കോട്ടയം: ശരീരം തളര്ന്ന് അവശനിലയില് കഴിയുന്ന വേളൂര് ഭാമശ്ശേരി കോളകത്ത് വീട്ടില് രാജുവിന്റെ നടപ്പുവഴി അയല്വാസി അടച്ചുകെട്ടി.
ഇതോടെ പുറത്തിറങ്ങാന് കഴിയാതായ രാജുവിനെ നാട്ടുകാര് കസേരയിലെടുത്ത് മതിലിന് മുകളില് കൂടി കടത്തിയാണ് ആശുപത്രിയിലെത്തിച്ചിരുന്നത്. സംഭവമറിഞ്ഞ് സ്ഥലത്തെത്തിയ ബിജെപി, ഹിന്ദുഐക്യവേദി പ്രവര്ത്തകര് ഇന്നലെ വേലി പൊളിച്ച് നടപ്പുവഴി പുനസ്ഥാപിച്ചു. അനധികൃതമായി വഴികൈയേറിയ അയല്വാസിയായ കുറ്റിക്കല് വത്സല സിപിഎം ബ്രാഞ്ച് സെക്രട്ടറിയുടെ സഹോദരിയാണെന്ന് പറയുന്നു.
വേലി പൊളിക്കുന്നത് തടയാന് ബ്രാഞ്ച് സെക്രട്ടറിയുടേയും സഹോദരന്റേയും നേതൃത്വത്തില് ഒരു സംഘം ഗുണ്ടാസംഘമെത്തിയിരുന്നു. എന്നാല് നാട്ടുകാര് തങ്ങള്ക്ക് എതിരാകുമെന്നറിഞ്ഞ് കൈയേറ്റത്തിന് മുതിരാതെ ബഹളമുണ്ടാക്കി പിന്തിരിയുകയായിരുന്നു. രാജുവിന് പരാശ്രയമില്ലാതെ ഒരു കാര്യവും ചെയ്യാന് കഴിയാതായതോടെ കുടുംബത്തിലെ ഏക ആശ്രയമായ സോണിയക്ക് പണിക്ക് പോവാനും കഴിയാത്ത അവസ്ഥയായി. നാട്ടുകാര് മതിലിന് മുകളില്ക്കൂടി നല്കുന്ന ഭക്ഷണം കഴിച്ചാണ് പട്ടികജാതി വിഭാഗത്തില്പ്പെട്ട ഈ കുടുംബം ജീവന് നിലനിര്ത്തുന്നത്. വഴി പുനസ്ഥാപിച്ച് രാജുവിനെ ആശുപത്രിയിലെത്തിക്കുവാന് ബിജെപി ജില്ലാ ജനറല് സെക്രട്ടറി എന്. ഹരി, മഹിളാ ഐക്യവേദി സംസ്ഥാന ജനറല് സെക്രട്ടറി ബിന്ദു മോഹന്, നേതാക്കളായ ആശാ അജികുമാര്, സുമേഷ് കിളിരൂര്, വൈ. സുരേഷ്, വി.പി. മുകേഷ്, വിനോദിനി വിജയകുമാര്, എസ്. രവി, എസ്. ഹരികുമാര്, മുട്ടമ്പലം മധു, എസ്. മനു എന്നിവര് നേതൃത്വം നല്കി.
