കഞ്ഞിക്കുഴി കൊലപാതകം: പ്രതിയെ കോട്ടയത്ത് എത്തിച്ചു

കോട്ടയം: കഞ്ഞിക്കുഴിയിലെ ലോഡ്ജില്‍ കെട്ടിടനിര്‍മാണതൊഴിലാളിയെ കൊലപെടുത്തിയ പ്രതിയെ കോട്ടയത്ത് എത്തിച്ചു. ആഡ്രപ്രദേശിലെ വാറങ്കലില്‍നിന്ന് പിടിയിലായ പാലക്കാട് മണ്ണാര്‍ക്കാട് പയ്യനടം ജയപ്രകാശിനെയാണ് (45) പോലീസ് കോട്ടയത്ത് എത്തിച്ചത്. സുഹൃത്തായ എറണാകുളം തേവര കണിശേരി സ്റ്റാന്‍ലിനെ (64) കഴുത്തറുത്ത് കൊലപ്പെടുത്തിയ ശേഷം കടന്നു കളയുകയായിരുന്നു. കേരളാ പോലീസ് വാറങ്കയില്‍നിന്ന് വ്യാഴാഴ്ച പിടികൂടിയ പ്രതിയെ വിമാനമാര്‍ഗമാണ് കേരളത്തിലെത്തിച്ചത്. ഇന്നലെ രാവിലെ 9.30ന് നെടുമ്പാശേരി വിമാനത്താളവത്തില്‍ സംഘം ഉച്ചക്ക് 1.45നാണ് കോട്ടയത്ത് എത്തിയത്.വാറങ്കല്‍ സ്‌പെഷ്യല്‍ ജുഡീഷ്യല്‍ മജിസ്‌ട്രേറ്റ് കോടതിയുടെ ട്രാന്‍സിസ്റ്റ് വാറണ്ടുമായാണ് പോലീസ് എത്തിയത്. കോട്ടയം ഒന്നാംകഌസ് ജുഡിഷ്യല്‍ മജിസ്‌ട്രേറ്റിന് മുന്നില്‍ ഹാജരാക്കിയ പ്രതിയെ റിമാര്‍ഡ് ചെയ്തു. ഇന്ന് പോലീസ് കസ്റ്റഡിയില്‍വാങ്ങി കോട്ടയത്തെ തെളിവെടുപ്പ് പൂര്‍ത്തിയാക്കും. ആന്ധ്രയില്‍ നടത്തിയ തെളിവെടുപ്പില്‍ പ്രതി മോഷ്ടിച്ച സ്റ്റാന്‍ലിയുടെ മൊബൈല്‍ഫോണും സ്വര്‍ണാഭരണങ്ങളും പൊലീസ് കണ്ടെടുത്തു. ആന്ധ്രയിലെ സ്വകാര്യബാങ്കില്‍നിന്ന് 50,000 രൂപക്ക് പണയം വെച്ച അഞ്ചുപവന്റെ സ്വര്‍ണമാലയും വാറങ്കലിന് സമീപത്തെ കരിംനറില്‍ 500രൂപക്ക് വിറ്റയാളില്‍നിന്ന് മൊബൈല്‍ഫോണുമാണ് കണ്ടെടുത്തത്.