കാലടി: ലോക പ്രശസ്ത നര്ത്തകിമാരായ ഹൈദരാബാദിലെ കലാരത്ന ദീപികാ റെഡ്ഡി, ന്യൂദല്ഹിയിലെ പ്രശസ്ത നര്ത്തകി ജയപ്രഭ മേനോന്, വൈദ്യശാസ്ത്ര രംഗത്തെ അതുല്യ പ്രതിഭകള് കൂടിയായ ഡോ, ദ്രൗപദി പ്രവീണ്, ഡോ. പത്മിനി കൃഷ്ണന് എന്നിവരുടെ നൃത്തങ്ങളായിരുന്നു ദേശീയ ശ്രീശങ്കര നൃത്തോത്സവ വേദിയെ ഇന്നലെ ധന്യമാക്കിയത്. വിശ്വകവി രബീന്ദ്രനാഥ ടാഗോറിന്റെ നായികാ കഥാപാത്രങ്ങള്ക്ക് കുച്ചുപ്പുടിയിലൂടെ സാക്ഷാത്ക്കാരം നല്കി പ്രശസ്ത നര്ത്തകി ദീപികാ റെഡ്ഡി വേറിട്ട അനുഭൂതി നല്കി. ടാഗോറിന്റെ കഥാപാത്രങ്ങളായ ചിത്രാംഗദ രാജ്ഞിയും ചണ്ഡാലഭിക്ഷുകിയുമെല്ലാം ദീപികാ റെഡ്ഡി വേദിയില് അനശ്വരമാക്കി. ഒന്നരമണിക്കൂര് നീണ്ടുനിന്ന വ്യത്യസ്തങ്ങളായ അവതരണത്തെ ഹര്ഷാരവത്തോടെയാണ് ഏവരും ഹൃദയത്തിലേറ്റിയത്. വൈദ്യശാസ്ത രംഗത്തെ പ്രാഗത്ഭ്യത്തിനൊപ്പം നൃത്തത്തിലെ പ്രാവിണ്യവും പ്രകടമാക്കുന്ന മനോഹരമായ അവതരണമായിരുന്നു ഡോ. ദ്രൗപദി പ്രവീണിന്റെയും ഡോ. പത്മിനി കൃഷ്ണന്റെയും ഭരതനാട്യം കുച്ചുപ്പുടി ഫ്യൂഷന്. സരസ്വതി രാഗത്തില് ആദിതാളത്തില് പുഷ്പാഞ്ജലിയോടെയായിരുന്നു തുടക്കം.
അഞ്ച് രാഗത്തില് അഞ്ച് ഗതിയില് ചിട്ടപ്പെടുത്തിയ ജതിസ്വരം, മാനസ സഞ്ചരരേ എന്ന് തുടങ്ങുന്ന ഭഗവാന് കൃഷ്ണനില് അലിഞ്ഞുചേരുന്ന പ്രത്യേക അവതരണവുമെല്ലാം അമൃതധാരയായിട്ടാണ് ഏവരും സ്വീകരിച്ചത്. ജയപ്രഭാമേനോന്റെ മോഹിനിയാട്ടമായിരുന്നു മറ്റൊരു ആകര്ഷണം. വിഘ്നേശ്വര സ്തുതിയോടെയായിരുന്നു തുടക്കം. ലോകത്തിന്റെ ഊര്ജ്ജദായകനായി പ്രകൃതിയെ നിലനിര്ത്തുന്ന സൂര്യസ്തുതി തം സൂര്യം പ്രണമാമ്യഹം വളരെ മനോഹരമായിട്ടാണ് വേദിയില് അറങ്ങേറിയത്. കാവാലം നാരായണ പണിക്കരാണ് സംഗീതം പകര്ന്നത്. ആദിശങ്കരന്റെ ജന്മഭൂമിയില് ജഗദ്ഗുരുവിന്റെ ഭജഗോവിന്ദവും അനുഗ്രഹ വര്ഷമായി മോഹിനിയാട്ടത്തിലൂടെ പെയ്തിറങ്ങി. നാല് നര്ത്തകിമാരുടെ അസാധാരണമായ കലാവൈഭവത്താല് ധന്യമായിരുന്നു.
