കോഴിക്കോട്: മെഡിക്കല് കോളേജ് ആശുപത്രിയില് നിന്ന് ചികിത്സയ്ക്കിടെ കാണാതായ അമ്മയെയും മകളെയും കണ്ടെത്താനായില്ല. ആശുപത്രിയിലെ നാല്പ്പത്തിയാറാം വാര്ഡില് ചികിത്സയിലായിരുന്ന 20 വയസ്സുകാരി ശ്രേയയെയും കൂട്ടിരുന്ന ശ്രേയയുടെ അമ്മ ഗിരിജ (45) യെയുമാണ് ദുരൂഹ സാഹചര്യത്തില് ഡിസംബര് 21 മുതല് കാണാതായത്.
ശ്വാസതടസ്സം ഉള്പ്പെടെയുള്ള രോഗം ബാധിച്ചാണ് ശ്രേയയെ നവംബര് അഞ്ചിന് ആശുപത്രിയില് പ്രവേശിപ്പിച്ചത്. ചൈല്ഡ് ലൈനും പാലിയേറ്റീവ് പ്രവര്ത്തകരുടെയും സഹായത്തോടെയാണ് ശ്രേയയെ ആശുപത്രിയില് എത്തിച്ചത്. എന്നാല് ചികിത്സയ്ക്കിടെ ഇവരെ ദുരൂഹസാഹചര്യത്തില് കാണാതാവുകയായിരുന്നു.
തലശ്ശേരി കിഴക്കെ കതിരൂര് സ്വദേശിയായ കോപ്പാടിക്കണ്ടി രവീന്ദ്രന്റെ ഭാര്യയും മകളുമാണ് ഗിരിജയും ശ്രേയയും. സാമ്പത്തികമായ വളരെ പ്രയാസത്തില് കഴിയുന്ന രവീന്ദ്രന് കുടുംബസമേതം അഞ്ചു വര്ഷമായി കോഴിക്കോട് പെരുമണ്ണയില് വാടക വീട്ടിലാണ് താമസം. നഗരത്തിലെ ഒരു തുണി മൊത്ത വ്യാപാര സ്ഥാപനത്തിലെ ജോലിക്കാരനാണ് ഇയാള്.
ഭാര്യയെയും മകളെയും കുറിച്ച് അന്വേഷിച്ചെന്നും പക്ഷെ യാതൊരു വിവരവും കിട്ടിയില്ലെന്നും രവീന്ദ്രന് വാര്ത്താസമ്മേളനത്തില് പറഞ്ഞു.
രവീന്ദ്രന്റെ പരാതിയെ തുടര്ന്ന് മെഡിക്കല് കോളേജ് പോലീസ് കേസെടുത്ത് അന്വേഷണം ആരംഭിച്ചിട്ടുണ്ടെങ്കിലും കാണാതായവരെക്കുറിച്ച് വിവരമൊന്നും ലഭിച്ചിട്ടില്ല. 20 വര്ഷത്തോളം രവീന്ദ്രനും കുടുംബവും ബംഗളൂരുവില് താസമിച്ചിരുന്നു. അതുകൊണ്ട് തന്നെ ബംഗളൂരുവില് ഉള്പ്പടെ അന്വേഷണം നടത്തി. ഇരിട്ടിയിലാണ് ഗിരിജയുടെ വീട്. ജില്ലാ കലക്ടര്ക്കും മുഖ്യമന്ത്രിയ്ക്കും ഉള്പ്പെടെ പരാതി നല്കിയിട്ടുണ്ട് രവീന്ദ്രന്.
