ബാലുശ്ശേരി: കിനാലൂരില് സ്ഥാപിക്കുന്ന 110 കെവി സബ്സ്റ്റേഷന് ഊര്ജ വകുപ്പു മന്ത്രി ആര്യാടന് മുഹമ്മദ് തറക്കല്ലിട്ടു. സബ്സ്റ്റേഷന് അനുബന്ധമായി സ്ഥാപിക്കുന്ന 110 കെ.വി ലൈനിന്റെയും നിര്മാണോദ്ഘാടനം മന്ത്രി നിര്വഹിച്ചു.
നിലവില് വോള്ട്ടേജ് കുറവ് നേരിടുന്ന ഉണ്ണികുളം, ബാലുശ്ശേരി, പനങ്ങാട്, കിനാലൂര് ഇന്ഡസ്ട്രിയല് പാര്ക്ക് എന്നിവിടങ്ങളില് മെച്ചപ്പെട്ട വൈദ്യുതിവിതരണം സാധ്യമാക്കാന് 110 കെ.വി സബ്സ്റ്റേഷന് വരുന്നതോടെ കഴിയും.
അതോടൊപ്പം വൈദ്യുതി പ്രസരണ നഷ്ടം കുറയ്ക്കാനും വ്യവസായികള്ക്ക് ആവശ്യത്തിന് വൈദ്യുതി ലഭ്യമാക്കാനും സാധിക്കും. ഒരു വര്ഷത്തിനുള്ളില് തന്നെ നിര്മാണം പൂര്ത്തിയാക്കുകയാണ് ലക്ഷ്യം. 110 കെവി ലൈന് വലിക്കുന്നതിനാവശ്യമായ സ്ഥലം കണ്ടെത്തുകയാണ് ഏറ്റവും വലിയ വെല്ലുവിളി. അതിന് ജനങ്ങളുടെ പൂര്ണ സഹകരണം ആവശ്യമാണ്.
കിനാലൂര് എസ്റ്റേറ്റ് തൊഴിലാളികള്ക്ക് സര്ക്കാര് അനുവദിച്ച ഭൂമിക്ക് മുകളിലൂടെ ലൈന് വലിക്കുന്നത് പരമാവധി ഒഴിവാക്കും.
ഇക്കാര്യം ചര്ച്ച ചെയ്യുന്നതിന് ഡിസംബര് 22ന് എംഎല്എയുടെ നേതൃത്വത്തില് ജനപ്രതിനിധികളുടെയും തൊഴിലാളി പ്രതിനിധികളുടെയും യോഗം ചേരും.
കെഎസ്ഐഡിസിയും കെ.എസ്.ഇ.ബി ലിമിറ്റഡും ചേര്ന്ന് 950 ലക്ഷം രൂപ ചെലവിലാണ് 110 കെ.വി സബ്സ്റ്റേഷനും അനുബന്ധ ലൈനും സ്ഥാപിക്കുന്നത്. കക്കയം മുതല് ചേവായൂര് വരെയുള്ള 110 കെ.വി ലൈനില് നിന്ന് 2.5 കിലോമീറ്റര് ഡബിള് സര്ക്യൂട്ട് ലൈന് നിര്മിച്ച് കിനാലൂരില് 110 കെ.വി സബ്സ്റ്റേഷന് സ്ഥാപിക്കാനാണ് പദ്ധതി. ഇതിനാവശ്യമായ രണ്ട് ഏക്കര് സ്ഥലം കെ.എസ്.ഐ.ഡി.സി അനുവദിച്ചിട്ടുണ്ട്.
ചടങ്ങില് പുരുഷന് കടലുണ്ടി എംഎല്എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി, പനങ്ങാട് പഞ്ചായത്ത് പ്രസിഡന്റ് കമലാക്ഷി വി.എം, ജില്ലാ പഞ്ചായത്ത് അംഗം നജീബ് കാന്തപുരം, ബ്ലോക്ക് പഞ്ചായത്ത് അംഗം അഹമ്മദ് കോയ മാസ്റ്റര്, പനങ്ങാട് ഗ്രാമപഞ്ചായത്ത് അംഗങ്ങളായ നാസര് പി.കെ, ഷൈനി പി.കെ, കെ.എസ്.ഇ.ബി ലിമിറ്റഡ് ട്രാന്സ്മിഷന് ആന്റ് സിസ്റ്റം ഓപറേഷന് ഡയരക്ടര് പി വിജയകുമാരി, കോഴിക്കോട് ട്രാന്സ്മിഷന് നോര്ത്ത് ചീഫ് എഞ്ചിനീയര് ജെയിംസ് എ ഡേവിഡ്, കോഴിക്കോട് ട്രാന്സ്മിഷന് സര്ക്കിള് ഡെപ്യൂട്ടി ചീഫ് എഞ്ചിനീയര് വര്ഗീസ് ജോര്ജ്, കെ.എസ്.ഐ.ഡി.സി അസിസ്റ്റന്റ് മാനേജര് റിതു കെ.എസ്, കിനാലൂര് ഇന്ഡസ്ട്രിയല് പ്രൊജക്ട്സ് വെല്ഫെയര് അസോസിയേഷന് പ്രതിനിധി പി.പി മുസമ്മില്, വിവിധ കക്ഷി നേതാക്കള് തുടങ്ങിയവര് സംസാരിച്ചു.
