ന്യൂദല്ഹി: വ്യോമസേനാ ഉദ്യോഗസ്ഥനും മലയാളിയുമായ മലപ്പുറം സ്വദേശി കെ.കെ. രഞ്ജിത്തിനെ കുടുക്കിയ ചാരവനിത വെറും ചാരവനിതയല്ലെന്ന് സൂചന. അവര് ഭീകരവനിതയാണെന്നാണ് ഇന്റലിജന്സിന് ലഭിച്ച സൂചനകള്.
ഫേസ്ബുക്ക് അടക്കമുള്ള സാമൂഹ്യ മാധ്യമങ്ങളില് ദാമിനി മക്നോട്ട് എന്ന സുന്ദരിയുടെ ചിത്രം കണ്ടും ചാറ്റിംഗില് അവരുടെ പഞ്ചാരവാക്കുകളും കേട്ടാണ് രഞ്ജിത്ത് കുടുങ്ങിയത്. ഇവര് പറഞ്ഞ പ്രകാരം വിലപ്പെട്ട വിവരങ്ങള് കൈമാറുകയും ഒടുവില് തലയൂരാനാവാത്ത നിലയില് എത്തുകയും ചെയ്തുവെന്നാണ് സത്യം. കൂടുതല് വിവരങ്ങള് നല്കിയില്ലെങ്കില് ചാരവൃത്തി നടത്തിയ കാര്യം ഐബിയെ അറിയിച്ച് കുടുക്കുമെന്ന ഭീഷണി കൂടിത്തുടങ്ങിയതോടെയാണ് രഞ്ജിത്ത് വീണത്.
രഞ്ജിത്തിനെ വീഴ്ത്തിയ ദാമിനിയെന്ന പേരിലറിയപ്പെടുന്ന യുവതി പാക് ചാരവനിതയാണെന്നാണ് കരുതിയിരുന്നത്. എന്നാല് ഇവര് ജമ്മുകശ്മീരില് പ്രവര്ത്തിക്കുന്ന ഒരു പാക് ഭീകരസംഘടനയിലെ ചാവേറാണെന്നാണ് ഇപ്പോള് ലഭിക്കുന്ന സൂചന. പാക്ക് അധിനിവേശകശ്മീരിലെ മുസാഫറാബാദിലാണ് സംഘടനയുടെ കേന്ദ്രം. അന്വേഷണം തുടരുന്നതിനാല് സംഘടനയുടെ പേര് വെളിപ്പെടുത്തിയിട്ടില്ല.
ദാമിനിയുടെ സംസാര ശൈലി, ഭാഷ( ഇവര് മണിക്കൂറുകളോളം രഞ്ജിത്തുമായി വാട്ട്സാപ്പിലും സ്കൈപ്പിലും വീഡിയോ ചാറ്റിംഗ് നടത്തുമായിരുന്നു) അവര് ഫോണ് ഉപയോഗിച്ചിരുന്ന സ്ഥലം(ട്രാക്ക് ചെയ്ത് കണ്ടെത്തിയത്) ഫേസ്ബുക്ക് അടക്കമുള്ളവ ഉപയോഗിച്ചിരുന്നതിന്റെ ഇന്റര്നെറ്റ് പ്രോട്ടോകോള് തുടങ്ങിയവയെല്ലാം മിലിറ്ററി ഇന്റലിജന്സ് വിശദമായി വിശകലനം ചെയ്തിരുന്നു. ഇത്തരം വിശകലനങ്ങളും അന്വേഷണങ്ങളും എല്ലാം എത്തിച്ചേര്ന്നത് പാക്കധീന കശ്മീരിലെ ഭീകരസംഘടനയിലേക്കാണ്. അതായത് ദാമിനി ഭീകരസംഘടനയിലെ വനിതയാണ്. അന്വേഷണങ്ങളില് വിലപ്പെട്ട പല കണ്ടെത്തലുകളും ഉണ്ട്. അക്കാര്യങ്ങള് ഒന്നും ഇപ്പോള് വെളിപ്പെടുത്താനാവില്ല. ജോയിന്റ് കമ്മീഷണര്(ക്രൈം) രവീന്ദ്ര യാദവ് പറഞ്ഞു.
ഐഎസ്ഐ രൂപീകരിച്ച വനിതകള് മാത്രമുള്ള സംഘത്തിലെ അംഗമാണ് ദാമിനിയെന്നാണ് ക്രൈംബ്രാഞ്ചിന്റെ പ്രത്യേക സംഘം കണ്ടെത്തിയിട്ടുള്ളത്. ഭാരത സൈനിക ഉദ്യോഗസ്ഥരെ കുടുക്കാന് മാത്രമായി രൂപീകരിച്ചതാണ് ഈ സംഘം. സാമൂഹ്യമാധ്യമങ്ങളില് വച്ച് ഇവരെ കരുവാക്കാന് ഈ സംഘത്തിന് പ്രത്യേക പരിശീലനവും ലഭിച്ചിട്ടുണ്ട്. ഇംഗ്ലീഷ് ഉച്ചാരണ ശൈലി പോലും പഠിപ്പിക്കുന്നുണ്ട്.
അതിനിടെ യുവതി വ്യോമസേനയുടെ ഓപ്പറേഷന് ഇന്ദ്രധനുസ് എന്ന പരിശീലന പരിപാടിയുടെ വിശദാംശങ്ങളും രഞ്ജിത്തിനോട് ആരാഞ്ഞിരുന്നുവെന്ന് വെളിവായി. ഭാരതത്തിന്റെ നാലു റഷ്യന് നിര്മ്മിത സുഖോയ് 30 യുദ്ധവിമാനങ്ങളും ബ്രിട്ടനിലെ റോയല് എയര്ഫോഴ്സിന്റെ ടൈഫൂണ് വിമാനങ്ങളും ഉള്പ്പെട്ട ഓപ്പറേഷന് ഇന്ദ്രധനുസ് ഈ ആഗസ്റ്റിലാണ് നടന്നത്. ഇതിന്റെ ചില വിവരങ്ങള് മാത്രമേ രഞ്ജിത്ത് നല്കിയിട്ടുവെന്ന് പോലീസ് പറഞ്ഞു.
ഇവരുടെ ചാറ്റിംഗിന്റെ വിശദ വിവരങ്ങള് നല്കാന് പോലീസ് കാലിഫോര്ണിയയിലുള്ള ഫേസ്ബുക്ക് അധികൃതരോട് നിര്ദ്ദേശിച്ചിട്ടുണ്ട്.ഫേസ്ബുക്ക് മെസഞ്ചര് വഴിയുള്ള ചാറ്റിംഗിന്റെ ചരിത്രം, ഇമെയിലുകളുടെ വിശദാംശം, ലോഗ് ഇന് വിശദാംശം, സ്ഥലം, അവസാനം ലോഗ് ഓഫ് ചെയ്ത സ്ഥലം എന്നിവ നല്കാനും നിര്ദ്ദേശിച്ചിട്ടുണ്ട്.
