കാലടി: തിരുവൈരാണിക്കുളം ക്ഷേത്രത്തില്‍ നാഗപ്രീതിക്കായി നടത്തുന്ന പുള്ളുവന്‍ പാട്ടു ഭക്തര്‍ക്ക് സായൂജ്യമായി. നറ്റതുറപ്പ് വേളയിലെ ആയില്യനാളായ ഇന്നലെ ക്ഷേത്രത്തില്‍ പ്രത്യേക ആയില്യ പൂജയും നടന്നു. ക്ഷേത്ര ദര്‍ശനത്തിനെത്തുന്ന ഭക്തര്‍ ഉമാ മഹേശ്വരന്മാരെയും മറ്റ് ഉപദേവതകളുടെയും അനുഗ്രഹം തേടി, ഒടുവില്‍ നാഗ ദൈവങ്ങളെയും വണങ്ങിയാണ് മടങ്ങുന്നത്. ക്ഷേത്രത്തിന് പുറത്തിറങ്ങുമ്പോള്‍ കിഴക്കെ ഗോപുരത്തിന് സമീപമാണ് പുള്ളുവന്‍ പാട്ടുകള്‍ക്കായി നടയൊരുക്കിയിരിക്കുന്നത്.
പരമ്പരാഗതമായി പുള്ളുവന്‍ പാട്ടുകള്‍ സ്വായത്തമാക്കിയ പതിനാലോളം പേരാണ് പാട്ടുകള്‍ പാടുന്നത്. സര്‍പ്പങ്ങളുടെ ഉത്പത്തിയെക്കുറിച്ച് ഹൈന്ദവ പുരാണത്തില്‍ പ്രതിപാദിക്കുന്ന കദ്രുവിന്റെയും വിനതയുടെയും കഴകളെ പ്രതിപാദിച്ചിട്ടുള്ളതാണ് പാട്ടുകള്‍. പുരുഷന്മാര്‍ വീണയും സ്ത്രീകള്‍ പുള്ളുവകുടവും വാദ്യമായി ഉപയോഗിക്കുന്നു. വീണ നാരദന്റെയും പുള്ളുവകുടം മഹാദേവന്റെയും വാദ്യമാണന്നാണ് ഇവരുടെ സങ്കല്‍പ്പം. ചെറിയ കുട്ടികള്‍ക്ക് ദൃഷ്ടിദോഷം പറ്റാതിരിക്കാന്‍ നാവേര്‍ പാടുന്നവരുമുണ്ട്. ക്ഷേത്രത്തില്‍ നടന്ന ആയില്യപൂജയില്‍ നൂറുകണക്കിന് ഭക്തര്‍ പങ്കുകൊണ്ടു. ക്ഷേത്രം മേല്‍ ശാന്തി എന്‍.കെ. നാരായണന്‍ നമ്പൂതിരി മുഖ്യ കാര്‍മ്മികത്വം വഹിച്ചു. ‘ഭക്തര്‍ക്ക് പ്രസാദ വിതരണവും നടന്നു. ചലച്ചിത്ര താരവും മുന്‍ എംപിയുമായ ശാരദ, നടന്‍ ഹരിശ്രീ അശോകന്‍, സംവിധായകന്‍ വിജി തമ്പി, തിരുവിതാംകൂര്‍ ദേവസ്വം ബോര്‍ഡ് അംഗം അജയ് തറയില്‍, ആലുവ റൂറല്‍ എസ്പി യതീഷ് ചന്ദ്ര, ശബരിമല മുന്‍മേല്‍ശാന്തി എന്‍.പി. രാമചന്ദ്രന്‍ പോറ്റി എന്നിവര്‍ ക്ഷേത്ര ദര്‍ശനത്തിനെത്തിയിരുന്നു. ഇന്നലെ രാവിലെ ക്ഷേത്രത്തില്‍ വന്‍ഭക്തജനത്തിരക്കാണ് അനുഭവപ്പെട്ടത്. പറ നിറയ്‌ക്കുവാനും കുട്ടികളുടെ ചോറൂണിനും തുലാഭാരത്തിനും പ്രസാദം വാങ്ങുന്ന കൗണ്ടറുകളിലും ഭക്തജനങ്ങളാല്‍ നിറഞ്ഞിരുന്നു. രാവിലെ പന്ത്രണ്ട് മണിക്ക് അടയ്‌ക്കുന്ന നട ഭക്തജനത്തിരക്കു മൂലം ഉച്ചയ്‌ക്ക് 1 മണിക്കാണ് അടച്ചത്. മിക്ക വാഹന പാര്‍ക്കിംഗ് ഏരിയകളിലും തീര്‍ത്ഥാടകര്‍ വാഹന പാര്‍ക്കിംഗ് കിട്ടാത്ത അവസ്ഥയായിരുന്നു.
