ന്യൂദല്ഹി: അന്തരീക്ഷ മലനീകരണത്തോത് ക്രമാതീതമായി ഉയര്ന്ന ദല്ഹിയില് ഇന്ന് മുതല് ഒറ്റ-ഇരട്ട അക്ക നമ്പര് വാഹനങ്ങള്ക്ക് നിയന്ത്രണം. ജനുവരി 1 മുതല് 15 വരെ പരീക്ഷണാടിസ്ഥാനത്തിലാണ് നിയന്ത്രണം ഏര്പ്പെടുത്തിയത്. നിയമം ലംഘിക്കുന്ന വാഹനങ്ങളില് നിന്നും 2000 രൂപ പിഴ ഈടാക്കും.
വാഹനങ്ങളുടെ അവസാന അക്കം 1,3,5,7,9 എന്നീ നമ്പറുകളുള്ള വാഹനങ്ങള്ക്ക് ഒന്ന്, മൂന്ന്, അഞ്ച് തുടങ്ങിയ ഒറ്റയക്ക തീയതികളില് ദല്ഹി നഗരത്തില് പ്രവേശനമില്ല. 2,4,6,8 എന്നീ അവസാന നമ്പറുകളിലുള്ള വാഹനങ്ങള്ക്ക് രണ്ടാം തീയതി, നാലാം തീയതി തുടങ്ങിയ ഇരട്ടയക്ക ദിവസങ്ങളിലും നിയന്ത്രണമുണ്ടാകും. പരീക്ഷണ അടിസ്ഥാനത്തിലാണ് നിയന്ത്രണം.
സ്വകാര്യ കാറുകള്, ടാക്സികള്, ട്രക്കുകള്, ബസ്സുകള് എന്നിവയ്ക്ക് നിരോധനം ബാധകമാണ്. എന്നാല് ഇരുചക്ര വാഹനങ്ങള്, സര്ക്കാര് വാഹനങ്ങള്, സ്ത്രീകള് തനിയെ ഓടിച്ചുപോകുന്ന കാറുകള് എന്നിവയ്ക്ക് നിരോധനമില്ല. ഇന്ന് മുതല് 15 ദിവസത്തേക്ക് രാജ്യതലസ്ഥാനത്തെ സ്കൂളുകള്ക്ക് അവധി നല്കിയിട്ടുണ്ട്. ഇതുവഴി 3,000 സ്കൂള് ബസ്സുകള് കൂടി സര്ക്കാര് ബസ്സുകള്ക്കൊപ്പം സര്വ്വീസ് നടത്തും.
ഇരുപത് ലക്ഷത്തോളം കാറുകളാണ് ദല്ഹിയിലുള്ളതെന്നാണ് രജിസ്ട്രേഷന് രേഖകള് വ്യക്തമാക്കുന്നത്. നിയന്ത്രണം വരുന്നതോടെ ദിവസവും നിരത്തിലിറങ്ങുന്ന വാഹനങ്ങളുടെ എണ്ണം പത്തുലക്ഷമായി കുറയും. ലോകത്തിലെ തന്നെ ഏറ്റവും ഉയര്ന്ന അന്തരീക്ഷ മലിനീകരണ തോതുള്ള നഗരമാണ് ദല്ഹി. വാഹന നിയന്ത്രണം നടപ്പാക്കുമ്പോള് മലിനീകരണ തോത് കുറയുന്നത് അധികൃതര് പരിശോധിക്കും. ഇതിന്റെ അടിസ്ഥാനത്തില് മൂന്നുമാസങ്ങള്ക്ക് ശേഷം പദ്ധതി വീണ്ടും നടപ്പിലാക്കും. ചൈനയിലെ തലസ്ഥാനമായ ബീജിംഗില് അടക്കം നടപ്പാക്കി വിജയിച്ച പദ്ധതിയാണ് ഒറ്റ-ഇരട്ട അക്ക നമ്പര് വാഹന നിയന്ത്രണം.
ആവശ്യത്തിന് പോലീസിനെ നഗരത്തില് വിന്യസിച്ച് വാഹന നിയന്ത്രണം കര്ശനമായി നടപ്പാക്കുമെന്നും എഎപി പ്രവര്ത്തകര് വാഹനങ്ങള് തടയുന്നത് നിയമവിരുദ്ധ പ്രവൃത്തിയായി കണക്കാക്കി കേസെടുക്കുമെന്നും പോലീസ് അറിയിച്ചിട്ടുണ്ട്.
പദ്ധതി വിജയിപ്പിക്കുന്നതിനായി എഎപി വോളണ്ടിയര്മാരെ രംഗത്തിറക്കുമെന്ന് സംസ്ഥാന സര്ക്കാര് നേരത്തെ പറഞ്ഞിരുന്നു. എന്നാല് നിയമം നടപ്പാക്കാന് പോലീസുണ്ടെന്നും എഎപിക്കാര് യാത്രക്കാരെ തടയരുതെന്നും പോലീസ് മേധാവി ബി.എസ് ബസ്സി അറിയിച്ചു.
