദ്യാര്ത്ഥി നേതാവിനോട് ‘അരുത്’ എന്നു പറയുന്നതിനുപകരം ടി.പി.ശ്രീനിവാസന് വിദ്യാഭ്യാസ വിദഗ്ദ്ധനല്ലെന്നു ഇകഴ്ത്തി പ്രതികരിച്ച പിണറായി വിജയന് നവകേരള മാര്ച്ച് നടത്തുന്നത് അപഹാസ്യമാണ്. ‘മതനിരപേക്ഷ, അഴിമതി വിമുക്ത-വികസിത കേരളം’ എന്ന മുദ്രാവാക്യത്തോടൊപ്പം ‘അക്രമരഹിത കേരളം’ എന്ന മുദ്രാവാക്യം കൂട്ടിച്ചേര്ക്കുന്നതും അതിനായി ആത്മാര്ത്ഥമായി പരിശ്രമിക്കുന്നതും നവകേരള മാര്ച്ചിന്റെ നായകന് അഭികാമ്യമായിരിക്കും.
ലോകരാജ്യങ്ങളില് പലതിലും ഭാരത അംബാസഡറായി സേവനം അനുഷ്ഠിച്ച് പ്രാഗത്ഭ്യം തെളിയിച്ച ടി.പി.ശ്രീനിവാസന് ഉന്നതമായ വികസനകാഴ്ചപ്പാടുള്ള വ്യക്തിയാണ്. അദ്ദേഹത്തിന്റെ സേവനം കേരളത്തിന്റെ ഉന്നത വിദ്യാഭ്യാസ മേഖലയില് വലിയ മാറ്റങ്ങള്ക്കു പ്രചോദനമാകുമെന്നതിനാലാണ് അദ്ദേഹത്തെ ഉന്നത വിദ്യാഭ്യാസ കൗണ്സില് വൈസ് ചെയര്മാനായി നിയമിച്ചിട്ടുള്ളത്.
സിവില് സര്വീസ് പരീക്ഷകളില് വളരെ പിന്നാക്കംനിന്ന കേരളത്തില്നിന്നും കഴിഞ്ഞ ഏതാനും വര്ഷങ്ങള്കൊണ്ട് നൂറോളം പേര്ക്ക് ഐഎഎസ്,ഐഎഫ്എസ്,ഐപിഎസ് തുടങ്ങിയ ഉദ്യോഗങ്ങളില് പ്രവേശനം ലഭ്യമാകുവാന് കാരണമായ സിവില് സര്വീസ് പരിശീലന കേന്ദ്രത്തിനു നേതൃത്വം നല്കുന്നുവെന്ന ഒറ്റക്കാരണം കൊണ്ടുതന്നെ ടി.പി.ശ്രീനിവാസന് കേരള സമൂഹത്തിന് സര്വാദരണീയനായിത്തീരുന്നു. അത്തരമൊരു മഹദ്വ്യക്തിത്വത്തെ അപമാനിച്ച അക്രമികള്ക്കു പ്രബുദ്ധ കേരളം മാപ്പുനല്കില്ല.
ആഗോളവിദ്യാഭ്യാസ സംഗമത്തെ കണ്ണടച്ചാക്ഷേപിക്കുമ്പോള് പിണറായി വിജയന് മാര്ച്ച് നടത്തുന്നത് പിറകോട്ടാണെന്ന സത്യം മനസ്സിലാക്കുന്നതു ഉചിതമായിരിക്കും.
എന്.റാം, ആലപ്പുഴ
