കാലടി: മുടിയേറ്റിലെ പ്രകൃതിദത്തമായ വര്ണ്ണധൂളികള്കൊണ്ട് തയ്യാറാക്കിയ കളത്തില് നിന്ന് ആവാഹിച്ച കാളിയുടെ ശക്തികൊണ്ട് ദാരികനെ നിഗ്രഹിക്കുന്ന പ്രത്യേക നൃത്തശില്പം ദേശീയ ശ്രീശങ്കര നൃത്ത സംഗീതോത്സവത്തില് വനജീവന് നല്കി. ശ്രീശങ്കരാ സ്കൂള് ഓഫ് ഡാന്സ് ഡയറക്ടര് സുധാ പീതാംബരനും സംഘവുമാണ് ദേവീകടാക്ഷം പ്രത്യേക നൃത്തപരിപാടി അവതരിപ്പിച്ചത്. ദാരികവധം കൂടാതെ ചണ്ഡമുണ്ഡാസുരന്മാരുടെ നിഗ്രഹവും ദേവീകടാക്ഷത്തില് മനോഹരമായി ദൃശ്യവത്കരിച്ചു. സാംസ്കാരിക പൈതൃകത്തിന്റ വിളനിലങ്ങളായ നാടന് കലകളും അവയോടനുബന്ധിച്ചുളള അനുഷ്ഠാനങ്ങളും ശൈലീകൃത സുകുമാര കലകളുടെ ശക്തമായ വേരുകളാണെന്ന സന്ദേശം നല്കുന്ന നാട്യാവതരണം കൂടിയായിരുന്നു ദേവീകടാക്ഷം. ശ്രീശങ്കരാചാര്യരും ശ്രീനാരായണഗുരുദേവനും കാലാനുസൃതമായി ആവാഹിച്ചു സ്തുതിച്ച ദേവീസങ്കല്പത്തിലെ ലാസ്യ താണ്ഡവ ഭാവങ്ങളാണ് ഈ നൃത്തശില്പത്തെ വ്യത്യസ്തമാക്കിയത്.
സുധാ പീതാംബരനൊടൊപ്പം, അധ്യാപികമാരായ രശ്മി നാരായണന്, സരിഷ്മ സതീശന്, മീനാക്ഷി വി.പി, ശ്രീക്കുട്ടി മുരളി, അഞ്ജന പി. സത്യന്, സീനിയര് വിദ്യാര്ത്ഥിനി അനഘ ടി. വിജയന് എന്നിവരും അരങ്ങിലെത്തി. രചനയും സംവിധാനവും ഡോ. സി.പി. ഉണ്ണികൃഷ്ണനും സംഗീത സംവിധാനം എം.എസ്. ഉണ്ണികൃഷ്ണനുമാണ് നിര്വ്വഹിച്ചിരിക്കുന്നത്.
കലാശ്രീ സുനന്ദ നായരുടെ മോഹിനിയാട്ടമായിരുന്നു ഇന്നലത്തെ മറ്റൊരു സവിശേഷത. ഗണേശസ്തുതിയോടെയായിരുന്നു തുടക്കം. ശ്രീകൃഷ്ണന്റെയും സുധാമാവിന്റെയും സതീര്ത്ഥ്യബന്ധം അവതരിപ്പിച്ചു. പ്രാണനായക എന്ന് തുടങ്ങുന്ന സ്വാതി തിരുനാള് കൃതിയുടെ ആവിഷ്ക്കാരം നിറഞ്ഞ കൈയ്യടിയോടെയാണ് ഏവരും സ്വീകരിച്ചത്. ശ്രീകൃഷ്ണന്റെ ഗീതോപദേശ അവതരണം മോഹിനിയാട്ടത്തിന്റെ പരിമിതികള്ക്കപ്പുറമായിട്ടുള്ള അവതരണമായിരുന്നു സുനന്ദയുടേത്. തുടര്ന്ന് കുടുംബ സംഗമവും നടന്നു.
അഞ്ച് ദിവസങ്ങളിലായി ശ്രീശങ്കര ജന്മഭൂമിയില് നടന്നുവന്ന ദേശീയ ശ്രീങ്കര നൃത്ത സംഗീതോത്സവത്തിന് തിരശ്ശീല വീണു. ഭാരതീയ കലകളുടെ തനത് മഹോത്സവത്തില് പങ്കെടുക്കാന് ആയിരങ്ങളാണ് അദ്വൈതഭൂമിയിലെ നൃത്തോത്സവവേദിയിലേക്ക് ഒഴുകിയെത്തിയത്. ശ്രീശങ്കര നാട്യമണ്ഡപത്തിന് സമീപം 2250 ചതുരശ്ര അടിയില് തയ്യാറാക്കിയ വലിയ നൃത്തവേദിയില് അന്താരാഷ്ട്ര പ്രസിദ്ധരായ കലാകാരന്മാര് ഉള്പ്പടെ അറുനൂറോളം കലാകാരന്മാരാണ് നൃത്താവതരണത്തിലൂടെ ഉത്സവത്തെ ധന്യമാക്കിയത്. രണ്ടുവര്ഷം കൂടുമ്പോള് നടക്കുന്ന ദേശീയ നൃത്തോത്സവത്തിന്റെ സംഘാടകര് ശ്രീശങ്കരാ സ്ക്കൂള് ഓഫ് ഡാന്സാണ്.
