കൊല്ലം: ചെൈന്നയിലെ ദുരിതബാധിതര്ക്ക് അവശ്യവസ്തുക്കള് എത്തിച്ചുകൊടുക്കുവാനായി ജില്ലാ ഭരണകൂടം ഒരുക്കിയ സ്നേഹപൂര്വം കൊല്ലം പരിപാടിയില് സഹകരിച്ച എല്ലാ വ്യക്തികള്ക്കും സ്ഥാപനങ്ങള്ക്കും സംഘടനകള്ക്കും ജില്ലാ കളക്ടര് എ ഷൈനാമോള് നന്ദി അറിയിച്ചു. സ്നേഹപൂര്വം കൊല്ലത്തിന്റെ അവസാന വാഹനം സിഡംബര് 26ന് പുറപ്പെടും. വാഹനം പുറപ്പെടുന്നതുവരെ ലഭിക്കുന്ന അവശ്യവസ്തുക്കളെല്ലാം ദുരിതബാധിതര്ക്ക് എത്തിയെന്ന് ഉറപ്പുവരുത്തും. കൊല്ലത്ത് നിന്നും അവശ്യവസ്തുക്കള് ചെന്നൈക്ക് സമീപമുള്ള പെരുമ്പള്ളൂര്, കടല്ലൂര് ജില്ലകളിലേക്കാണ് അയച്ചത്. 26ന് അയക്കുന്ന സാധനങ്ങളും വിതരണത്തിനായി പെരുമ്പള്ളൂര് ജില്ലാ കളക്ടറെയാണ് ഏല്പ്പിക്കുന്നതെന്ന് കളക്ടര് അറിയിച്ചു. വ്യക്തികള്, സംഘടനകള്, സ്ഥാപനങ്ങള് എന്നിവരില് നിന്നും അവശസാധനങ്ങളായാണ് സ്വീകരിച്ചത്. ജില്ലയില് സിവില്സ്റ്റേഷന്, മറ്റു ഓഫീസുകള് എന്നിവിടങ്ങളിലെ ജീവനക്കാരില് നിന്നുമാത്രമാണ് സംഭാവന തുകയായി സ്വീകരിച്ചത്. ആ തുകയ്ക്ക് വസ്ത്രം, മരുന്ന്, വെള്ളം, ഭക്ഷണം തുടങ്ങിയ അവശ്യസാധനങ്ങള് വാങ്ങിഅയച്ചു.
ഇതിനുപുറമേ വിവിധ സംഘടനകളും സ്ഥാപനങ്ങളും സംഭാവനയായി അവശ്യസാധനങ്ങള് വാങ്ങി നല്കിയിരുന്നു. ഹോട്ടല് ആന്റ് റസ്റ്റോറന്റ് അസോസിയേഷന് ഒരു ലക്ഷം രൂപക്കുള്ള വസ്ത്രങ്ങളാണ് സ്നേഹപൂര്വം കൊല്ലത്തിന് നല്കിയത്. കുടുംബശ്രീ യൂണിറ്റുകളും ബേബിഫുഡ്, വസ്ത്രങ്ങള് എന്നിവ വാങ്ങി നല്കി. പോലീസ് സേനാംഗങ്ങള് രണ്ടുലക്ഷം, ചവറ കെഎംഎംഎല് 1.34 ലക്ഷം, ഐആര്ഇ 1.27 ലക്ഷം, കരുനാഗപ്പള്ളി എഇ ഓഫീസ് 9500 രൂപ, ആയൂര്വേദ ജില്ലാ മെഡിക്കല് ഓഫീസ് 32000 രൂപ, കൊല്ലം ഇലക്ട്രിക്കല് ഡിവിഷന് 28000 രൂപ, കളക്ട്രേറ്റ് 48000 രൂപ, ഹോമിയോ ഡിഎംഒ 21000 രൂപ, ജില്ലാ സപ്ലൈ ഓഫീസ് 14000 രൂപ വീതം സംഭാവനയായി നല്കി. സ്നേഹപൂര്വം കൊല്ലത്തിന്റെ ഇത്തരം ദുരിതാശ്വാസ പ്രവര്ത്തനങ്ങള് ഇനിയും തുടരുമെന്ന് ജില്ലാ കളക്ടര് അറിയിച്ചു.
