ആലുവ: വിമാനത്താവളത്തിന്റെ സാധ്യത ചൂണ്ടിക്കാട്ടി നെടുമ്പാശ്ശേരി, കാഞ്ഞൂര്, ശ്രീമൂലനഗരം, ചെങ്ങമനാട് പഞ്ചായത്തുകളിലെ നെല്പ്പാടങ്ങള് ഇല്ലാതാക്കിയതുപോലെ മെട്രോ ചൂണ്ടികാട്ടി ചൂര്ണിക്കര, കടുങ്ങല്ലൂര് പഞ്ചായത്തുകളിലെ നെല്പ്പാടങ്ങളും ഇല്ലാതാക്കുന്നു.
മെട്രോ റെയിലിന്റെ സാധ്യത ചൂണ്ടിക്കാട്ടി ചിലര് ഏക്കര് കണക്കിന് നെല്പ്പാടങ്ങളാണ് മുന്കൂര് തുക നല്കി വില്പ്പനയ്ക്കായി കരാറാക്കി വച്ചിരിക്കുന്നത്. പല ഭൂമിയും ഏറ്റെടുക്കാന് കുടുംബശ്രീയും മറ്റും സന്നദ്ധ പ്രകടിപ്പിക്കുന്നുണ്ടെങ്കിലും കൃഷിഭവന് ഉദ്യോഗസ്ഥരേയും റിയല് എസ്റ്റേറ്റ് ലോബി കയ്യിലെടുത്തിരിക്കുകയാണ്.
സര്ക്കാര് ജോലിക്കുപോലും പോകാതെ കൃഷി നടത്തി വന് വസ്തുവകകള് സമ്പാദിച്ച പലരുടേയും പുതിയ തലമുറയെ കൃഷിഭാവിയില് വന് നഷ്ടത്തിനിടയാക്കുമെന്ന് തെറ്റിദ്ധരിപ്പിച്ചാണ് വില്പ്പന നടത്തിക്കുന്നത്. സ്വത്തു വിഭജനത്തിനുവേണ്ടി കലഹം സൃഷ്ടിച്ചും ഇവര് മുതലെടുപ്പു നടത്തുന്നുണ്ട്.
കൃഷി ചെയ്യാതെ ഭൂമി തരിശാക്കിയിട്ടശേഷം പച്ചക്കറി കൃഷി നടത്താനെന്ന പേരില് പാടത്ത് തടവും മറ്റുമെടുത്ത് കുറെശ്ശെയാക്കി നികത്തിയെടുക്കുകയാണ് ചെയ്യുന്നത്. മൂന്ന് പൂവ് കൃഷി ചെയ്തിരുന്ന ഏക്കര് കണക്കിന് ഭൂമിയാണ് റിയല് എസ്റ്റേറ്റ് ലോബി മുന്കൂര് തുക നല്കി കൈക്കലാക്കിയിരിക്കുന്നത്.
