കൊച്ചി: ഗതാഗത നിയമങ്ങള്‍ നടപ്പാക്കുമ്പോള്‍ കൃത്യമായ അവബോധമാണ് ആദ്യം നല്‍കേണ്ടതെന്ന് റോഡ് സുരക്ഷ കമ്മറ്റി ചെയര്‍മാന്‍ ജസ്റ്റിസ് കെ.എസ്. രാധാകൃഷണന്‍. മോട്ടോര്‍ വാഹന വകുപ്പും കൊച്ചിന്‍ പെരിയാര്‍ റോട്ടറി ക്ലബ്ബും നാഷണല്‍ സര്‍വീസ് സ്‌കീമിന്റെ സഹകരണത്തോടെ നടപ്പാക്കിയ തേര്‍ഡ് ഐ ഫോട്ടോഗ്രാഫി മത്സരത്തിന്റെ സമ്മാന വിതരണവും റോഡ് ബോധവത്ക്കരണ വാരവും ഉദ്ഘാടനം ചെയ്യുകയായിരുന്നു അദ്ദേഹം.
ഏറ്റവും കൂടുതല്‍ വാഹനാപകടങ്ങള്‍ ഉണ്ടാക്കുന്ന സംസ്ഥാനങ്ങളില്‍ ഇന്ത്യയില്‍ ഏഴാമതാണ് കേരളം. അതിനാല്‍ റോഡ് സുരക്ഷ പ്രായോഗികമായി നടപ്പാക്കേണ്ടത് അത്യാവശ്യമാണെന്നും അദ്ദേഹം പറഞ്ഞു. ഗേതാഗത നിയമങ്ങള്‍ നടപ്പാക്കുമ്പോള്‍ കൃത്യമായ അവബോധം നല്‍കുകയാണ് ആദ്യം ചെയ്യേണ്ടത്. അജ്ഞാത വാഹനമിടിച്ചുണ്ടാകുന്ന അപകടങ്ങളില്‍ വാഹനം കണ്ടെത്തേണ്ടത് പോലീസിന്റെ ഉത്തരവാദിത്വമാണെന്നും വാഹനമിടിച്ചു പരിക്കേല്‍ക്കുകയോ മരണപ്പെടുകയോ ചെയ്യുന്നവര്‍ക്ക് ഇന്‍ഷുറന്‍സ് പരിരക്ഷ ഉറപ്പാക്കണമെന്നും അദ്ദേഹം പറഞ്ഞു.
ലക്ഷങ്ങള്‍ വിലയുള്ള ബൈക്ക് മക്കള്‍ക്ക് ആവശ്യമാണോ എന്ന് രക്ഷകര്‍ത്താക്കള്‍ ചിന്തിക്കണമെന്ന് ചടങ്ങില്‍ അധ്യക്ഷത വഹിച്ച ഗതാഗത മന്ത്രി തിരുവഞ്ചൂര്‍ രാധാകൃഷ്ണന്‍ പറഞ്ഞു. തേര്‍ഡ് ഐ എന്ന പേരില്‍ കേരള മോട്ടോര്‍ വാഹന വകുപ്പു നടത്തിയ ഫോട്ടോഗ്രാഫി മത്സരത്തിലൂടെ കൊച്ചി നഗരത്തിലെ 13 ഇടങ്ങളില്‍ നിന്നായി പകര്‍ത്തിയ മുന്നൂറോളം ചിത്രങ്ങളില്‍ നിന്നാണ് വിജയികളെ നിശ്ചയിച്ചത്. ഒന്നാം സമ്മാനമായ 15000 രൂപയും പ്രശസ്തി പത്രവും യാസീന്‍ എം കബീര്‍ കരസ്ഥമാക്കി. രണ്ടാം സമ്മാനം 10000 രൂപ എ അനീഷും മൂന്നാം സമ്മാനം ക്ലിന്‍ ജോസ്, സിസിന്‍ എന്നിവര്‍ പങ്കുവെച്ചു. ചടങ്ങില്‍ ഗതാഗത കമ്മീഷണര്‍ ടോമിന്‍ ജെ. തച്ചങ്കരി സ്വാഗതം ആശംസിച്ചു. കുസാറ്റ് വിസി ജെ. ലത, ജില്ല കളക്ടര്‍ എം.ജി. രാജമാണിക്യം, എസ്പി യതീഷ്ചന്ദ്ര, കളമശേരി നഗരസഭാധ്യക്ഷ ജെസി പീറ്റര്‍ എന്നിവര്‍ പങ്കെടുത്തു.
