അഴിമതി ആരോപണം സംബന്ധിച്ച് ദല്ഹി മുഖ്യമന്ത്രി അരവിന്ദ് കേജ്രിവാളിന്റെ ചീഫ് സെക്രട്ടറിയായ രാജേന്ദ്രകുമാറിന്റെ ഓഫീസും വീടും ഉള്പ്പെടെ പതിനാലിടങ്ങളില് സിബിഐ റെയ്ഡ് നടത്തിയത് കേജ്രിവാളിനെ അരിശംകൊള്ളിച്ചു. രാഷ്ട്രീയമായി തന്നെ നേരിടുവാന് കെല്പില്ലാത്ത നരേന്ദ്ര മോദി സിബിഐയെ തനിക്കെതിരെ തിരിച്ചുവിട്ടിരിക്കുകയാണെന്ന് കേജ്രിവാള് കുറ്റപ്പെടുത്തി. മോദി ഭീരുവാണെന്നും മനോരോഗിയാണെന്നും അധിക്ഷേപിച്ചു. രാജേന്ദ്രകുമാറിനെതിരെയുള്ള അന്വേഷണം തനിക്കെതിരെയുള്ളതാണെന്ന് കേജ്രിവാള് കരുതി.
രാജേന്ദ്രകുമാറിനെതിരായ അഴിമതി ആരോപണങ്ങള് 2007-14 കാലഘട്ടത്തില് ഉന്നയിക്കപ്പെട്ടതാണ്. ബന്ധുക്കളെയും വേണ്ടപ്പെട്ടവരെയും ഡയറക്ടര്മാരാക്കി രാജേന്ദ്രകുമാര് തുടങ്ങിയ ചില കമ്പനികള് ദല്ഹി വാട്ടര് അതോറിറ്റിയില്നിന്നും 2.46 കോടി രൂപക്കുള്ള കരാറുകളടക്കം മറ്റു ചില കരാറുകളും വഴിവിട്ട് നേടിയിരുന്നു.
കേന്ദ്രസര്ക്കാര് ഉദ്യോഗസ്ഥന് അഷീസ് ജോഷി ഈവര്ഷം (2015) ആദ്യം ദല്ഹി പോലീസില് രാജേന്ദ്രകുമാര് നടത്തിയ അഴിമതികളെ സംബന്ധിച്ച് ഫയല്െചയ്ത ഹര്ജി, ജൂലായ്മാസത്തില് ദല്ഹി പോലീസ് സിബിഐ അന്വേഷണത്തിന് അയച്ചുകൊടുത്തു. ജോഷിയെ കൂടാതെ, അഴിമതിവിരുദ്ധ പ്രവര്ത്തനത്തിലേര്പ്പെട്ടിരിക്കുന്ന രാജ്യാന്തര സംഘടനയായ ‘ട്രാന്സ്പറന്സി ഇന്റര്നാഷണലും’ രാജേന്ദ്രകുമാറിനെതിരായി അഴിമതി ആരോപണങ്ങള് ദല്ഹി മുഖ്യമന്ത്രി കേജ്രിവാളിനോട് അന്വേഷിക്കുവാന് ആവശ്യപ്പെട്ടിരുന്നു. രാജേന്ദ്രകുമാര് ബന്ധപ്പെട്ട കമ്പനികള് ആം ആദ്മി പാര്ട്ടിക്ക് നല്കിയ സംഭാവനകളും അന്വേഷണവിധേയമാക്കണമെന്നുംകൂടി ആവശ്യപ്പെട്ടിരുന്നു. ഈ ആവശ്യങ്ങള് കേജ്രിവാള് അവഗണിച്ചു.
