തൃപ്പൂണിത്തുറ: ശ്രീപൂര്ണ്ണത്രയീശന്റെ തോണിയാത്ര കൊണ്ട് പ്രസിദ്ധമായ പൂര്ണ്ണാനദിയുടെ സംരക്ഷണം വിജയപഥത്തിലേക്ക്. ഒന്നര ദശാബ്ദമായി സര്ക്കാരിന്റെ ചുവപ്പുനാടകളില് കുടുങ്ങിയ പനങ്കുറ്റിപ്പുഴ സംരക്ഷണ പദ്ധതിക്കാണ് പുതുജീവന് നല്കിയത്.
ചരിത്രപ്രാധാന്യമുളള പുഴ പെരിയാറിന്റെ കൈവഴിയായ പൂര്ണ്ണയാണെന്നും അതിന്റെ സംരക്ഷണം ആവശ്യപ്പെട്ട് മൂപ്പതിനാലായിരത്തിലധികം തൃപ്പൂണിത്തുറ നിവാസികളുടെ ഒപ്പുകള് ശേഖരിച്ച് മന്ത്രിമാര്, ജില്ലാകളക്ടര്, ഇറിഗേഷന് അധികൃതര്, ജനപ്രതിനിധികള് എന്നിവര്ക്ക് നിവേദനങ്ങള് നല്കിയിരുന്നു. ഇതിന്റെ ഫലമായി കിഴക്കേത്തോണിക്കടവും പടിഞ്ഞാറെത്തോണിക്കടവും ഇറിഗേഷന് 2014 ല് പടവുകളും നൂറുമീറ്റര് സംരക്ഷണഭിത്തിയും കെട്ടി സംരക്ഷിച്ചിരുന്നു. തുടര്ന്നും പൂര്ണ്ണാ നദീസംരക്ഷണസമിതി നടത്തിയ പൊതുജന സമ്പര്ക്കത്തില് പതിനായിരത്തിലധികം വരുന്ന വിദ്യാര്ത്ഥികളുടെ ഒപ്പ് ശേഖരിക്കുകയും പൂര്ണ്ണാനദിയുടെ സംരക്ഷണമുറപ്പുവരുത്തുവാന് ഉതകുന്ന പനങ്കുറ്റിപ്പുഴ സംരക്ഷണപദ്ധതി അതേപടി നടപ്പിലാക്കണമെന്നാവശ്യപ്പെട്ട് അധികൃതര്ക്കുനല്കിയ നിവേദനത്തിന്റെ ഫലമായി ഇപ്പോള് പദ്ധതി പ്രവര്ത്തന സജ്ജമായത്.
ചമ്പക്കര മുതല് തൃപ്പൂണിത്തുറ ന്യൂബൈപ്പാസ് പാലം വരെ പുഴ ഡ്രെജിംഗ് നടത്തി മാലിന്യവിമുക്തമാക്കുകയും 1700 മീറ്റര് പുഴയോരപ്രദേശം സംരക്ഷണഭിത്തികെട്ടി സംരക്ഷിക്കുകയും ചമ്പക്കര, കിഴക്കുപടിഞ്ഞാറെ തോണിക്കടവുകള്, ന്യൂബൈപ്പാസ് പാലം എന്നിവിടങ്ങളില് ബോട്ടുജെട്ടികള് നിര്മ്മിക്കുകയും ചെയ്യുകയെന്നതാണ് പനങ്കുറ്റിപ്പുഴ സംരക്ഷണപദ്ധതിയുടെ രൂപരേഖ.
കഴിഞ്ഞദിവസം പുഴയിലെ പോളപ്പായല് നീക്കം ചെയ്ത് പ്രവര്ത്തനം ആരംഭിച്ചു. ഒരു വര്ഷം കൊണ്ട് പദ്ധതി പൂര്ത്തിയാക്കുവാന് സാധിക്കുമെന്ന് ഇറിഗേഷന് അധികൃതര് വ്യക്തമാക്കി. കോണോത്തപ്പുഴയുടെയും അന്ധകാരത്തോടിന്റെയും സംരക്ഷണത്തിനായി നഗരസഭ സത്വരനടപടികള് സ്വീകരിക്കണമെന്നും പൂര്ണ്ണാ നദീസംരക്ഷണസമിതി കണ്വീനര് കെ.ജി.ശ്രീകുമാര് അറിയിച്ചു.
