പണ്ടൊരു സുവിശേഷക്കാരന് ക്രിസ്തുമതം പ്രചരിപ്പിക്കാന് മദ്രാസില് ചെന്നു. ആറുമാസം കൊട്ടിപ്പാടി ഒത്തിരിപ്പേരുടെ ‘മുഴ മാറ്റിയിട്ടും’ മാമോദീസ മുക്കാന് ഒരുത്തനേം കിട്ടിയില്ല. ഒടുവില് പുള്ളിക്കാരന് കമ്യൂണിസ്റ്റുകാരെപ്പോലെ ഒരു അടവു നയം പ്രയോഗിച്ചും. ഒരമ്പലം പണിത് ശിവലിംഗം പ്രതിഷ്ഠിച്ചു; ശിവന്റെ നെറുകയില് ഒരു കുരിശും! ‘നമഃശിവായ’ എന്നത് ‘നമഃ ഈശോവായ’ എന്നാക്കി മാറ്റി. സംഗതി ഒകെ. അതുപോലെ കണ്ണൂരില് കമ്മ്യൂണിസ്റ്റുകള് ‘മതേതരയോഗ’ ആരംഭിച്ചിരിക്കുന്നു.
വെള്ള യൂണിഫോമിലായിരിക്കും ആസനം. മന്ത്രങ്ങള് വേണ്ടെന്നായിരുന്നു ആദ്യ തീരുമാനം. അപ്പോഴുണ്ട് യോഗാചാര്യന്റെ വിശദീകരണം മന്ത്രങ്ങളുടെ ദിവ്യത്വമല്ല, അതുരുവിടുമ്പോഴുള്ള ശ്വസനതാളമാണു പ്രധാനം. അവയ്ലബിള് പൊളിറ്റ് ബ്യൂറോ കൂടി തീരുമാനം തിരുത്തി. എങ്കില് മിത്രായ നമഹ: വേണ്ട, മാര്ക്സായ നമഹ, കോടിയേരിയെ നമഹ, അച്യുതാനന്ദ യച്ചൂരി പിണറായിയെ നമഹ. ഇവയിലേതെങ്കിലുമൊക്കെയാവാം. യോഗയോടോ സംസ്കാരത്തോടോ ഉള്ള പ്രതിബദ്ധതയൊന്നുമല്ലെന്നു പറയേണ്ടതിലല്ലോ. പഴയ പാസ്റ്ററെപ്പോലെ ‘പിള്ളാരെ പിടിക്കാനുള്ള’ ഒരഭ്യാസം, അത്രതന്നെ. അമ്പലക്കമ്മറ്റികളില് കയറിപ്പറ്റാന് കഴിഞ്ഞില്ലെങ്കില് അമ്പലം പണിത് അരിവാള് ചുറ്റിക നക്ഷത്രം (കോണ്ഗ്രസുമായുള്ള ലയനം കഴിഞ്ഞാല് അരിവാള് ചുറ്റിക കൈപ്പത്തി) പ്രതിഷ്ഠിക്കാനാണു പ്ലീന തീരുമാനം.
ആര്എസ്എസുകാര് എങ്ങനെയാണ് ആളുകൂട്ടുന്നതെന്ന രഹസ്യം ഇടതുബുദ്ധിജീവികള് കണ്ടുപിടിച്ചുകഴിഞ്ഞു. ഇനി സംഘപരിവാറിന്റെ കാര്യം സ്വാഹാ. ഈയിടെ ഇവിടെയടുത്തൊരു ഇടതുക്ലബിന്റെ വാര്ഷികത്തിന് ദൈവദശകം ചൊല്ലിക്കേട്ടു-വെള്ളാപ്പള്ളിയെ തോല്പ്പിക്കാന്! അല്ലാതെ ദൈവദശകത്തോട് ആദരവുണ്ടായിരുന്നെങ്കില് എന്നേ ചെയ്യേണ്ടതായിരുന്നു. ഇപ്പോള് സഖാക്കളുടെ മുന്നിലുള്ള പ്രശ്നം മറ്റൊന്നാണ്. മോദി വരുമ്പോള് ആളുകൂടുന്നു. മോദിക്കു പകരം ആരെ ഇറക്കും? സ്വച്ഛ് ഭാരതും യോഗയും ആര്.ശങ്കറിനേയുമൊക്കെ കേരളീയനു പരിചയപ്പെടുത്തിയതു മോദിയാണല്ലോ. ആ മോദിയാണെങ്കില് ശ്രീകൃഷ്ണനെയും ശ്രീനാരായണനെയും യോഗയും പോലെ ‘പൊതു’ അല്ലതാനും. മോദിക്കു പകരം മോദി മാത്രമേയുള്ളൂ എന്നു തിരിച്ചറിഞ്ഞ് മണിക് സര്ക്കാര് മോദിയെത്തന്നെ ക്ഷണിച്ചു. പക്ഷേ കണ്ണൂര് സഖാക്കള്…? ഛര്ദ്ദിച്ചതൊക്കെ ഭക്ഷിക്കാനും അതിനെ ന്യായീകരിക്കാനുമുള്ള അവരുടെ അധരവ്യായാമ പാടവമാണല്ലോ പറഞ്ഞുവരുന്നത്, അതുകൊണ്ട് ഇതും കാത്തിരുന്ന് കാണാം.
നായ മൂരി നിവര്ത്തുന്നതാണ് യോഗ എന്നാണ് യച്ചൂരാന് പരിഹസിച്ചത്. ആ യെച്ചൂരിക്കിട്ട് പണി കൊടുക്കാനാണോ കണ്ണൂര് സഖാക്കളുടെ ഈ പണി? അറംപറ്റിയപോലെ അവരുടെ ത്രിപുരയില്ത്തന്നെ ഔദ്യോഗികമായി നായകള് മൂരി നിവര്ത്തി കോട്ടുവായിടാന് തുടങ്ങി. കേരളത്തിലും ചെമ്പന് നായകള് ആസനം കുടഞ്ഞു മൂരി നിവര്ത്താന് തുടങ്ങുമ്പോള് ബിജെപി നേതൃത്വം ശ്രദ്ധിക്കുക-ഇനി മോദിയെ അധികം പുറത്തുവിടണ്ട. സഖാക്കളെങ്ങാന് തട്ടിയെടുത്താലോ? സത്യനെ അനുകരിക്കുന്ന മിമിക്രിക്കാരനു സത്യനാവാന് കഴിയില്ലെന്ന സത്യം സത്യസന്ധമായി തിരിച്ചറിയാന് സഖാക്കള് ഒരു പത്തുവര്ഷമെങ്കിലുമെടുക്കും. അതാണല്ലൊ അവരുടെ പതിവ്.