അഴിമതി ആരോപണങ്ങള് സംബന്ധിച്ച അന്വേഷണങ്ങള് നടന്നുകൊണ്ടിരിക്കുമ്പോള്തന്നെ രാജേന്ദ്രകുമാറിനെ കേജ്രിവാള് ആദ്യം മുഖ്യമന്ത്രിയായപ്പോള് പേഴ്സണല് സെക്രട്ടറിയായും രണ്ടാംതവണ അധികാരത്തിലേറിയപ്പോള് ചീഫ് സെക്രട്ടറിയായും നിയമിച്ചു. ചീഫ് സെക്രട്ടറിയുടെ ചുമതലകള്ക്ക് പുറമെ, സേവനവകുപ്പിന്റെ ചുമതലകളും രാജേന്ദ്രകുമാറിന് നല്കപ്പെട്ടിട്ടുണ്ട്. ഈ പദവികള് പ്രയോജനപ്പെടുത്തി സ്വന്തം കമ്പനികളെ പോഷിപ്പിക്കുവാന് രാജേന്ദ്രകുമാര് എന്തെങ്കിലും ചെയ്തിട്ടുണ്ടെങ്കില് തുടര്ന്നുള്ള അന്വേഷണങ്ങളില് വെളിച്ചത്തുവരും.
അഴിമതിവിരുദ്ധ സമരത്തിലൂടെയായിരുന്നു കേജ്രിവാളിന്റെ രാഷ്ട്രീയ രംഗപ്രവേശവും ആം ആദ്മി പാര്ട്ടിയുടെ ഉദയവും. അഴിമതി അന്വേഷണത്തിനു വിധേയനായ രാജേന്ദ്രകുമാറിനെ ആദ്യം പേഴ്സണല് സെക്രട്ടറിയായും പിന്നീട് കേന്ദ്രഭരണപ്രദേശിന്റെ ചീഫ് സെക്രട്ടറിയായും നിയമിക്കുവാന് കേജ്രിവാളിന് എന്തായിരുന്നു നിര്ബന്ധം? രാജേന്ദ്രകുമാറിനെതിരെയുള്ള അന്വേഷണം തനിക്കെതിരെയുള്ളതാണെന്ന് കരുതി കേജ്രിവാള് എന്തിന് വിറൡപിടിക്കണം?
ആദ്യം മോദിക്കെതിരെ വിഷം തുപ്പിയ കേജ്രിവാള്, പിന്നീട് അരുണ് ജെറ്റ്ലിയെ ലക്ഷ്യംവെച്ച് ആരോപണങ്ങള് ഉന്നയിക്കുവാന് തുടങ്ങി. ദല്ഹി തെരഞ്ഞെടുപ്പ് സമയത്ത് ചില പ്രതേ്യക വ്യക്തികള് മാത്രം ഡയറക്ടര്മാരായ, മേല്വിലാസം കപടമായ നാലു കമ്പനികള് രണ്ട് കോടി രൂപ (ഓരോ കമ്പനിയും 50 ലക്ഷം രൂപ വീതം) ആം ആദ്മി പാര്ട്ടിക്ക് സംഭാവനകള് നല്കിയതിനെ ധനകാര്യമന്ത്രാലയം അന്വേഷിക്കുവാന് ഉദ്ദശിക്കുന്നുണ്ടെന്ന വിവരങ്ങള് കേജ്രിവാളിന് ലഭിച്ചിരിക്കാം. അതുകൊണ്ടാണ് ജെറ്റ്ലിക്കെതിരെ കേജ്രിവാള് തിരിഞ്ഞതെന്നാണ് ദല്ഹി രാഷ്ട്രീയവൃത്തങ്ങള് ഊഹിക്കുന്നത്.
അഴിമതി തുടച്ചുനീക്കുവാന് അവതരിച്ച ദേവദൂതനായി പ്രശംസിക്കപ്പെട്ട കേജ്രിവാള് തരംതാഴ്ന്ന രാഷ്ട്രീയ കുതന്ത്രങ്ങള് സ്വീകരിക്കുകയാണ്. ഒരുപക്ഷേ, ഇത് കേജ്രിവാളിന്റെ മറുവശമായിരിക്കാം!
